କୋରାପୁଟ: ରାଜ୍ୟ ବିଧାନସଭାରେ ଜୟପୁର ବିଧାୟକ ତାରାପ୍ରସାଦ ବାହିନୀପତି କୋରାପୁଟ ଜିଲ୍ଲାରେ ପାଇପ ଯୋଗେ ଜଳ ଯୋଗାଣ ବ୍ୟବସ୍ଥାରେ ଅଧାରୁ ଅଧିକା ଅଚଳ ହୋଇପଡିଥିବା ଅଭିଯୋଗ କରିଥିଲେ । ଏହାସହ ଅନେକ ଗ୍ରାମରେ ଏ ପର୍ଯ୍ୟନ୍ତ ସରକାରଙ୍କ ଦ୍ବାରା ଶୁଦ୍ଧ ପାନୀୟ ଜଳ ପହଞ୍ଚାଇବାର ପ୍ରତିଶ୍ରୁତି ପାଳନ ହୋଇନଥିବା ଅଭିଯୋଗ କରିଥିଲେ ବିଧାୟକ । ତେବେ ଗାଁ ଗଣ୍ଡାର ବାସ୍ତବ ସ୍ଥିତି ପରଖିବା ପାଇଁ କୋରାପୁଟ ନିକଟସ୍ଥ କୋଲାବ ଗାଁରେ ଯାଇ ପହଞ୍ଚିଥିଲା ଇଟିଭି ଭାରତ କ୍ୟାମେରା ଟିମ।
ଗାଁରେ ଅଛନ୍ତି 80ଟି ପରିବାର । ଗାଁରୁ ଅନତିଦୂରରେ ରହିଛି ବିଶାଳ କୋଲାବ ଜଳଭଣ୍ଡାର । ସରକାର ସାମାନ୍ୟ ଇଚ୍ଛା ପ୍ରକାଶ କରିଥିଲେ ପାଇପ ଯୋଗେ ଜଳ ଯୋଗାଣ କରିବାରେ ତିଳେମାତ୍ର ଅସୁବିଧା ହୁଅନ୍ତା ନାହିଁ । କିନ୍ତୁ ସମଗ୍ର ଗାଁର ଆବାଳ ବୃଦ୍ଧ ବନିତାଙ୍କୁ ଗୋଟିଏ ମାତ୍ର ନଳକୂଅରେ ସନ୍ତୁଷ୍ଟ ହେବାପାଇଁ ଛାଡ଼ିଦେଇ, ପ୍ରଶାସନ ଶାନ୍ତିର ନିଶ୍ବାସ ମାରୁଥିବା ଭଳି ଲାଗୁଛି ।
ତେବେ ଏ ସଂକ୍ରାନ୍ତରେ ଗ୍ରାମବାସୀ ଅନେକବାର ପ୍ରଶାସନ ପାଖରେ ଅଭିଯୋଗ କରିଛନ୍ତି ଏପରିକି ଏହି ଦାବିକୁ ନେଇ ଗତ ସାଧାରଣ ନିର୍ବାଚନ ବର୍ଜନ କରି ପ୍ରଶାସନକୁ ଦାଣ୍ଡ ଦୁଆର ପର୍ଯ୍ୟନ୍ତ ଟାଣି ଆଣିଥିଲେ । ଶେଷରେ ପ୍ରଶାସନ ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା । କିନ୍ତୁ ଆଜିବି ସ୍ଥିତି ନ ସୁଧୁରିବା ନେଇ ଗ୍ରାମବାସୀ କ୍ଷୋଭ ପ୍ରକାଶ କରିଛନ୍ତି । ଆଉ କେତେଦିନ ପର୍ଯ୍ୟନ୍ତ ଜଳଭଣ୍ଡାରର ଗୋଳିଆ ପାଣି ପିଇ ବଞ୍ଚିବେ ବୋଲି ପ୍ରଶ୍ନ କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
