କୋରାପୁଟ: ଆସନ୍ତା 2024 ନିର୍ବାଚନରେ କଂଗ୍ରେସର ସଫଳତା ହାସଲ କରିବ । 9ରୁ 90 ମିଶନ ହେବ ସଫଳ । ବିଶ୍ବାସ ଓ ଦମ୍ଭର ସହ ଓଡ଼ିଶା ପ୍ରଦେଶ କଂଗ୍ରେସର ସଭାପତି ଶରତ ପଟ୍ଟନାୟକ ଏଭଳି ଦୃଢୋକ୍ତି ପ୍ରକାଶ କରିଛନ୍ତି । ଓଡ଼ିଶାରେ ଗତ ଅକ୍ଟୋବରରୁ ଆରମ୍ଭ ହୋଇଥିବା ଭାରତ ଯୋଡ ଅଭିଯାନରେ ଯାତ୍ରା କରିବା ସମୟରେ କେନ୍ଦ୍ରର ବିଜେପି ସରକାର ଓ ରାଜ୍ୟରେ ବିଜେଡି ସରକାର ବିରୋଧରେ ଲାଗି ରହିଥିବା ଅସନ୍ତୋଷ ଦେଖିବାକୁ ମିଳିଛି ।
ଦେଶରେ 2 କୋଟି ଯୁବକ ଯୁବତୀଙ୍କୁ ଚାକିରି ଦେବା ତଥା ଦୁର୍ନୀତି ନିୟନ୍ତ୍ରଣ କରି ପ୍ରତି ପରିବାର ପାଖରେ 15 ଲକ୍ଷ ଟଙ୍କା ପହଞ୍ଚିବାର ମିଥ୍ୟା ପ୍ରତିଶ୍ରୁତି ଓ ସ୍ବପ୍ନ ଦେଖାଇ ଥିଲେ କେନ୍ଦ୍ର ସରକାର । ଏପରି କହି ଗତ 2014 ସାଧାରଣ ନିର୍ବାଚନରେ ବିଜେପି ତା ସରକାର ଗଠନ କରିପାରିଥିଲା । କିନ୍ତୁ ଏତେ ବର୍ଷର ଶାସନ ପରେ ମଧ୍ୟ ଜନତାଙ୍କୁ ଦେଖାଇଥିବା ସ୍ବପ୍ନ ବର୍ତ୍ତମାନ ମଧ୍ୟ ସାକାର ହୋଇପାରି ନଥିବା ପିସିସି ସଭାପତି ଅଭିଯୋଗ କରିଛନ୍ତି । ଅଧିକନ୍ତୁ ପେଟ୍ରୋଲ, ଡିଜେଲ, ଡାଲି, ତେଲଠାରୁ ଆରମ୍ଭ କରି ବିଭିନ୍ନ ଜିନିଷର ଦର ବଢ଼ାଇଛନ୍ତି । ଏନେଇ ସାଧାରଣ ଲୋକ ହନ୍ତସନ୍ତ ହେଉଛନ୍ତି ।
ସେହିପରି ରାଜ୍ୟରେ ଗତ ଅନେକ ବର୍ଷ ଧରି ବିଜେଡି ଦଳର ସରକାର ଶାସନ କରିବା ପରେ ମଧ୍ୟ ବର୍ତ୍ତମାନ ବିଦ୍ୟାଳୟରେ ଶିକ୍ଷକ ଓ ହସ୍ପିଟାଲରେ ଡାକ୍ତର ଅଭାବ ରହିଛି । ଏନେଇ ରାଜ୍ୟର ଶିକ୍ଷା ଓ ସ୍ୱାସ୍ଥ୍ୟସେବା ସମ୍ପୂର୍ଣ୍ଣ ରୂପେ ଭୁଶୁଡି ଯାଇଛି । କୋରାପୁଟ ଭଳି ଜିଲ୍ଲାରେ ବର୍ତ୍ତମାନ ମଧ୍ୟ ଗର୍ଭବତୀ ଖଟରେ ବୁହା ହୋଇ ଯାଉଛନ୍ତି । ଲକ୍ଷଲକ୍ଷ ଯୁବକ ଯୁବତୀ ରାଜ୍ୟ ଛାଡି ଅନ୍ୟାନ୍ୟ ଅଞ୍ଚଳକୁ କାର୍ଯ୍ୟ ଅନ୍ୱେଷଣରେ ଚାଲିଯାଉଥିବା ଦୁର୍ଭାଗ୍ୟଜନକ ପରିସ୍ଥିତି ।
ଏହାମଧ୍ୟ ପଢ଼ନ୍ତୁ.BRS ରେ ସାମିଲ ହେଲେ ଗିରିଧର ଗମାଙ୍ଗଙ୍କ ସମେତ ବହୁ ଓଡିଆ ନେତା
ଅନ୍ୟାନ୍ୟ ରାଜ୍ୟଗୁଡିକରେ ଚାଷୀର ହାରାହାରି ଆୟ 10 ହଜାର ରହିଥିବା ବେଳେ ଓଡ଼ିଶାରେ ତାହା 5 ହଜାର ମଧ୍ୟ ପହଞ୍ଚି ପାରିନାହିଁ । ଯାହାକୁ ନେଇ ସାଧାରଣ ଜନତାଙ୍କ ମଧ୍ୟରେ ଘୋର ଅସନ୍ତୋଷ ଦେଖାଦେଇଛି । ଏହାର ଫଳସ୍ୱରୂପ ଆସନ୍ତା ନିର୍ବାଚନରେ ରାଜ୍ୟରେ କଂଗ୍ରେସ ଶାସନ କରିବା ପାଇଁ ବାଟ ପରିଷ୍କାର ହେଉଥିବା ନେଇ ସେ ଆଶା ବାନ୍ଧିଛନ୍ତି । ବର୍ତ୍ତମାନ ତେଲେଙ୍ଗାନାର ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ନୂତନ ଭାବେ ଗଠନ ହୋଇଥିବା ବିଆରଏସ ଦଳର ଓଡ଼ିଶାରେ କୌଣସି ପ୍ରଭାବ ରହିବ ନାହିଁ ବୋଲି ମଧ୍ୟ ପିସିସି ସଭାପତି ପ୍ରତିକ୍ରିୟା ଦେଇଛନ୍ତି।
ଆସନ୍ତା ନିର୍ବାଚନ କଂଗ୍ରେସ ଓ ବିଜେଡି ମଧ୍ୟରେ ହେବ ଏବଂ କଂଗ୍ରେସ ପୁଣିଥରେ ଶାସନ କରିବ ବୋଲି ଶରତ ପଟ୍ଟନାୟକ ଦୃଢ଼ୋକ୍ତି ଦେଇଛନ୍ତି । କଂଗ୍ରେସ ଦଳ କେବେ ବି ଦୁର୍ବଳ ହୋଇନାହିଁ । ବର୍ତ୍ତମାନ ବୁଥସ୍ତରରେ କଂଗ୍ରେସ କାର୍ଯ୍ୟ କରି ଭାରତ ଯୋଡ଼ କାର୍ଯ୍ୟକ୍ରମ ମାଧ୍ୟମରେ ଦଳର ସ୍ଥିତିକୁ ମଧ୍ୟ ସୁଦୃଢ କରାଯିବ ବୋଲି ସେ କହିଛନ୍ତି ।
ଇଟିଭି ଭାରତ, କୋରାପୁଟ
