କୋରାପୁଟ: ବର୍ଷାରୁ ବର୍ତ୍ତିବାକୁ ଗୁମ୍ଫାରେ ନେଇଥିଲେ ଆଶ୍ରୟ । ଅତଡ଼ା ଖସି ଦୁଇଜଣ ବ୍ୟକ୍ତିଙ୍କ ଶୋଚନୀୟ ମୃତ୍ୟୁ (2 Killed In Landslide Inside Cave) । ଦୁଇଦିନ ପରେ ମିଳିଲା ମୃତଦେହ । କୋରାପୁଟ ଜିଲ୍ଲା ବୈପାରୀଗୁଡା ଥାନା ଗୁପ୍ତେଶ୍ୱର ପଞ୍ଚାୟତ ଶାବେରୀ ନଦୀ କୁଳରେ ଏଭଳି ଏକ ଘଟଣା ଦେଖିବାକୁ ମିଳିଛି ।
ମୃତକ ହଳଦୀକୁଣ୍ଡ ଗ୍ରାମର ସେଲୁମ ଧାରୁଆ ଓ ତ୍ରିଲୋଚନ ଧାରୁଆ ବୋଲି ଜଣା ପଡ଼ିଛି । ଏହି ଆଦିବାସୀ ଗ୍ରାମର ଅଧିକାଂଶ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ପରିବାର ପେଟପାଟଣା କଥା ବୁଝନ୍ତି । ଗତ ଅଗଷ୍ଟ ୧୬ ତାରିଖରେ ମଧ୍ୟ ଉଭୟ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରିବାକୁ ମାଳିପଦର ଜଙ୍ଗଲକୁ ଯାଇଥିଲେ । ସେହିଦିନ ପ୍ରବଳ ବର୍ଷା ହେବାରୁ ଉଭୟ ସ୍ଥାନୀୟ ଏକ ଗୁମ୍ଫାରେ ଆଶ୍ରୟ ନେଇଥିଲେ ।
ତେବେ ବର୍ଷା ଯୋଗୁଁ ଗୁମ୍ଫାରେ ଅତଡ଼ା ଖସିଥିଲା । ଫଳରେ ଉଭୟ ଚାପି ହୋଇ ମୃତ୍ୟୁବରଣ କରିଛନ୍ତି । ଉଭୟ ଦୁଇଦିନ ଧରି ନଫେରିବାରୁ ପରିବାର ବର୍ଗ ପୋଲିସକୁ ଖବର ଦେଇଥିଲେ । ପୋଲିସ ତଦନ୍ତ କରି ଗୁମ୍ଫା ଭିତରୁ ଉଭୟଙ୍କ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।
