କୋରାପୁଟ: ବର୍ଷେ କି ୨ବର୍ଷ ନୁହେଁ, ଦୀର୍ଘ ୨୫ ବର୍ଷ ଧରି ସେ ପୁଅ ପାଇଁ ସାଜିଛନ୍ତି ଉଭୟ ବାପାମାଆ । ୨୦ବର୍ଷ ପୂର୍ବରୁ ପତ୍ନୀଙ୍କ ଦେହାନ୍ତ ପରେ ଲକ୍ଷ୍ମଣର ସମସ୍ତ କଥା ବୁଝୁଛନ୍ତି ପିତା ସୁତି ମୁଦୁଲି । ଦିବ୍ୟାଙ୍ଗ ସନ୍ତାନର ଯତ୍ନ ନେଇ ଆଜି ସେ ପାଲଟିଛନ୍ତି ଆଦର୍ଶ ପିତା । ଘର ସାଙ୍ଗକୁ ବାହାର କାମ କରି ମଧ୍ୟ ସେ କେବେ ପୁଅକୁ ଅଣଦେଖା କରିନାହାନ୍ତି । କୋରାପୁଟ ବ୍ଲକ ଅନ୍ତର୍ଗତ ଦେବୀଘାଟର ବାସିନ୍ଦା ସୁତି ମୁଦୁଲି ଓ ପୁଅ ଲକ୍ଷ୍ମଣ ମୁଦୁଲିକୁ ନେଇ ଏବେ ବେଶ ଚର୍ଚ୍ଚା ହେଉଛି । ଜନ୍ମରୁ ଚାଲବୁଲ କରିନପାରିବା ସହିତ ମାନସିକ ଭାବେ ଅନଗ୍ରସର ଥିବା ପୁଅ ଲକ୍ଷ୍ମଣ ଏବେ ୨୫ ବର୍ଷ ବୟସରେ ପହଞ୍ଚିଥିବା ବେଳେ ବାପା ସୁତି ତାର ସମସ୍ତ କଥା ବୁଝୁଥିବା ଦେଖିବାକୁ ମିଳିଛି ।
ଜଣେ ପିତା ଶିଶୁର ଜୀବନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି । ଏହି ଦାୟିତ୍ୱ ଶିଶୁର ସୁସ୍ଥତା ଏବଂ ବିକାଶକୁ ସୁନିଶ୍ଚିତ କରିବା ପାଇଁ ଶାରୀରିକ, ଭାବନାତ୍ମକ ଏବଂ ବ୍ୟବହାରିକ ସହାୟତା ଯୋଗାଇଥାଏ । ବିଶେଷ କରି ଜଣେ ଦିବ୍ୟାଙ୍ଗ ପିଲା ନିକଟରେ ବାପାର ଏହି ଦାୟିତ୍ବ ବଢିଯାଏ । ଦିବ୍ୟାଙ୍ଗ ସନ୍ତାନକୁ ମାନସିକ ସ୍ତରରେ ଶକ୍ତି ଯୋଗାଇବା ଲାଗି ପିତାମାତା ସମସ୍ତ ପ୍ରକାର ଉଦ୍ୟମ କରିବା ସହ ସବୁଥିରେ ତାକୁ ପ୍ରୋତ୍ସାହିତ କରନ୍ତି । ଏଠାରେ ଦେବୀଘାଟର ବାସିନ୍ଦା ସୁତି ମୁଦୁଲି ଚାଷ କାର୍ଯ୍ୟ କୁଲି କାମ କରି ପରିବାର ପ୍ରତିପୋଷଣ କରୁଛନ୍ତି ସତ । ହେଲେ ପୁଅକୁ କେଉଁଥିରେ ଅଣଦେଖା କରିନାହାନ୍ତି । ଜନ୍ମରୁ ଚାଲବୁଲ କରିପାରୁନଥିବା ୨୫ ବର୍ଷର ପୁଅ ଲକ୍ଷ୍ମଣକୁ ସମସ୍ତ ପ୍ରକାର ସୁବିଧା ଯୋଗାଉଛନ୍ତି ।
ପିଲାଟି ବେଳୁ ପୁଅ ଲକ୍ଷ୍ମଣର ଗାଧୋଇବା, ପୋଷାକ ପିନ୍ଧିବା, ଖାଇବାକୁ ଦେବା ଏବଂ ଔଷଧ ଦେବା ଭଳି ଦୈନନ୍ଦିନ କାର୍ଯ୍ୟକଳାପରେ ସୁତି ସାହାଯ୍ୟ କରି ଆସିଛନ୍ତି । ପୁଅର ନିର୍ଦ୍ଦିଷ୍ଟ ଆବଶ୍ୟକତା ଉପରେ ନିର୍ଭର କରି ପିତା ଚଳପ୍ରଚଳ, ସ୍ଥାନାନ୍ତର କିମ୍ବା ବ୍ୟାୟାମରେ ମଧ୍ୟ ସାହାଯ୍ୟ କରିଆସିଛନ୍ତି । ସେ ପୁଅକୁ ନିକଟବର୍ତ୍ତୀ ଉଚ୍ଚ ବିଦ୍ୟାଳୟରେ ନାମ ଲେଖାଇବାଠାରୁ ଆରମ୍ଭ କରି ଏକତା ସଂଗଠନର ସହଯୋଗରେ ଭୁବନେଶ୍ୱରରେ ଲକ୍ଷ୍ମଣ ପାଇଁ କମ୍ପ୍ୟୁଟର ଭଳି ବୈଷୟିକ ଶିକ୍ଷା ଗ୍ରହଣ କରାଇବାରେ ସୁତି ଅବହେଳା କରିନାହାନ୍ତି । ପୁଅ ଲକ୍ଷ୍ମଣର ମାନସିକ ଓ ଶାରୀରିକ ସମସ୍ୟା ସତ୍ତ୍ୱେ ତାର ସ୍ବାଧୀନତାକୁ ପ୍ରୋତ୍ସାହିତ କରିବା ସହିତ ସମର୍ଥନ ସନ୍ତୁଳନ କରିବା ତା ମଧ୍ୟରେ ଆତ୍ମବିଶ୍ୱାସ ଏବଂ ଆତ୍ମନିର୍ଭରଶୀଳ ହେବାର ସଂକଳ୍ପକୁ ଶକ୍ତି ସେ ପ୍ରଦାନ କରିଛନ୍ତି ।
ଜଣେ ଦିବ୍ୟାଙ୍ଗ ପିଲାଙ୍କ ପାଇଁ ପିତାଙ୍କ ଉପସ୍ଥିତି ଏବଂ ଭାବପ୍ରବଣତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ସେ ଶିଶୁର ଆତ୍ମ ସମ୍ମାନ ଏବଂ ସାମଗ୍ରିକ ଭାବପ୍ରବଣତାକୁ ବଢାଇ ପ୍ରେମ, ଆଶ୍ୱାସନା ଏବଂ ଉତ୍ସାହ ପ୍ରଦାନ କରିପାରନ୍ତି । ସକ୍ରିୟ ଭାବରେ ଶୁଣିବା, ବାର୍ତ୍ତାଳାପରେ ଜଡିତ ହେବା ଏବଂ ପିଲାଟି ଉପଭୋଗ କରୁଥିବା କାର୍ଯ୍ୟକଳାପରେ ଅଂଶଗ୍ରହଣ କରିବା ଦ୍ୱାରା ପିତା ଏବଂ ସନ୍ତାନ ମଧ୍ୟରେ ସମ୍ପର୍କକୁ କିପରି ଦୃଢୀଭୂତ କରାଯାଇପାରେ ତାର ଏକ ଜ୍ୱଳନ୍ତ ଉଦାହରଣ ପାଲଟିଛନ୍ତି ସୁତି । ଉପଯୁକ୍ତ ସେବା, ରହଣି, ଏବଂ ଉତ୍ସଗୁଡିକ ପାଇବାକୁ ଓ ପୁଅର ଶିକ୍ଷାଗତ ତଥା ବିକାଶ ଯାତ୍ରାରେ ସକ୍ରିୟ ଭାବରେ ଜଡିତ ରହିଛନ୍ତି ସୁତି । ପତ୍ନୀଙ୍କ ଅକାଳ ବିୟୋଗ ପରେ ସେ ପୁଅର ସମସ୍ତ କଥା ବୁଝୁଛନ୍ତି । ସମୟେ ସମୟରେ ସୁତିଙ୍କ ସାନ ଝିଅ ମଧ୍ୟ ଭାଇକୁ ଖାଇବା ଦେବା ସହ ଘରେ ରୋଷେଇ କାର୍ଯ୍ୟରେ ସାହାଯ୍ୟ କରେ ବୋଲି କହିଛନ୍ତି ସୁତି ।
ଲକ୍ଷ୍ମଣ ସମ୍ପର୍କରେ ଇଟିଭି ଭାରତକୁ ପ୍ରତିକ୍ରିୟା ଦେଇ ସୁତି କହିଛନ୍ତି, " ଛୋଟବେଳୁ ପୁଅର ସବୁ କଥା ବୁଝୁଛି । କାମକୁ ଗଲେ ସାନ ଝିଅ ତାକୁ ଖାଇବା ପିଇବାକୁ ଦେବା ସହ ତା କଥା ବୁଝିଥାଏ । ନବମ ଯାଏଁ ପାଠ ପଢିବା ସହ ପୁଅ କମ୍ପ୍ୟୁଟର ଶିକ୍ଷା ମଧ୍ୟ ଗ୍ରହଣ କରିଛି ।" ଅନ୍ୟପଟେ ଲକ୍ଷ୍ମଣ ମଧ୍ୟ ନିଜ ସାମର୍ଥ୍ୟ ପର୍ଯ୍ୟନ୍ତ ନିଜ କାର୍ଯ୍ୟ ନିଜେ କରିବାକୁ ଚେଷ୍ଟା କରୁଛି । ବାପାଙ୍କ ବିଶ୍ରାମ, ଅବକାଶ କାର୍ଯ୍ୟକଳାପ ଏବଂ ବ୍ୟକ୍ତିଗତ ସମ୍ପର୍କ ପାଇଁ ସମୟ ଖୋଜି ଆବଶ୍ୟକ ସ୍ଥଳେ ହିଁ ସାହାଯ୍ୟ ଲୋଡ଼ିବାର ଅଭ୍ୟାସ କରିଛି ଲକ୍ଷ୍ମଣ । ପ୍ରତ୍ୟେକ ପିତାଙ୍କ ଯତ୍ନ ନେବାର ଅଭିଜ୍ଞତା ଅନନ୍ୟ । ଆଜି ବିଶ୍ବ ପିତୃ ଦିବସରେ ଏହିପରି ଜଣେ ବାପା ଏବଂ ସୁତି ଓ ଲକ୍ଷ୍ମଣ ଅନନ୍ୟ ପିତା ପୁତ୍ର ସମ୍ପର୍କ ସମାଜ ପାଇଁ ଦିଗଦର୍ଶକ ହୋଇପାରିଛି ଏହା କହିବା ବାହୁଲ୍ୟ ।
ଇଟିଭି ଭାରତ, କୋରାପୁଟ
