କୋରାପୁଟ: ଲୋକପ୍ରସିଦ୍ଧ ଲାଠିଯାତ୍ରାରେ କମ୍ପି ଉଠିଲା ଶାବର ଶ୍ରୀକ୍ଷେତ୍ର କୋରାପୁଟ । ଦଶହରା ଆସିଲେ କୋରାପୁଟରେ ଲାଠିଯାତ୍ରା ଦେଖିବା ପାଇଁ ଲୋକେ ଅପେକ୍ଷା କରି ରହିଥାନ୍ତି । ଆଜି ମଧ୍ୟ ଏଥିପାଇଁ ବହୁ ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ଗ୍ରାମଦେବୀଙ୍କ ପ୍ରତିନିଧି ସ୍ବରୂପ ବିଭିନ୍ନ ଗ୍ରାମରୁ ପ୍ରସ୍ତୁତ ଲାଠି ଆସି ମନ୍ଦିରରେ ପହଞ୍ଚିଥିଲେ ।
ଗୁରୁମାଇଙ୍କ ଆଦିବାସୀ ଭାଷାରେ ଉଚ୍ଚାରିତ ମନ୍ତ୍ର ସହିତ ପାରମ୍ପରିକ ବାଦ୍ୟର ଝଙ୍କାର ମଧ୍ୟରେ ସମସ୍ତେ ନାଚି ଉଠିଥିଲେ । ପ୍ରଥମେ ମା' ବିମଳାଙ୍କ ପାଖରେ ଧୂପଦୀପ, ନୈବେଦ୍ୟ ଅର୍ପଣ କରିବା ପରେ ଲମ୍ବା ଲମ୍ବା ଲାଠି ଗୁଡିକୁ ଧରି ଶୋଭାଯାତ୍ରା ବାହାରିଥିଲେ । ଏହି ପାରମ୍ପରିକ ଯାତ୍ରାରେ ଶହଶହ ଆଦିବାସୀ ପରିବାର ସାମିଲ ହୋଇଥିଲେ ।
ବାଜା ରୋଶଷି ସହ ସହର ପରିକ୍ରମା କରି କୋରାପୁଟର ଗ୍ରାମଦେବୀ ନିଶାଣୀ ମୁଣ୍ଡାଙ୍କ ପୀଠରେ ସମସ୍ତେ ଆସି ଏକତ୍ରିତ ହୋଇଥିଲେ । ପୂଜାର୍ଚ୍ଚନା ସରିବା ପରେ ଲକ୍ଷ୍ୟ ସନ୍ଧାନ ଉତ୍ସବରେ ସମସ୍ତେ ଅତି ଆନନ୍ଦ ଉଲ୍ଲାସର ସହିତ ଯୋଗ ଦେଇଥିଲେ । ଧନୁ ଓ ବାଟୁଳିରେ ୬୦ ଫୁଟ ବାଉଁଶର ଅଗ୍ରଭାଗରେ ବନ୍ଧାଯାଇଥିବା ବେଲୁନକୁ ଲକ୍ଷ୍ୟ କରି ତୀର ଏବଂ ଗୋଡି ଛାଡି ଏହି ଉତ୍ସବର ଆନନ୍ଦ ନେଇଥିଲେ । ଦିନ ତମାମ ଭୀଷଣ ବର୍ଷା ଲାଗି ରହିଥିଲେ ହେଁ ଯାତ୍ରାରେ ସାମିଲ ହେବାପାଇଁ ଶହ ଶହ ଭକ୍ତଙ୍କ ଭିଡ ଲାଗିଥିଲା ।
କୋରାପୁଟରୁ ଏଚ.ଶାନ୍ତାକାର, ଇଟିଭି ଭାରତ
