ଭୁବନେଶ୍ବର: ପ୍ରବାସୀ ଭାରତୀୟ ଦିବସ ପାଳୁଛି ରାଜଧାନୀ ଭୁବନେଶ୍ବର। ଜନତା ମଇଦାନରେ ତିନି ଦିନ ବ୍ୟାପୀ ଆରମ୍ଭ ହୋଇଯାଇଛି ପ୍ରବାସୀ ଭାରତୀୟ ଦିବସ । ତିନି ଦିନିଆ ସମ୍ମିଳନୀରେ ଯୋଗ ଦେବା ପାଇଁ ଦେଶ ବିଦେଶରୁ ପ୍ରବାସୀ ଭାରତୀୟ ଭୁବନେଶ୍ବରରେ ଭିଡ ଜମାଇଛନ୍ତି । ଏହି ଭିଡ଼ ଭିତରୁ ଜଣେ ପ୍ରବାସୀ ସଭିଙ୍କ ଦୃଷ୍ଟି ଆକର୍ଷଣ କରିଛନ୍ତି । ସୂଦୁର ମରିସିଅସରୁ ଆସିଛନ୍ତି ମହାପ୍ରଭୁ ଜଗନ୍ନାଥଙ୍କ ଭକ୍ତ ମହମ୍ମଦ । ପାରମ୍ପରିକ ବେଶଭୂଷା ସହ ମୁଣ୍ଡରେ ଟୋପି । କିନ୍ତୁ ସମ୍ମିଳନୀରେ ଲାଗିଥିବା ବଡଠାକୁରଙ୍କ ଏକ ଫଟୋ ସାମନାରେ ନତମସ୍ତକ ମହମ୍ମଦ । ପ୍ରବାସୀ ଭାରତୀୟ ଦିବସରେ ମହାପ୍ରଭୁଙ୍କ ଏଭଳି ଜଣେ ଭକ୍ତଙ୍କୁ କ୍ୟାମେରାରେ କଏଦ କରିଛି ଇଟିଭି ଭାରତ ଟିମ୍ ।
ଜଗନ୍ନାଥଙ୍କ ଭକ୍ତିରେ ଲୀନ ମହମ୍ମଦ
ତାଙ୍କୁ ଦେଖୁଥିବା ପ୍ରତିଟି ବ୍ୟକ୍ତିଙ୍କ ମୁହଁରେ କେବଳ ଗୋଟିଏ କଥା ଯେ ‘‘ସତରେ ମହାପ୍ରଭୁଙ୍କ ଆଗରେ କିଛି ଧାର୍ମିକ କଟକଣା ନାହିଁ’’ । ମହାପ୍ରଭୁଙ୍କ ଉପସ୍ଥିତିକୁ ପ୍ରବାସୀ ଭାରତୀୟ ସମ୍ମିଳନୀରେ ଅନୁଭବ କରିଛନ୍ତି ମହମ୍ମଦ। ପ୍ରଭୁ ଜଗନ୍ନାଥଙ୍କ ଭକ୍ତଙ୍କ କଥା କାହାକୁ ବା ଅଛପା । ଏକଦା ଭକ୍ତ ସାଲବେଗଙ୍କୁ ଅପେକ୍ଷା କରି ବଡଦାଣ୍ଡରେ ଅଟକି ଯାଇଥିଲା କାଳିଆର ନନ୍ଦିଘୋଷ ରଥ । ଜଣେ ମୁସଲିମ ସମ୍ପ୍ରଦାୟର ପରିବାରରେ ଜନ୍ମ ହୋଇ ବି ଜଗନ୍ନାଥଙ୍କ ବଡ ଭକ୍ତ ରୂପେ ଜଣାଶୁଣା ସାଲବେଗ । ଇତିହାସର ଫର୍ଦ୍ଦ ଆଡେଇଲେ ଭକ୍ତ ସାଲବେଗ ଓ ଜଗନ୍ନାଥଙ୍କ ସମ୍ପର୍କ ଜାଣିବାକୁ ମିଳେ । ପଡୋଶୀ ରାଜ୍ୟ ବିହାରର ହୋଇ ମଧ୍ୟ ପ୍ରଭୁ ଜଗନ୍ନାଥଙ୍କୁ ବଡଦାଣ୍ଡରେ ଦର୍ଶନ କରି ପରମ ଭକ୍ତ ବୋଲାଇଥିଲେ ଭକ୍ତ ସାଲବେଗ । ଠିକ୍ ସେହିଭଳି ପ୍ରବାସୀ ଭାରତୀୟ ଦିବସରେ ପହଞ୍ଚିଥିବା ମରିସିଅସର ଭକ୍ତ ମହମ୍ମଦ ପୁରୀ ଯାଇ ମହାପ୍ରଭୁଙ୍କୁ ଦର୍ଶନ କରିବାକୁ ଇଚ୍ଛା ପ୍ରକାଶ କରିଛନ୍ତି ।
ପୁରୀ ଯାଇ ଦର୍ଶନ କରିବି
‘‘ମୁଁ ପୁରୀ ଯାଇ ପ୍ରଭୁ ଜଗନ୍ନାଥଙ୍କୁ ଦର୍ଶନ କରିବାକୁ ଚାହେଁ । ବାହାରୁ ହେଉ ପଛେ ମୁଁ ନିହାତି ତାଙ୍କ ଦର୍ଶନ କରିବି । ମୁଁ ସବୁବେଳେ ବ୍ୟକ୍ତି, ସ୍ଥାନ ଓ ଧର୍ମରୁ ଶିଖିବାକୁ ପସନ୍ଦ କରେ । ପ୍ରଭୁ ଜଗନ୍ନାଥ ହେଉଛି ଶାନ୍ତି ଓ ସୌହାର୍ଦ୍ଦର ଠାକୁର । ମୁଁ ନିଶ୍ଚିତ ଜଗନ୍ନାଥ ଧାମ ଯିବି’’ ବୋଲି କହିଛନ୍ତି ମହମ୍ମଦ । ସେ ଆହୁରି କହିଛନ୍ତି ଯେ ‘‘ଆମେ ମରିସିଅସରେ ସବୁ ଧର୍ମର ଠାକୁରଙ୍କ ସମ୍ମାନ କରୁ । ଶାନ୍ତି ଓ ପ୍ରେମର ପ୍ରତୀକ ହେଉଛନ୍ତି ମହାପ୍ରଭୁ ଜଗନ୍ନାଥ । ଏହା ମୋର ସୌଭାଗ୍ୟ ଯେ ମୁଁ ପ୍ରଭୁ ଜଗନ୍ନାଥଙ୍କ ମାଟିରେ ପାଦ ଦେଇଛି’’ ।
ମରିସିଅସରେ କିଭଳି ସେ ହିନ୍ଦୁ ପର୍ବପର୍ବାଣୀ ପଳିଥାନ୍ତି ସେ ସବୁ ବର୍ଣ୍ଣନା କରିଛନ୍ତି ମହମ୍ମଦ । ‘‘ଆମେ ମହାଶିବରାତ୍ରି ବଡ ଧୂମଧାମରେ ପାଳିଥାଉ । ଶ୍ରାବଣ ମାସରେ କାଉଡିଆଙ୍କ ଭଳି ପାଣି ଭାର ବି ନେଇଥାଉ । ସବୁ ହିନ୍ଦୁ ପର୍ବପର୍ବାଣୀକୁ ଆମେ ବେଶ୍ ଧୂମଧାମରେ ପାଳିଥାଉ । ମରିସିଅସରେ ଅଧିକାଂଶ ଲୋକେ ଭାରତୀୟ । ମହାତ୍ମା ଗାନ୍ଧୀ ଓ ନେଲସନ ମଣ୍ଡେଲାଙ୍କୁ ମରିସିଅସରେ ପୂଜା କରାଯାଉଥିବା’’ ସେ କହିଛନ୍ତି ।
ଆହୁରି ପଢନ୍ତୁ
ପ୍ରବାସୀ ଭାରତୀୟ ଦିବସ ସମ୍ମିଳନୀରେ ପ୍ରଧାନମନ୍ତ୍ରୀ, ପ୍ରବାସୀ ଏକ୍ସପ୍ରେସ ଶୁଭାରମ୍ଭ
ଇଟିଭି ଭାରତ ଟିମ୍କୁ ମହମ୍ମଦ କହିଛନ୍ତି ଯେ ‘‘ଆମ ବଂଶଜ ଭାରତ ସହ ଜଡିତ । ଆମେ ଧର୍ମର ବ୍ୟବହାର କରି ଭାଗ ଭାଗ ହେବାକୁ ଚାହୁଁନୁ ବରଂ ଏକତା ଆମକୁ ସଶକ୍ତ କରିବ ବୋଲି ବିଶ୍ବାସ କରୁ । ଓଡିଶାରେ ସମସ୍ତଙ୍କ ମଧ୍ୟରେ ଏକତା ଓ ଭାଇଚାରା ଅଛି । ଏହା ହିଁ ପ୍ରେମର ବାର୍ତ୍ତା । ଏହା ସହ ମରିସିଅସର ବି ପ୍ରଶଂସା କରିଛନ୍ତି ମହମ୍ମଦ । ମରିସିଅସ ଏକ ଛୋଟ ଦ୍ବୀପ ହୋଇଥିଲେ ମଧ୍ୟ ସେଠାରେ ଅନେକ ବିବିଧତା ରହିଛି । ହିନ୍ଦୁ ମାନେ ସେଠାରେ ଚର୍ଚ୍ଚ ଯାଇପାରିବେ। ସେହିପରି ଖ୍ରୀଷ୍ଟିଆନ ମାନେ ମସଜିଦ୍ରେ ପ୍ରାର୍ଥନା କରିପାରିବେ । ଆମେ ସମନ୍ୱୟରେ ବାସ କରୁଛୁ ଏବଂ ଧର୍ମ ଆମକୁ ବିଭାଜନ କରିବାକୁ ଦେବୁ ନାହିଁ’’।
ମହମ୍ମଦ ବିଶ୍ୱାସ କରନ୍ତି ଯେ ସୁସ୍ଥ ରହିବାର ଏକମାତ୍ର କାରକ ହେଉଛି ଏକତା। ସମସ୍ତେ କେବଳ ନିଜ ନିଜ ଭଗବାନଙ୍କ ଭିନ୍ନ ନାମ ଦେଇଛନ୍ତି । କିନ୍ତୁ ସମସ୍ତେ ସେଇ ସମାନ ଠାକୁରଙ୍କ ପୂଜା କରୁଛନ୍ତି । ମହମ୍ମଦ କଥାରୁ ଏକତା ଏବଂ ମାନବିକତାର କଥା ସ୍ପଷ୍ଟ ବାରି ହୋଇପଡୁଛି ।
ମାଣବସା ଗୁରୁବାର ଓ ଜଗନ୍ନାଥଙ୍କ ଝଲକ
ଓଡିଶାର ଐତିହ୍ୟ ଓ ପରମ୍ପରାକୁ ପ୍ରବାସୀ ଭାରତୀୟଙ୍କ ପାଖରେ ପହଞ୍ଚାଇବା ପାଇଁ ଏକ ସ୍ବତନ୍ତ୍ର ପ୍ରୟାସ କରାଯାଇଛି । ଭଗବାନ ଜଗନ୍ନାଥଙ୍କ ପ୍ରତିମୂର୍ତ୍ତିକୁ ପ୍ରବାସୀ ଭାରତୀୟ ଦିବସ ସମ୍ମିଳନୀରେ ସାମିଲ କରାଯାଇଛି । ଯେଉଁଠାରେ ଜଣେ ପ୍ରବାସୀ ଭାରତୀୟ ପ୍ରଭୁ ଜଗନ୍ନାଥଙ୍କୁ ଦର୍ଶନ କରି ମହାପ୍ରଭୁଙ୍କ ଆଶିଷ ଲାଭ କରିପାରିବେ । କିଛି କ୍ଷଣ ଏହି କୋଣରେ ଅଟକି ଜଗନ୍ନାଥଙ୍କ ଭକ୍ତିରେ ନିଜକୁ ଲୀନ କରିବା ପାଇଁ ବିଶେଷ ଉଦ୍ୟମ କରାଯାଇଛି । ସେହିପରି ବିଶ୍ବପ୍ରସିଦ୍ଧ ରଥଯାତ୍ରାର ପ୍ରତିକୃତ୍ତିକୁ ବି ସମ୍ମିଳନୀରେ ସାମିଲ କରାଯାଇଛି । ମହାପ୍ରଭୁ ଜଗନ୍ନାଥଙ୍କ ଭକ୍ତ ସମଗ୍ର ବିଶ୍ବରେ ରହିଛନ୍ତି । ଏଣୁ ସମ୍ମିଳନୀରେ ମହାପ୍ରଭୁ ଜଗନ୍ନାଥ ଓ ରଥଯାତ୍ରାକୁ ସାମିଲ କରାଯାଇଛି । ଓ଼ଡିଶାର ପାରମ୍ପରିକ ପର୍ବ ମାଣବସା ଗୁରୁବାରର ଝଲକ ପ୍ରବାସୀ ଭାରତୀୟ ଦିବସ ସମ୍ମିଳନୀରେ ଦେଖିବାକୁ ମିଳିଛି । ରାଜ୍ୟର ସର୍ବ ପୁରାତନ ରୀତିନୀତି ଓ ପରମ୍ପରାକୁ ଦେଖିବା ପାଇଁ ଅତିଥିଙ୍କୁ ଏକ ସୁଯୋଗ ଦେଇଛନ୍ତି ରାଜ୍ୟ ସରକାର ।
This captivating corner at Pravasi Bharatiya Divas 2025 invites you on an enlightening journey into the sacred world of Lord Jagannath, deepening your connection with the divine.
— I & PR Department, Odisha (@IPR_Odisha) January 8, 2025
Explore the rich tapestry of Odisha's spiritual heritage, where age-old rituals, like Manabasa… pic.twitter.com/wSajEsnliE
ଜଗନ୍ନାଥଙ୍କ ବାଲୁକା କଳାରେ ଅତିଥିଙ୍କୁ ସ୍ବାଗତ
ପ୍ରବାସୀ ଭାରତୀୟ ଦିବସ ଉପଲକ୍ଷେ ଜନତା ମଇଦାନରେ ମହାପ୍ରଭୁ ଜଗନ୍ନାଥଙ୍କ ଏକ ବିଶାଳ ବାଲୁକା କଳା ନିର୍ମାଣ କରିଛନ୍ତି ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ । ସମସ୍ତ ଅତିଥିଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସେ ବାଲୁକା କଳା ମାଧ୍ୟମରେ ଓଡିଶାକୁ ସ୍ବାଗତ ଜଣାଇଛନ୍ତି ।
Jai Jagannath! 🙏
— Sudarsan Pattnaik (@sudarsansand) January 8, 2025
Warmest welcome to Odisha for #PravasiBharatiyaDivas2025 I'm honored to showcase my sand sculpture at Janata Maidan, Bhubaneswar, as a tribute to all delegates and esteemed guests, including Hon'ble PM @NarendraModi ji. #PBD2025 pic.twitter.com/hqM0TVpZWv
ତିନି ଦିନ ଚାଲିବ ପ୍ରବାସୀ ଭାରତୀୟ ଦିବସ
ଜାନୁଆରୀ 8 (ବୁଧବାର)ଠାରୁ ତିନିଦିନିଆ ପ୍ରବାସୀ ଭାରତୀୟ ସମ୍ମିଳନୀ ଆରମ୍ଭ ହୋଇସାରିଛି । ଜନତା ମୈଦାନରେ ଅଷ୍ଟାଦଶ ପ୍ରବାସୀ ଭାରତୀୟ ଦିବସ ସମ୍ମିଳନୀକୁ ଉଦଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସମେତ ବୈଦେଶିକ ମନ୍ତ୍ରୀ ଏସ ଜୟଶଙ୍କର ମଧ୍ୟ ଉପସ୍ଥିତ ରହିଥିଲେ । ଏହାସହ ରାଜ୍ୟ ମନ୍ତ୍ରିମଣ୍ଡଳ ସଦସ୍ୟମାନେ କାର୍ଯ୍ୟକ୍ରମରେ ସାମିଲ ରହିଛନ୍ତି । ବହୁ ସଂଖ୍ୟାରେ ପ୍ରବାସୀ ଭାରତୀୟମାନେ ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ଅଛନ୍ତି । ସମସ୍ତ ପ୍ରବାସୀ ଅତିଥିଙ୍କୁ ପ୍ରଧାନମନ୍ତ୍ରୀ ସମ୍ବୋଧନ କରିବା ସହ ପ୍ରବାସୀ ଭାରତୀୟ ଏକ୍ସପ୍ରେସର ଶୁଭାରମ୍ଭ କରିଛନ୍ତି । ପ୍ରବାସୀ ଭାରତୀୟ ଦିବସ ଉପଲକ୍ଷେ ରାଜଧାନୀରେ ବିଶେଷ କାର୍ଯ୍ୟକ୍ରମ ଆୟୋଜନ ହୋଇଛି ।
