କୋରାପୁଟ: କୋରୋନା ଯୋଗୁ ରାଜ୍ୟର ସମସ୍ତ ବିଦ୍ୟାଳୟ ପ୍ରାୟ ଦେଢ ବର୍ଷରୁ ଊର୍ଦ୍ଧ୍ବ ସମୟ ହେବ ବନ୍ଦ ରହିଛି । ଗତବର୍ଷ ବିଦ୍ୟାଳୟରେ ଛାତ୍ରଛାତ୍ରୀଙ୍କ ପାଦ ପଡିନଥିବାବେଳେ ଚଳିତ ବର୍ଷ ସ୍କୁଲ ଖୋଲିବା ନେଇ ଆଶା କରାଯାଉଛି । ବିଦ୍ୟାଳୟ ଖୋଲିବାର ସମ୍ଭାବନା ଥିବାରୁ ସରକାରୀ ଓ ବେସରକାରୀ ବିଦ୍ୟାଳୟ ଗୁଡ଼ିକରେ ନାମଲେଖା ଆରମ୍ଭ ହୋଇଯାଇଛି । ଉଭୟ ବିଦ୍ୟାଳୟ ଗୁଡିକରେ ଛାତ୍ରଛାତ୍ରୀଙ୍କୁ ପୁସ୍ତକ ବଣ୍ଟନ କରାଯିବା ସହ ଅନଲାଇନରେ ପାଠପଢା ମଧ୍ୟ ଜାରି ରହିଛି । କୋରୋନାର ପ୍ରଥମ କୋପ ଟିକିଏ କମିବା ମାତ୍ରେ ଶିକ୍ଷା ବ୍ୟବସ୍ଥାକୁ ପୁଣି ସଜାଡିବା କସରତ ଆରମ୍ଭ ହୋଇଥିଲା କିନ୍ତୁ ଦ୍ବିତୀୟ ଲହର ଆସି ସବୁକିଛି ଓଲଟପାଲଟ କରିଦେଲା । ଫଳରେ ସ୍କୁଲ ଯିବାକୁ ପ୍ରସ୍ତୁତ ହେଉଥିବା ଛାତ୍ରଛାତ୍ରୀ ପୁଣି ନିରାଶ ହୋଇଥିଲେ । କିନ୍ତୁ ଏବେ କୋରୋନାର କୋପ ସାମାନ୍ୟ କମିଥିବାବେଳେ ଆଗକୁ ସ୍କୁଲ ଖୋଲିବା ନେଇ ଆଶା କରାଯାଉଛି ।
ତେବେ କୌଣସି ବି ସମୟରେ ଯଦି ସ୍କୁଲ ଖୋଲିବାକୁ କୁହାଯାଏ, ତେବେ ସରକାରୀ ସ୍କୁଲ ଗୁଡିକ ଏନେଇ ପୁରା ପ୍ରସ୍ତୁତ ଥିବା କହିଛନ୍ତି କୋରାପୁଟ ସରକାରୀ ବାଳିକା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ମିନା ସ୍ଵାଇଁ । ତେବେ ଚଳିତ ବର୍ଷ ଛାତ୍ରଛାତ୍ରୀଙ୍କ ଆଡମିସନ କମିଥିଲେ ସୁଦ୍ଧା ସରକାରୀ ବିଦ୍ୟାଳୟରେ ପାଠ ପଢିବାକୁ ଅନେକ ପ୍ରାଇଭେଟ ସ୍କୁଲର ପିଲାମାନେ ମନବଳାଇଛନ୍ତି ବୋଲି କହିଛନ୍ତି ପ୍ରଧାନ ଶିକ୍ଷୟିତ୍ରୀ ।
