କୋରାପୁଟ: 15 ଲକ୍ଷ ପ୍ରତିଯୋଗୀଙ୍କୁ ପଛରେ ପକାଇ ଜାତୀୟ ସ୍ତରର ଚିତ୍ରାଙ୍କନ ପ୍ରତିଯୋଗିତାରେ ପ୍ରଥମସ୍ଥାନ ଅଧିକାର କରିଛନ୍ତି କୋରାପୁଟର ଆଇୱା ଇପ୍ସିତା ଟେଟେ । ଫେବର କ୍ୟାସେଲ କମ୍ପାନୀ ତରଫରୁ ଏହି ପ୍ରତିଯୋଗିତା ଆୟୋଜନ ହୋଇଥିଲା । କମ୍ପାନୀ ତରଫରୁ ଆଇୱା ଇପ୍ସିତାଙ୍କୁ 75 ହଜାର ଟଙ୍କାର ପୁରସ୍କାର ରାଶି ପ୍ରଦାନ କରାଯାଇଛି । ସେ ଚତୁର୍ଥ ଶ୍ରେଣୀରେ ପାଠ ପଢୁଥିବାବେଳେ ତାଙ୍କର ଏହି ସଫଳତାକୁ ନେଇ ଜିଲ୍ଲାରେ ଆନ୍ଦର ଲହରୀ ଖେଳିଯାଇଛି ।
କୋରାପୁଟ ଜିଲ୍ଲାର ସୁନାବେଡା ସ୍ଥିତ ଭିଏସ ବିଦ୍ୟାଳୟରେ ଆଇୱା ଇପ୍ସିତା ଟେଟେ ପାଠ ପଢୁଥିବାବେଳେ ସେ ଶ୍ରୀ ଅରବିନ୍ଦ କଳା ଭବନରେ ଚିତ୍ରାଙ୍କନ ତାଲିମ ନେଉଛନ୍ତି । ଗତ କିଛିଦିନ ପୂର୍ବେ ଫେବର କ୍ୟାସେଲ କମ୍ପାନୀ ତରଫରୁ ପ୍ରତିବର୍ଷ ଆସିଲା ଭଳି ଜାତୀୟ ସ୍ତରର ଚିତ୍ରାଙ୍କନ ପ୍ରତିଯୋଗିତାରେ ଭାଗ ନେବା ପାଇଁ ଆଗ୍ରହୀ ପିଲାଙ୍କ କଳାକୃତି ପଠାଇବା ପାଇଁ ଚିଠି ଆସିଥିଲା । ଅନ୍ୟମାନଙ୍କ ସହିତ ପ୍ରତିଯୋଗିତାରେ ଭାଗ ନେବା ପାଇଁ ଇପ୍ସିତା ଆଙ୍କିଥିବା ଏକ ଚିତ୍ରକୁ ମଧ୍ୟ ପଠାଇ ଦିଆଯାଇଥିଲା । ସାରା ଦେଶରୁ 15 ଲକ୍ଷରୁ ଉର୍ଦ୍ଧ୍ବ ପ୍ରତିଯୋଗୀଙ୍କ ମଧ୍ୟରୁ ଗାଁଗଣ୍ଡାରେ ପିଲାଏ ଖେଳୁଥିବା କ୍ରିକେଟକୁ ନେଇ ଇପ୍ସିତା ଆଙ୍କିଥିବା ଚିତ୍ରଟି ବିଚାରକଙ୍କ ଦୃଷ୍ଟି ଆକର୍ଷଣ କରିଥିଲା । ପରେ ଚୂଡାନ୍ତ ପ୍ରତିଯୋଗିତାରେ ଭାଗ ନେବାକୁ ଗୋଆ ଯିବା ପାଇଁ ତାଙ୍କୁ ନିମନ୍ତ୍ରଣ ଆସିଥିଲା ।
ଗୋଆରେ ଦେଶର ବିଭିନ୍ନ ଭାଗରୁ ଆସିଥିବା ଶିଶୁ କଳାକାରଙ୍କ ମଧ୍ୟରେ ପୁଣି ଥରେ ଭଳିକି ଭଳି ଚିତ୍ରାଙ୍କନର ପ୍ରତିଯୋଗିତା ଅନୁଷ୍ଠିତ ହୋଇଥିଲା । ସେଠାରେ ସେ ନିଜର ଦକ୍ଷତା ପ୍ରଦର୍ଶନ କରି ସମସ୍ତଙ୍କୁ ଚକିତ କରି ପୁରସ୍କୃତ ହୋଇଛନ୍ତି । ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛାର ସୁଅ ଛୁଟୁଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
