କୋରାପୁଟ: ଓଡିଶା ରେ ନା' ର ଭିଡ ଭିତରେ ଆନ୍ଧ୍ର କହୁଛି ଆ' । ଗୋଟିଏ ପଟେ କୋରାପୁଟର ମେଟାବିରା ସମେତ 10ଟି ପଞ୍ଚାୟତକୁ ଲୋଭନୀୟ ଅଫର ଦେଖାଇ ନିଜ ଆଡକୁ ଆକର୍ଷତିକ କରୁଛି ଆନ୍ଧ୍ର । ଅନ୍ୟପଟେ ସାବତ ପୁଅ ଭଳି ଏହି ଅପହଞ୍ଚ ଇଲାକା ସବୁକୁ ଭୁଲିଗଲାଣି ଓଡିଶା । ଏପରି ସ୍ଥିତିରେ ଭବିଷ୍ୟତ କଥା ଭାବି ମାତୃଭୂମି ପ୍ରେମକୁ ଭୁଲି ଆନ୍ଧ୍ରାରେ ମିଶିବେ ବୋଲି ଚେତାବନୀ ଦେଇଛନ୍ତି ଏଠାକାର ବାସିନ୍ଦା ।
ସୀମାବର୍ତ୍ତୀ ଅଞ୍ଚଳକୁ ନେଇ ଓଡିଶା ଓ ଆନ୍ଧ୍ର ମଧ୍ୟରେ ବିବାଦ ତୁଟିବାର ନାଁ ଧରୁନି । ଏପଟେ ବିବାଦ ଭିତରେ ଛନ୍ଦି ହୋଇ କୋଟିଆ ପରେ ଫସିଗଲାଣି କୋରାପୁଟର ବହୁ ଅଞ୍ଚଳ । ଏପଟେ ଅବହେଳା ଓ ଅଣଦେଖାରେ ସୁଯୋଗ ଉଠାଇ ଲୋକଙ୍କ ଦୁଃଖ ସୁଖରେ ଭାଗୀଦାର ହେବାକୁ ହାତ ବଢାଉଛି ଆନ୍ଧ୍ର । ସେପଟେ ବିକାଶର ପ୍ରତିଶ୍ରୁତିରେ ପୋତିଥିବା ଓଡିଶା ସରକାର ନୀରବ । ଏତେ ସବୁ ଭିତରେ ଅସ୍ମଞ୍ଜସରେ ସହ ସହ ଏହି ଇଲାକାର ଲୋକେ ।
ସମସ୍ତ ପ୍ରଲୋଭନକୁ ଏଡାଇଦେଇ ଲୋକେ ବାରମ୍ବାର ଓଡିଶା ସରକାର ଓ ତାକୁ ପ୍ରତିନିଧିତ୍ବ କରିଥିବା ଜିଲ୍ଲା ପ୍ରଶାସନ ପାଖରେ ନେହୁରା ହେଉଛନ୍ତି । କିନ୍ତୁ ଲୋକଙ୍କ ଆଶା ଭରସାକୁ ପ୍ରତାରଣା କରି ପ୍ରଶାସନ ଏ ପର୍ଯ୍ୟନ୍ତ କୌଣସି ପଦକ୍ଷେପ ନେଉନଥିବା ନେଇ ପଟ୍ଟାଙ୍ଗି ପଞ୍ଚାୟତ ସମିତିର ଅଧ୍ୟକ୍ଷ କ୍ଷୋଭ ପ୍ରକାଶ କରିଛନ୍ତି ।
ତେବେ କାହିଁକି ଏମାନେ ଏତେ ଅସନ୍ତୁଷ୍ଟ । କଣ ଏଠିକାର ପାହାଡ ଚଢି ପାରୁନି ରାଜ୍ୟ ସରକାରଙ୍କ ଯୋଜନା ? ଏ ନେଇ ଜାଣିବାକୁ ଗ୍ରାଉଣ୍ଡ ଜିରୋରେ ପହଞ୍ଚିଥିଲା ଇଟିଭି ଭାରତ । ମରଣଯନ୍ତା ହୋଇ ପ଼ଡିଛି ରାଲେଗାଡ଼ା ଦେଇ କୋରାପୁଟରୁ ବିଶାଖାପାଟଣା ଆଡକୁ ଯାଉଥିବା ଜାତୀୟ ରାଜପଥ ରାସ୍ତା । ନଦୀ ନାଳ ପାଣି ପାର କଲେ ପଡେ ମେଟାବିରା ଓ 10ଟି ପଞ୍ଚାୟତ । ଅଙ୍କା ବଙ୍କବଙ୍କା ପଥୁରିଆ ବାଟ । ନିତି ଜୀବନ ବାଜିରେ ଲାଗେ । ନଦୀ ନାଳ ପାଣି ପାର ହୋଇ ଲୋକେ କରନ୍ତି ବିପଦପୂର୍ଣ୍ଣ ଯାତ୍ରା । ଖାଲି ଏତିକି ନୁହଁ ଶିକ୍ଷା , ସ୍ବାସ୍ଥ୍ୟ ଭଳି ସମସ୍ତ ମୌଳିକ ସୁବିଧା ଏଠାରେ ଅପହଞ୍ଚ । ଆନ୍ଧ୍ର ଓଡିଶା ସୀମାବର୍ତ୍ତୀ ଅଞ୍ଚଳରେ ଥିବା ସମସ୍ୟା କଥା କହିଲେ କୋଟିଆର ୨୧ ଟି ଗ୍ରାମ କଥା ପ୍ରଶାସନ ଚିନ୍ତା କରୁଥିବା ବେଳେ ବର୍ତମାନ ଆଉ ୧୧ ଟି ଗାଁ ଏବେ ଦୃଷ୍ଟି ଆଢୁଆଳରେ ।
ଏପରି ସ୍ଥିତିରେ ଓଡିଶା ଛାଡିବାକୁ ମନ ବଳାଉଛନ୍ତି ଏମାନେ ।
ଓଡିଶା ସରକାରଙ୍କ ଅଣଦେଖା ଓ ଅବହେଳା ଯୋଗୁଁ ରାଜ୍ୟ ପ୍ରତି ଥିବା ପ୍ରେମ ମଳିନ ହୋଇପଡିଛି । ଏବେ କଣ ହେବ ଆଗାମୀ ପଦକ୍ଷେପ । ଓଡିଶା ସରକାର ଏହି ଅପହଞ୍ଚ ଇଲାକାର ସମାଧାନ କରିବେ, ନାଁ ମୁଉକାର ଫାଇଦା ଉଠାଇ ଲୁଚି ଲୁଚି ଆନ୍ଧ୍ର ଏହି ସବୁ ଅଞ୍ଚଳକୁ କବଜା କରିବାରେ ସଫଳ ହେବ .. ତାହା ସମୟ ସାପେକ୍ଷ
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
