କୋରାପୁଟ: ଅର୍ଥକୁ ଅପେକ୍ଷା କରିଛି ପୋଲିସ ବାରାକ୍ । ଜରାଜୀର୍ଣ୍ଣ ଅବସ୍ଥାରେ ପଡିରହିଛି । କେବଳ ଅନାଇ ରହିଛି ଭୁଷୁଡ଼ିବା ବାଟକୁ । କୋରାପୁଟରୁ ରାୟଗଡାକୁ ଲମ୍ବିଯାଇଥିବା ଜାତୀୟ ରାଜପଥ କଡ଼ରେ ରହିଛି ଏହି ପୋଲିସ ବାରାକ୍ । ଦୀର୍ଘ ବର୍ଷ ହେବ ଏପରି ଜରାଜୀର୍ଣ୍ଣ ଅବସ୍ଥାରେ ଦଣ୍ଡାୟମାନ ଏହି ତିନି ମହଲା କୋଠା । ବ୍ୟାରେକ ମଝି ମହଲାର ଛାତ ଭୁଶୁଡି ପଡିଥିବା ବେଳେ ଚାରିପାଖ କାନ୍ଥ ସମ୍ପୂର୍ଣ୍ଣ ରୂପେ ଦୟନୀୟ ଅବସ୍ଥାରେ ।
ବ୍ୟାରେକର ଗୋଟେ ପାଖରେ ପୋଲିସ ହସ୍ପିଟାଲ ଏବଂ ଅପରପଟେ ପୋଲିସ ପ୍ରାଥମିକ ବିଦ୍ୟାଳୟ । ତେଣୁ କୌଣସି ମୁହୂର୍ତ୍ତରେ ଧସିଯିବା ଭୟରେ ଆଶଙ୍କା ମଧ୍ୟରେ ରହିଛନ୍ତି ସ୍ଥାନୀୟ ବାସିନ୍ଦା । ତେବେ ଜିଲ୍ଲା ଆରକ୍ଷୀ ଅଧିକାରୀଙ୍କ ପତ୍ର ପାଇବା ପରେ ପୂର୍ତ୍ତ ବିଭାଗ ଏହି ବାରାକ୍ କୁ ପରୀକ୍ଷା କରି ଅସୁରକ୍ଷିତ ବୋଲି ଘୋଷଣା କରିଛି । ବାରାକ୍ ଭାଙ୍ଗିବା ପାଇଁ ମଧ୍ୟ ୪ ଲକ୍ଷ ଟଙ୍କାର ଅର୍ଥ ମଞ୍ଜୁରୀ କରି ଜିଲ୍ଲା ପୋଲିସ କାର୍ଯ୍ୟାଳୟକୁ ପଠାଇଥିବା ସୂଚନା ଦେଇଛନ୍ତି ପୂର୍ତ୍ତବିଭାଗର କାର୍ଯ୍ୟନିର୍ବାହୀ ଯନ୍ତ୍ରୀ ।
ଏପଟେ କ୍ୟାମେରା ସାମ୍ନାରେ ଅନେକ କଥା କହିବାକୁ ରାଜି ହୋଇନାହାଁନ୍ତି ପୋଲିସ ବିଭାଗ ଅଧିକାରୀ । କାର୍ଯ୍ୟ ଆରମ୍ଭ ପାଇଁ ଅନେକ ଦିନ ବିତିଯାଇଥିଲେ ମଧ୍ୟ ରାଜ୍ୟ ପୋଲିସ ମୁଖ୍ୟାଳୟ ରୁ ଆବଶ୍ୟକ ପରିମାଣର ଅର୍ଥ ମଞ୍ଜୁରୀ ହୋଇପାରୁନଥିବା ଯୋଗୁଁ ବାରାକ୍ ସେହିପରି ପଡ଼ିରହିଥିବା ଜଣାପଡିଛି । ଅର୍ଥର ମଞ୍ଜୁରୀକୁ ବିଭାଗୀୟ ଅଧିକାରୀ ଅପେକ୍ଷା କରି ରହିଛନ୍ତି । କିନ୍ତୁ ଭୁଶୁଡିଯିବା ପାଇଁ ତତ୍ପର ହେଉଥିବା ବାରାକର ଧୈର୍ଯ୍ୟ କେବେ ଯେ ଭାଙ୍ଗିଯିବ ସେ ନେଇ ସ୍ଥାନୀୟ ବାସିନ୍ଦା ଆତଙ୍କିତ ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
