କୋରାପୁଟ : କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକରେ ଚାଷ ହେଉଛି ଭୁକ୍ରିଷ୍ଣା ଓ ଭୁସୁନା କନ୍ଦମୂଳ । ଏହି ଭୁକ୍ରିଷ୍ଣା ଓ ଭୁସୁନା କନ୍ଦମୂଳ ଚାଷକୁ ନେଇ ଚାଷୀ ମନରେ ଭରିଦେଇଛି ନୂତନ ଆଶା । ଭୁବନେଶ୍ୱର ସ୍ଥିତ ସିଟିସିଆରଆଇ କୃଷି ଗବେଷଣା କେନ୍ଦ୍ର ଦ୍ବାରା ପ୍ରସ୍ତୁତ ଏହି ଦୁଇ ପ୍ରକାରର କନ୍ଦମୂଳ ବିହନ ଏକ ବୈପ୍ଳବିକ ପରିବର୍ତ୍ତନ ଆଣିବ ବୋଲି ସିଟିସିଆରଆଇର ବୈଜ୍ଞାନିକ ନେଦୁନ ଚେଜୀୟାନ୍ ମତ ରଖିଛନ୍ତି ।
ଏ ସମ୍ପର୍କରେ ସିଟିସିଆରଆଇର ବୈଜ୍ଞାନିକ ନେଦୁନ ଚେଜୀୟାନ୍ କହିଛନ୍ତି, ''ଭୁକ୍ରିଷ୍ଣା ଓ ଭୁସୁନା କନ୍ଦମୂଳ ଚାଷ ପଟାଙ୍ଗୀ ବ୍ଲକ ପାଇଁ ଆଣିଦେଇଛି ଏକ ନୂଆ ସଞ୍ଚାର । ଏଥିରେ ଭରି ରହିଛି ନାନା ଔଷଧୀୟ ଗୁଣ । କ୍ୟାନସର ରୋଗକୁ ଦୂର କରିବ ଭୁକ୍ରିଷ୍ଣା ଓ ଭୁସୁନା କନ୍ଦମୂଳ । ଖାଲି ସେତିକି ନୁହେଁ ଚର୍ମ ରୋଗ ସୋରିଆସିସ ପାଇଁ ଏହି କନ୍ଦମୂଳର ପାଉଡର ବେଶ ଲାଭଦାୟକ ।''
ପଟ୍ଟାଙ୍ଗି ବ୍ଲକର ପାଞ୍ଚଟି ପଞ୍ଚାୟତରେ ପରୀକ୍ଷାମୂଳକ ଭାବେ 1000 ଚାଷୀଙ୍କୁ ନେଇ 200 ହେକ୍ଟରରେ ଗବେଷଣା ଲବ୍ଧ ବିହନ ଲଗାଇବାର ଲକ୍ଷ୍ୟ ରଖାଯାଇଛି । ବର୍ତ୍ତମାନ 750 ଜଣ ଚାଷୀ 300 ଏକର ଜାଗାରେ ଚାଷ କରି ପ୍ରାୟ 4000 କ୍ଵିଣ୍ଟାଲ କନ୍ଦମୂଳ ଉତ୍ପାଦନ କରିଥିବା ନାବାର୍ଡର ଡିଡିଏମ୍ ମୁରଲୀ ମୋହନ ବେହେରା ଜଣାଇଛନ୍ତି ।
ସାଧାରଣ ଭାବେ ଚାଷ କରାଯାଉଥିବା କନ୍ଦମୂଳକୁ 5- 10 ଟଙ୍କା ଦରରେ ବିକ୍ରି କରି ହତାଶ ହୋଇପଡିଥିବା କୋରାପୁଟ ଜିଲ୍ଲାର ଚାଷୀ ବର୍ତ୍ତମାନ ଭୁକ୍ରିଷ୍ଣା ଓ ଭୁସୁନା କନ୍ଦମୂଳ ଚାଷ କରି ମନରେ ନୂତନ ଆଶା ସଞ୍ଚାରିତ କରିଛନ୍ତି । ଏହି ନୂତନ ପ୍ରକାରର କନ୍ଦମୂଳରେ ତନ୍ତୁ ଅଂଶ ଅଧିକ ରହିବାସହ କ୍ୟାନସର ଭଳି ରୋଗ ବିରୋଧରେ ସଂଗ୍ରାମ କରିବାରେ ସହାୟକ ହେବ ବୋଲି ବୈଜ୍ଞାନିକ ଚେଜୀୟାନ ଜଣାଇଛନ୍ତି ।
ପଟ୍ଟାଙ୍ଗୀ ବ୍ଲକର କୁସୁମା ଗ୍ରାମର ଚାଷୀ ସିତାରାମ ହନ୍ତାଳ ଆସନ୍ତା ଥର ବେଳକୁ ଉତ୍ପାଦନରେ ବୃଦ୍ଧି ଘଟିବ ବୋଲି ବିଶ୍ୱାସ ରଖିଛନ୍ତି । ଚାଷୀଙ୍କୁ ସହଯୋଗ କରିଥିବା ପ୍ରସ୍ତୁତିର ସମ୍ପାଦକ ସୂଚନା ଦେଇଛନ୍ତି ଯେ, "ଏହି ନୂତନ କିସମର କନ୍ଦମୂଳ କିଲୋ ପିଛା ପାଖାପାଖି 30 ଟଙ୍କାରେ ବିକ୍ରି ହୋଇପାରିବ ।"
ଇଟିଭି ଭାରତ, କୋରାପୁଟ
