କୋରାପୁଟ: କୋଟିଆରେ ପୋଲିସ ଆଉଟପୋଷ୍ଟ ପ୍ରତିଷ୍ଠା କରିବ ଆନ୍ଧ୍ର । କୋଟିଆର ନେରେଡିବାଲାସା ଓ ଫଗୁଣସିନେରୀରେ ପୋଲିସ ଆଉଟ ପୋଷ୍ଟ ପ୍ରତିଷ୍ଠା କରିବା ପାଇଁ ଆନ୍ଧ୍ରପ୍ରଦେଶ ସରକାର ନିଷ୍ପତ୍ତି ନେଇଛନ୍ତି ।
ବୁଧବାର ପାର୍ବତୀପୁରମ ଆଇଟିଡିଏ ପ୍ରକଳ୍ପ ଅଧିକାରୀ କୁର୍ମନାଥ ଓ ଉପଜିଲ୍ଲାପାଳ ଭାବନା କୋଟିଆ ପଞ୍ଚାୟତର ନେରେଡିବାଲାସା , ଧୂଳିପଦର ,ତାଡିବାଲାସା ଓ ଫଗୁଣସିନେରୀରେ ଲୋକଙ୍କ ସହିତ ମିଶି ଆନ୍ଧ୍ରପ୍ରଦେଶ ତରଫରୁ ଚାଲିଥିବା ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ପଚାରିବୁଝିବା ସହ ନେରେଡିବାଲାସା ଓ ଫଗୁଣସିନେରୀରେ ପୋଲିସ ଆଉଟପୋଷ୍ଟ ସ୍ଥାପନା କରିବା ପାଇଁ ଜାଗା ଚିହ୍ନଟ କରିଥିବା ଜଣାପଡ଼ିଛି ।
ସୂଚନାଥାଉକି କୋଟିଆ ବିବାଦ ବର୍ତ୍ତମାନ ସୁପ୍ରିମକୋର୍ଟରେ ବିଚରାଧୀନ ରହିଥିବାବେଳେ ଆନ୍ଧ୍ର ପ୍ରଦେଶ ଏକ ଚାଟିଆ ଭାବେ ଅନୁପ୍ରବେଶ କରୁଛି । ବିଭିନ୍ନ ସମୟରେ ଆନ୍ଧ୍ର ପ୍ରଶାସନିକ ଅଧିକାରୀ କୋଟିଆରେ ପ୍ରବେଶ କରି ଲୋକଙ୍କୁ ଆନ୍ଧ୍ର ପ୍ରତି ପ୍ରଲୋଭିତ କରିବା ପାଇଁ ଚେଷ୍ଟା କରୁଛନ୍ତି । ନିକଟରେ କୋଟିଆରେ ଉଭୟ ରାଜ୍ୟ ପ୍ରଶାସନିକ ଅଧିକାରୀ ମୁହାଁମୁହିଁ ପରିସ୍ଥିତି ମଧ୍ୟ ସୃଷ୍ଟି ହୋଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
