କୋରାପୁଟ: ମାଳି ପର୍ବତରୁ ଖଣି ଖନନ ପାଇଁ ପରିବେଶ ବିଭାଗର ଜନଶୁଣାଣି । ପଟ୍ଟାଙ୍ଗି ତହସିଲ ଅନ୍ତର୍ଗତ କଙ୍କଡ଼ାମ୍ବଠାରେ ଗତକାଲି(ସୋମବାର) ହିଣ୍ଡାଲକୋ ଦ୍ବାରା ଖଣି ଖନନ ଜନ ଶୁଣାଣି କରାଯାଇଛି । ତେବେ ସୁରକ୍ଷା ବଳୟ ମଧ୍ୟରେ ସମ୍ପନ୍ନ ଜନଶୁଣାଣିରେ ଖଣି ଖନନକୁ ବିରୋଧ କରୁଥିବା ଗ୍ରାମବାସୀଙ୍କୁ ମତ ରଖିବାର ସୁଯୋଗ ନ ଦେବା ଗଣତନ୍ତ୍ର ବିରୋଧୀ ବୋଲି ଲୋକ ଶକ୍ତି ଅଭିଯାନର ସଭାପତି ପ୍ରଫୁଲ୍ଲ ସାମନ୍ତରାୟ ଅଭିଯୋଗ କରିଛନ୍ତି ।
ଅପରପକ୍ଷେ ମାଳି ପର୍ବତରେ ଖଣି ଖନନକୁ ବିରୋଧ କରୁଥିବା ଗ୍ରାମବାସୀଙ୍କ ମଧ୍ୟରୁ ଅନେକଙ୍କୁ ପୋଲିସ ଅଟକ ରଖିଥିବା ବେଳେ ମହିଳାଙ୍କୁ ଜନଶୁଣାଣି ସ୍ଥଳୀକୁ ନେବା ନାଁରେ ଅନ୍ୟତ୍ର ନେଇଯାଉଥିଲେ ବୋଲି ମାଳି ପର୍ବତ ସୁରକ୍ଷା ସମିତିର ମହିଳା ସଦସ୍ୟମାନେ ଅଭିଯୋଗ କରିଛନ୍ତି । କମ୍ପାନୀ ଯେତେ ପ୍ରକାର ଉପାୟ ଅବଲମ୍ବନ କଲେ ମଧ୍ୟ ଖଣି ଖୋଳିବାକୁ ଦିଆଯିବ ନାହିଁ ବୋଲି ସୁରକ୍ଷା ସମିତି ଦୃଢୋକ୍ତି ପ୍ରକାଶ କରିଛି ।
ତେବେ ଏହି ପର୍ବତ ଅଞ୍ଚଳରୁ 30 ରୁ ଊର୍ଦ୍ଧ୍ଵ ଝରଣା ପ୍ରବାହିତ ହେଉଥିବା ବେଳେ ଶତାଧିକ ଗ୍ରାମବାସୀ ଚାଷବାସ କରି ବଞ୍ଚୁଛନ୍ତି । ସେଥିପାଇଁ ଗତ 15 ବର୍ଷ ଧରି ଲୋକେ ଗଣତାନ୍ତ୍ରିକ ଆନ୍ଦୋଳନ ଦ୍ଵାରା ପ୍ରତିରୋଧ କରିଆସୁଛନ୍ତି । ଏପଟେ ଖଣି ଖନନକୁ ସମ୍ପୂର୍ଣ ବନ୍ଦ କରିବା ପାଇଁ ପ୍ରଫୁଲ୍ଲ ସାମନ୍ତରାୟ ଏକ ଭିଡିଓ ବାର୍ତ୍ତା ମାଧ୍ୟମରେ ଦାବି କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
