କୋରାପୁଟ: ଜନ୍ମଦିନ ଉତ୍ସବ ମନାଇବା ସାଜିଲା କାଳ । ପାଞ୍ଚ ଜଣ ସାଙ୍ଗ ଉତ୍ସବ ମନାଇବାକୁ ଯାଇଥିଲା ବେଳେ ସେମାନଙ୍କ ମଧ୍ୟରୁ ତିନିଜଣ କୋଲାବ ଜଳଭଣ୍ଡାରରେ ବୁଡିଯାଇଥିଲେ । ଫଳରେ ସେମାନଙ୍କର ମୃତ୍ୟୁ ଘଟିଛି ।
କୋରାପୁଟର ଲାଞ୍ଜିଗୁଡାସ୍ଥିତ ସରକାରୀ ମହାବିଦ୍ୟାଳୟରେ ବିଏସସି କମ୍ପ୍ୟୁଟର ସାଇନ୍ସ ପଢ଼ୁଥିଲେ ପାଞ୍ଚଜଣ ଛାତ୍ର । ସେମାନଙ୍କ ମଧ୍ୟରୁ ଜଣକ ଜନ୍ମଦିନ ପାଳନ କରିବା ପାଇଁ କଲେଜ ନିକଟସ୍ଥ ଜଳଭଣ୍ଡାର କୂଳକୁ ଯାଇ ଗାଧୋଉଥିବା ସମୟରେ ଗଭୀର ଜଳ ମଧ୍ୟରେ ବୁଡିଯାଇଥିଲେ ।
ତେବେ ସେମାନଙ୍କ ମଧ୍ୟରୁ ଦୁଇଜଣ କୂଳକୁ ଫେରିଆସିବାରେ ସକ୍ଷମ ହୋଇଥିବା ବେଳେ ତିନିଜଣ ବୁଡିଯାଇ ମୃତ୍ୟୁବରଣ କରିଥିଲେ । ମୃତ ଯୁବକଙ୍କ ମଧ୍ୟରୁ ଜଣେ ମାଲକାନଗିରି ଜିଲ୍ଲାର ହୋଇଥିବାବେଳେ ଅନ୍ୟ ଦୁଇଜଣ କୋରାପୁଟର ଯୁବକ ବୋଲି ଜଣାପଡିଛି । ଅଗ୍ନିଶମ ବିଭାଗର କର୍ମଚାରୀ ପହଁଚି ତିନୋଟି ଯାକ ମୃତଦେହକୁ ଉଦ୍ଧାର କରିଛନ୍ତି ।
କୋରାପୁଟରୁ ସିଏଚ ଶାନ୍ତାକାରା, ଇଟିଭି ଭାରତ
