କୋରାପୁଟ: କୋରାପୁଟ ଦାମନଯୋଡି ଠାରେ ବକ୍ସାଇଟ ଖଣି ଖନନ ପାଇଁ ରାଷ୍ଟ୍ରାୟତ୍ତ ଉଦ୍ୟୋଗ ନାଲକୋର ପ୍ରତିଷ୍ଠା କରାଯାଇଥିଲା। ତେବେ ଏହାର ପ୍ରତିଷ୍ଠା ହେବା ପରେ ଏହା ଦ୍ବାରା ପ୍ରଭାବିତ ହୋଇଥିବା ବ୍ୟକ୍ତିଙ୍କ ପ୍ରଗତି କ୍ଷେତ୍ରରେ କମ୍ପାନୀ କେଉଁ କାର୍ଯ୍ୟଗୁଡିକ ଏପର୍ଯ୍ୟନ୍ତ ସମ୍ପାଦିତ କରିଛି ଓ କଣ କରି ପାରିନାହିଁ ସେ ନେଇ ଏକ ସମୀକ୍ଷା କରାଯାଇଛି। ଦାମନଯୋଡି ଠାରେ ବୁଧବାର ସନ୍ଧ୍ୟାରେ ଆୟୋଜିତ ସାମ୍ବାଦିକ ସମ୍ମିଳନୀରେ ନାଲକୋ ସିଏମଡି ତପନ କୁମାର ଚାନ୍ଦ ଏ ବିଷୟରେ ଜଣାଇଛନ୍ତି।
କମ୍ପାନୀ ଦ୍ବାରା ଏହି ଅଞ୍ଚଳର ପ୍ରଭାବିତ ବ୍ୟକ୍ତିଙ୍କ ହିତ ସାଧନ କରିବା ପାଇଁ ନାଲକୋ ଅନେକ ପ୍ରଗତିମୂଳକ କାର୍ଯ୍ୟ କରିଥିବା ବେଳେ ଆଉ କିଛି କରିବାକୁ ବାକି ରହିଥିବା ସିଏମଡି ସ୍ବୀକାର କରିଛନ୍ତି। ତେବେ ନାଲକୋ ଦ୍ବାରା ବକ୍ସାଇଟ ଖନନର ପରିମାଣ ଓ ଏହାର ବ୍ୟବସାୟରେ ଆସୁଥିବା ରେକର୍ଡ ପରିମାଣର ବୃଦ୍ଧି ଏହି ଅଞ୍ଚଳର ଅଭିବୃଦ୍ଧି ପାଇଁ କାର୍ଯ୍ୟ କରିବାରେ କମ୍ପାନୀକୁ ସହଯୋଗ କରିବ । ଆସନ୍ତା ୨୦୨୨ ସୁଦ୍ଧା ନାଲକୋର ୧ ନିୟୁତ ଟନ କ୍ଷମତା ସମ୍ପନ୍ନ ବିଶୋଧନ ପ୍ଲାଣ୍ଟ ପ୍ରତିଷ୍ଠା ହେବା ଦ୍ବାରା ଏହା ଆହୁରି ସହଜ ହୋଇ ଉଠିବ ବୋଲି ସେ ଆଶାବାଦୀ ଅଛନ୍ତି।
ନିକଟ ଅତୀତରେ ପଟ୍ଟାଙ୍ଗି ଅଞ୍ଚଳରେ କମ୍ପାନୀ ଦ୍ବାରା ଖଣି ଖନନ ପାଇଁ ହୋଇଥିବା ପଲ୍ଲୀସଭାରେ ସ୍ଥାନୀୟ ଲୋକଙ୍କ ସହଯୋଗ ନମିଳିବା ପ୍ରସଙ୍ଗରେ ସାମ୍ବାଦିକଙ୍କ ପ୍ରଶ୍ନର ଉତ୍ତର ରଖିଛନ୍ତି । ସେ କହିଛନ୍ତି ଜନସାଧାରଣଙ୍କ ସହଯୋଗ ମିଳିଲେ କମ୍ପାନୀ ଅଧିକରୁ ଅଧିକ ସୁବିଧା ସୁଯୋଗ ପ୍ରଦାନ କରିପାରିବ ।
କୋରାପୁଟରୁ ସି ଏଚ ଶାନ୍ତାକାର, ଇଟିଭି ଭାରତ
