କୋରାପୁଟ: ଗତ କିଛିଦିନ ଧରି ରାୟଗଡ଼ା ଜିଲ୍ଲାର କାଶୀପୁର ଅଞ୍ଚଳରେ ବ୍ୟାପକ ଭାବେ ଲୋକେ ଝାଡାବାନ୍ତିରେ ଆକ୍ରାନ୍ତ ହୋଇ ମୃତ୍ୟୁବରଣ କରିଥିବା ବେଳେ ସେହି ଅଞ୍ଚଳକୁ ଲାଗି ରହିଥିବା ଦଶମନ୍ତପୁର ବ୍ଲକର ଡୁମ୍ବାଗୁଡ଼ା ପଞ୍ଚାୟତ ଅନ୍ତର୍ଗତ ହାତିମୁଣ୍ଡାରେ ଜଣେ ଆକ୍ରାନ୍ତ ହୋଇ ମୃତ୍ୟୁବରଣ କରିଛନ୍ତି । ଏନେଇ ସୂଚନା ଦେଇଛନ୍ତି ଡୁମ୍ବାଗୁଡ଼ା ପଞ୍ଚାୟତ ସମିତି ସଦସ୍ୟ ପଦ୍ମନାଭ ଜାନି ।
ଏପରି ପରିସ୍ଥିତିରେ ଅଧିକ ବିସ୍ଫୋରଣ ହେବା ପୂର୍ବରୁ କୋରାପୁଟ ଜିଲ୍ଲାପାଳ ଅବଦଲ ଅକ୍ତର, ଦଶମନ୍ତପୁର ବିଡ଼ିଓ ଏବଂ ଡ଼ାକ୍ତରୀ ଦଳ ଗତକାଲି(ମଙ୍ଗଳବାର) ଗାଁରେ ପହଞ୍ଚି ସଚେତନତା ସୃଷ୍ଟି କରିବା ସହ ଆକ୍ରାନ୍ତଙ୍କୁ ହସ୍ପିଟାଲ ପଠାଇ ଚିକିତ୍ସା କରାଇଛନ୍ତି । ଗାଁରେ ପାଇପ ପାଣି ଯୋଗାଣ ଠିକ୍ ଭାବେ ହୋଇପାରୁନଥିବା ଯୋଗୁଁ ଗୋଟିଏ ଭଙ୍ଗା କୂଅରୁ ଲୋକେ ଦୂଷିତ ପାଣି ସଂଗ୍ରହ କରୁଥିବା ଦେଖାଯାଇଥିଲା । ଗାଁ ଓ ସମଗ୍ର ପଞ୍ଚାୟତରେ ପାନୀୟ ଜଳ ଯୋଗାଣ ଉପରେ ତୁରନ୍ତ ପଦକ୍ଷେପ ନେବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଏଥି ସହିତ ଗିର୍ଲିଗୁମ୍ମା ଓ ମୂର୍କାର ପଞ୍ଚାୟତରେ ମଧ୍ୟ ସ୍ୱାସ୍ଥ୍ୟ କର୍ମୀଙ୍କୁ ସଜାଗ ରହିବା ପାଇଁ ନିର୍ଦ୍ଦେଶ ଦିଆଯାଇଥିବା ଡୁମ୍ବାଗୁଡ଼ା ପଞ୍ଚାୟତ ସମିତି ସଦସ୍ୟ ପଦ୍ମନାଭ ଜାନି ସୂଚନା ଦେଇଛନ୍ତି ।
ଇଟିଭି ଭାରତ, କୋରାପୁଟ
