କୋରାପୁଟ: ଜିଲ୍ଲାରେ ନକଲି ନକ୍ସଲଙ୍କ ପ୍ରାର୍ଦୁଭାବ । ଚାରି ଜଣ ନକଲି ନକ୍ସଲଙ୍କୁ କାକିରିଗୁମା ପୋଲିସ ଗିରଫ କରିଛି । ଗିରଫ ନକଲି ନକ୍ସଲଙ୍କଠାରୁ ଗୋଟିଏ ଦେଶୀ ବନ୍ଧୁକ, ୩୦ ହଜାର ଟଙ୍କା, ଗୋଟିଏ ମୋବାଇଲ ଓ ସେମାନେ ବ୍ୟବହାର କରୁଥିବା ଗୋଟିଏ ମୋଟର ସାଇକେଲକୁ ଜବତ କରାଯାଇଛି ।
ଲକ୍ଷ୍ମୀପୁର ବ୍ଲକ ଭିତରଗଡ ପଞ୍ଚାୟତରେ କିଛି ଯୁବକ ନିଜକୁ ନକ୍ସଲ କହି ଗାଁଁରେ ପୋଷ୍ଟର ମାରିବା ସହ ସରପଞ୍ଚ ଶ୍ରୀଧର ଜାନିଙ୍କ ଠାରୁ ୫୦ହଜାର ଟଙ୍କା ମାଗି ନେଇଥିଲେ । ତେବେ ପୁଣିଥରେ ଟଙ୍କା ମାଗିବା ନେଇ ଜାନୀ ପୋଲିସ ନିକଟରେ ଅଭିଯୋଗ କରିଥିଲେ । ଅଭିଯୁକ୍ତଙ୍କ ଫୋନ୍ ଟ୍ରାକିଂ କରି ୪ ଜଣଙ୍କୁ ଗିରଫ କରାଯାଇଥିବା ଏସଡିପିଓ ଅଶ୍ବିନି ନାୟକ ସୁଚନା ଦେଇଛନ୍ତି ।
ନକ୍ସଲଙ୍କ ପ୍ରାର୍ଦୁଭାବ ଜିଲ୍ଲାରେ ବର୍ତ୍ତମାନ କିଛି ମାତ୍ରାରେ କମିଥିବାବେଳେ ନକଲି ନକ୍ସଲଙ୍କ ରାଜୁତି ବଢିଥିବା ପୋଲିସ ପାଇଁ ଏବେ ଚିନ୍ତା ବଢାଇଛି । ଗତ ସପ୍ତାହକ ମଧ୍ୟରେ କାକିରିଗୁମା ପୋଲିସ ୭ଜଣ ନକଲି ନକ୍ସଲଙ୍କୁ ଗିରଫ କରିଥିବା ବେଳେ ନାରାୟଣପାଟଣା ପୋଲିସ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
