କୋରାପୁଟ: ଦେଶର ବିଶିଷ୍ଟ ସ୍ବାସ୍ଥ୍ୟ ଗବେଷଣା କେନ୍ଦ୍ର ଆସିଏମଆରର ଏନଆଇଆରଟିଏଚ(ICMR-NIRTH) ସହ ବୁଝାମଣା ସ୍ବାକ୍ଷର(MoU ) କଲା ଓଡିଶା କେନ୍ଦ୍ରୀୟ ବିଶ୍ବବିଦ୍ୟାଳୟ(Central University Of Odisha ) । ଆଦିବାସୀଙ୍କ ଉନ୍ନତି କ୍ଷେତ୍ରରେ ଗବେଷଣା ଲାଗି ଶୁକ୍ରବାର ଏହି ବୁଝାମଣା ପତ୍ର ସ୍ବାକ୍ଷରିତ ହୋଇଛି । ବିଶ୍ବବିଦ୍ୟାଳୟର କୁଳପତି ଶରତ କୁମାର ପାଳିତ ଏନେଇ ସୂଚନା ଦେଇଛନ୍ତି ।
CUO କୁଳପତିଙ୍କ କହିବା ଅନୁଯାୟୀ, ସ୍ବାଧୀନତାର ଦୀର୍ଘ ବର୍ଷ ପରେ ମଧ୍ୟ କୋରାପୁଟ ସମେତ କେବିକେ ଅଞ୍ଚଳ ଆଜି ବି ଅନ୍ଧକାରରେ ରହିଛି । ଜିଲ୍ଲାର ୫୦ ଭାଗରୁ ଊର୍ଦ୍ଧ୍ବ ଲୋକେ ବିଶେଷକରି ଆଦିବାସୀ ଜନଜାତି ଗରୀବ ସୀମାରେଖା ତଳେ ରହିଛନ୍ତି । ତେଣୁ ସେମାନଙ୍କ ଜୀବନଧାରଣରେ ଉନ୍ନତି ଦିଗରେ ICMRର ମିଳିତ ସହଯୋଗରେ ଗବେଷଣା କରାଯିବ । ଏଥିପାଇଁ MoU ସ୍ବାକ୍ଷର କରାଯାଇଛି ।
ଏହି ଚୁକ୍ତି ସ୍ବାକ୍ଷର ହେବା ଦ୍ବାରା ବିଶ୍ବବିଦ୍ୟାଳୟର ବିଭିନ୍ନ ବିଭାଗରେ ଅଧ୍ୟୟନ କରୁଥିବା ଛାତ୍ରଛାତ୍ରୀ ମଧ୍ୟ ଉପକୃତ ହେବେ । ଛାତ୍ରଛାତ୍ରୀ ୫ଟି ପୋଷ୍ୟ ଗ୍ରାମରେ ସିକଲ ସେଲର ସ୍ଥିତି ଉପରେ ଗବେଷଣା କରିବେ ବୋଲି କୁଳପତି ଜଣାଇଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
