କୋରାପୁଟ: ଗତ କିଛିଦିନରେ କୋରାପୁଟ ସହରରେ ଦୁଇଜଣ ବୟସ୍କ ମହିଳାଙ୍କ ବେକରୁ ଦୁର୍ବୃତ୍ତଙ୍କ ଦ୍ବାରା ସୁନା ଚେନ ଟାଣି ନେଇଯିବା ଘଟଣା ଚାଞ୍ଚଲ୍ୟ ସୃଷ୍ଟି କରିଥିବା ବେଳେ ଗତକାଲି(ଶୁକ୍ରବାର) ପୋଲିସ ଅଭିଯୁକ୍ତକୁ କାବୁ କରିବାରେ ସକ୍ଷମ ହୋଇଛି । କୋରାପୁଟ ସହରର ଇନ୍ଦିରା ଆବାସ କଲୋନୀରେ ରହୁଥିବା ସୁନୀଲ ଖରା ନାମକ ଜଣେ 24 ବର୍ଷୀୟ ଯୁବକ ଏଭଳି କାମ କରିଥିବା କୋରାପୁଟ ଏସଡିପିଓ ଗୁଣନିଧି ମଲ୍ଲିକ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ତେବେ ସୁନୀଲ ଏହି ଦୁଇଟି ଚେନକୁ ସହରରେ ବନ୍ଧା ପକାଇବା ପାଇଁ ଚେଷ୍ଟା କରୁଥିବା ବେଳେ ପୋଲିସ ହାତରେ ଧରାପଡିଥିଲା ।
ବଡ ବଡ ସହରରେ ଏପରି ଘଟଣା ନିତିଦିନିଆ ବ୍ୟାପାର ହୋଇଥିବା ବେଳେ କୋରାପୁଟ ଭଳି ଏକ ଛୋଟ ସହରରେ ଏପରି ଘଟଣା ଚିନ୍ତାଜନକ ବିଷୟ ବୋଲି ଶ୍ରୀ ମଲ୍ଲିକ ମତବ୍ୟକ୍ତ କରିଛନ୍ତି । ତେବେ କୋଭିଡ଼ କଟକଣା ଜନିତ ବେରୋଜଗାରୀ ଯୋଗୁଁ ଯୁବକମାନେ ଏପରି ଅପରାଧିକ କାର୍ଯ୍ୟ କରୁଥିବା ଶ୍ରୀ ମଲ୍ଲିକ କହିଛନ୍ତି ।
ଅନ୍ୟପଟେ ଚୋରୀ କରିଥିବା ଯୁବକଠାରୁ ଉଭୟ ହାରକୁ ଜବତ କରିବା ପରେ ଦୁଇ ଜଣ ମହିଳାଙ୍କୁ ଥାନାରେ ହସ୍ତାନ୍ତର କରିଦିଆଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
