କୋରାପୁଟ: ମୃତଦେହ ଗାଁକୁ ପଠାଇବା ପାଇଁ ବି ଜିଲ୍ଲାପାଳଙ୍କ ହସ୍ତକ୍ଷେପ ଆବଶ୍ୟକ ହେବା ନେଇ କୋରାପୁଟରେ ଅସନ୍ତୋଷର ନିଆଁ। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବୈପାରିଗୁଡା ବ୍ଲକ ଦଣ୍ଡାବାଡି ପଞ୍ଚାୟତ ଅନ୍ତର୍ଗତ ପଣସପୁଟ ଗ୍ରାମରେ ।
ସୂଚନା ଅନୁସାରେ, ଗ୍ରାମର ମୋତି ଖରା ଗତ ତିନିଦିନ ଧରି କୋରାପୁଟର ସହିଦ ଲକ୍ଷ୍ମଣ ନାୟକ ଭେଷଜ ମହାଵିଦ୍ୟାଳୟର ଚିକିତ୍ସାଳୟରେ ଚିକିତ୍ସିତ ହେଉଥିଲେ । ହେଲେ ସୋମବାର ସକାଳେ ତାଙ୍କର ମୃତ୍ୟୁ ହୋଇଛି। ତେବେ ଡାକ୍ତରଖାନାରେ ଥିବା ଏକମାତ୍ର ମହାପ୍ରୟାଣ ଗାଡି ଖରାପ ହୋଇ ପଡିଥିବା ଯୋଗୁଁ କର୍ତ୍ତୃପକ୍ଷ କୌଣସି ସହଯୋଗ କରିପାରିଲେ ନାହିଁ । ଆଉ କୌଣସି ଉପାୟ ନପାଇ ମୋତିର ସମ୍ପର୍କୀୟ ମାନେ ଜିଲ୍ଲାପାଳଙ୍କ ଦ୍ବାରସ୍ଥ ହୋଇ କିଛି ବ୍ୟବସ୍ଥା କରିବା ପାଇଁ ଅନୁରୋଧ କରିଥିଲେ।
ସାତଘଣ୍ଟା ଧରି ମୃତଦେହ ଡାକ୍ତରଖାନାରେ ପଡିରହିବା ପରେ ଜିଲ୍ଲାପାଳ ମଧୁସୂଦନ ମିଶ୍ରଙ୍କ ପ୍ରଚେଷ୍ଟାରେ ଅପରାହ୍ନରେ ଅନ୍ୟ ଏକ ସ୍ଥାନରୁ ମହାପ୍ରୟାଣ ଗାଡି ଆସି ପହଞ୍ଚି ମୃତଦେହକୁ ପଣସପୁଟକୁ ସ୍ଥାନାନ୍ତର କରାଯାଇଛି। ମହାପ୍ରୟାଣ ଗାଡିଟିଏ ପାଇବା ପାଇଁ ଜିଲ୍ଲାପାଳଙ୍କ ହସ୍ତକ୍ଷେପ ଆବଶ୍ୟକ ହେଉଥିବା ଯୋଗୁଁ ଡାକ୍ତରଖାନା କର୍ତ୍ତୃପକ୍ଷ ଓ ଜିଲ୍ଲାସ୍ବାସ୍ଥ୍ୟ ବିଭାଗର ଅପାରଗତାକୁ ନେଇ ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।
କୋରାପୁଟରୁ ସି.ଏଚ୍.ଶାନ୍ତାକାର, ଇଟିଭି ଭାରତ
