କୋରାପୁଟ: କୋରାପୁଟ ପୋଲିସର ବଡ ସଫଳତା । ପୋଲିସ ଏନକାଉଣ୍ଟରରେ ଟଳିଲେ ୩ ମହିଳା କ୍ୟାଡରଙ୍କ ସମେତ ୫ ଜଣ ମାଓବାଦୀ । ଡିଭିଏଫ ଓ ଏସଓଜି ଯବାନ ଦ୍ବାରା କୁମ୍ବିଂ ଅପରେସନ ଚାଲିଥିବା ବେଳେ ପୋଲିସକୁ ଏହି ସଫଳତା ମିଳିଛି ।
ସୂଚନା ମୁତାବକ ଆନ୍ଧ୍ର ଓ ଓଡ଼ିଶା ସୀମାରେ ମାଓବାଦୀଙ୍କ ଗତିବିଧି ଉପରେ ଦୀର୍ଘ ଦିନରୁ ନଜର ରଖିଥିଲା ପୋଲିସ । ଆଜି କୋରାପୁଟ ଜିଲ୍ଲାର ନନ୍ଦପୁର ବ୍ଲକ ଅନ୍ତର୍ଗତ ପଡୁଆ ଥାନାର ହାତୀବାରୀ ପଞ୍ଚାୟତ ଅନ୍ତର୍ଗତ କିତୁଆକାନ୍ତି ଜଙ୍ଗଲରେ ପ୍ରାୟ ୧୫ ଜଣ ମାଓବାଦୀ ଲୁଚି ରହିଥିବା ଖବର ମିଳିଥିଲା । ଏହା ପରେ ଯବାନମାନେ ଯୋଜନା ପ୍ରସ୍ତୁତ କରି ଏନକାଉଣ୍ଟର କରିଥିଲେ । ତେବେ ଆକ୍ରମଣ ବେଳେ ଅନ୍ୟମାନେ ଖସି ପଳାଇବାରେ ସମର୍ଥ ହୋଇଛନ୍ତି ।
ମୃତକଙ୍କ ପରିଚୟ ମିଳିନଥିଲେ ମଧ୍ୟ ସେମାନଙ୍କଠାରୁ ଜବତ ହୋଇଥିବା ଅସ୍ତ୍ରଶସ୍ତ୍ରକୁ ଦେଖିଲେ ସେମାନେ ମାଓ କ୍ୟାଡରର ବୋଲି ଜଣା ପଡୁଥିବା କୋରାପୁଟ ଆରକ୍ଷୀ ଅଧିକ୍ଷକ କେ.ବିଶାଲ ସିଂ କହିଛନ୍ତି । ମୃତ ମାଓବାଦୀଙ୍କ ନିକଟରୁ 2 ଟି ଇନସାସ ବନ୍ଧୁକ ସହ ବିଭିନ୍ନ ମାଓ ସାମଗ୍ରୀ ମିଳିଥିବା ସୂଚନା ଦେଇଛନ୍ତି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
