କୋରାପୁଟ: କୋଟିଆ ଅଞ୍ଚଳକୁ ପ୍ରଭାବିତ କରିବା ପାଇଁ ଆନ୍ଧ୍ରର ନୂଆ ଚାଲ୍ । ବାରମ୍ବାର ବିରୋଧ ସତ୍ତ୍ବେ କୋଟିଆ ପଞ୍ଚାୟତର ଶେଷ ଗ୍ରାମ ଫାଟୁସିନେରି ରାସ୍ତା ଠାରୁ ଆନ୍ଧ୍ରପ୍ରଦେଶର କୋଡାମା ଗ୍ରାମ ପର୍ଯ୍ୟନ୍ତ ୧୦.୮ କିଲୋମିଟର ରାସ୍ତା ନିର୍ମାଣ ପାଇଁ ଆନ୍ଧ୍ର ସରକାରଙ୍କ ପକ୍ଷରୁ ଭିତ୍ତିପ୍ରସ୍ତର ସ୍ଥାପନ କରାଯାଇଛି । ଏହି କାର୍ଯ୍ୟକ୍ରମରେ ଆନ୍ଧ୍ରପ୍ରଦେଶର ଉପ ମୁଖ୍ୟମନ୍ତ୍ରୀ ରାଜନ ଦୋରା ଏବଂ ଆନ୍ଧ୍ରପ୍ରଦେଶ ମଣ୍ୟମ ଜିଲ୍ଲାର ଜିଲ୍ଲାପାଳ ନିଶାନ୍ତ କୁମାର ଉପସ୍ଥିତ ରହିଥିବା ସୂଚନା ମିଳିଛି ।
କୋଟିଆ ଅଞ୍ଚଳରେ ଆନ୍ଧ୍ର ସରକାରଙ୍କ ଅନୁପ୍ରବେଶ ଉଦ୍ୟମକୁ କୋରାପୁଟ ବାସୀଙ୍କ ସମେତ ଜିଲ୍ଲା ପ୍ରଶାସନ ଏବଂ ସ୍ଥାନୀୟ ରାଜନୈତିକ ନେତୃବୃନ୍ଦ ବାରମ୍ବାର ବିରୋଧ କରିଛନ୍ତି । ଏହାପରେ ମଧ୍ୟ ଆଜି (ଶୁକ୍ରବାର) ଆନ୍ଧ୍ର ସରକାରଙ୍କ ତରଫରୁ କୋଟିଆ ପଞ୍ଚାୟତର ଶେଷ ଗ୍ରାମ ଫାଟୁସିନେରି ନିକଟ ଓଡ଼ିଶା-ଆନ୍ଧ୍ର ସୀମା ଠାରୁ ଆନ୍ଧ୍ରପ୍ରଦେଶର ନନ୍ଦା ଗ୍ରାମ ପଟକୁ ଦୁଇ କିଲୋମିଟର ଦୂରରେ ନନ୍ଦା-ଫାଟୁସିନେରି ରାସ୍ତା ଠାରୁ ଆନ୍ଧ୍ରପ୍ରଦେଶର କୋଡାମା ଗ୍ରାମ ପର୍ଯ୍ୟନ୍ତ ରାସ୍ତା ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଛି । ୧୧.୩୬ କୋଟି ଟଙ୍କା ବ୍ୟୟରେ ୧୦.୮ କିଲୋମିଟର ରାସ୍ତା ନିର୍ମାଣ କରାଯିବାକୁ ଯୋଜନା କରିଛନ୍ତି ଆନ୍ଧ୍ର ସରକାର ।
ଏହି ରାସ୍ତା ନିର୍ମାଣ ସହ ଆଉ ୧୧ ଟି ରାସ୍ତା ନିର୍ମାଣ ପାଇଁ ଆଜି ଆନ୍ଧ୍ର ଉପ ମୁଖ୍ୟମନ୍ତ୍ରୀ ରାଜନ ଦୋରା ଘୋଷଣା କରିଥିବା ଜଣା ପଡ଼ିଛି । ଏହା ସହିତ ଏହି ଅଞ୍ଚଳରେ ବସବାସ କରୁଥିବା ଆଦିବାସୀଙ୍କ ଉନ୍ନତି ପାଇଁ ପର୍ଯ୍ୟଟନର ବିକାଶ କରାଯିବ ବୋଲି ସେ ଦେଇଥିବା ମନ୍ତବ୍ୟ ଆନ୍ଧ୍ରର ନୂତନ ଚାଲକୁ ପଦାରେ ପକାଇଛି । ତେବେ ଏହାକୁ ଓଡ଼ିଶା ସରକାର କିପରି ଭାବେ ସାମ୍ନା କରିବେ ସେନେଇ ସ୍ଥାନୀୟ ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି ।
ବିଗତ ଦିନରେ ଆନ୍ଧ୍ର ପ୍ରଦେଶର କୋଡମା ଅଞ୍ଚଳର ନେତା ମାଳତୀ ଦୋରାଙ୍କ ନେତୃତ୍ବରେ ଓଡ଼ିଶାରେ ଚାଲିଥିବା ବିକାଶର ଧାରାକୁ ଉଚ୍ଚ ପ୍ରଶଂସା କରିଥିଲେ । ସେମାନଙ୍କ ଅଞ୍ଚଳରେ ଆନ୍ଧ୍ର ସରକାର ବିକାଶ ମୂଳକ କାର୍ଯ୍ୟ ନକଲେ ଓଡ଼ିଶାରେ ମିଶିଯିବା ପାଇଁ ଆନ୍ଦୋଳନ କରାଯିବ ବୋଲି ମଧ୍ୟ ସେ ଧମକ ଦେଇଥିଲେ । ସେଥିପାଇଁ ଓଡିଶା ସୀମା ବାହାରେ ଥାଇ ସେଠାରୁ କୋଟିଆ ଅଞ୍ଚଳରେ ପରୋକ୍ଷଭାବେ ପର୍ଯ୍ୟଟନର ବିକାଶ କରିବାକୁ ଘୋଷଣା କରିଛନ୍ତି ଆନ୍ଧ୍ର ଉପ ମୁଖ୍ୟମନ୍ତ୍ରୀ ରାଜନ ଦୋରା । ତେବେ ଏସବୁରୁ କୋଟିଆ ଅଞ୍ଚଳ ସହ ଆନ୍ଧ୍ର ଗ୍ରାମ ଗୁଡ଼ିକୁ ସଂଯୋଗ କରିବା ସହ ଓଡ଼ିଶାର ନାରାୟଣପାଟଣା ଓ ବନ୍ଧୁଗାଁ ବ୍ଲକକୁ ଆନ୍ଧ୍ର ସହ ଯୋଡ଼ିବାର ଯୋଜନା ସ୍ପଷ୍ଟ ଜଣାପଡ଼ୁଛି ।
ଇଟିଭି ଭାରତ, କୋରାପୁଟ
