ଖୋର୍ଦ୍ଧା : ପାରିବାରିକ କଳହରୁ ମହିଳାଙ୍କୁ ବୀଭତ୍ସ ହତ୍ୟା(Woman murder in Khordha over family dispute)। ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ପଙ୍କାଳ ଗ୍ରାମରେ ଏଭଳି ଘଟଣା ଘଟିଛି । ଜନ୍ମକଲା ମାଆକୁ ଭରଣପୋଷଣ ଦାୟିତ୍ୱ ନେବା ବିବାଦରେ ତିିନି ଭାଇ ମିଶି ନିଜ ଭାଇବୋହୂଙ୍କୁ ନିର୍ମମ ଭାବରେ ହତ୍ୟା କରିଛନ୍ତି । ଏହି ହତ୍ୟାକାଣ୍ଡ ଭିଆଇବା ପରେ ଘଟଣାସ୍ଥଳରୁ ଚମ୍ପଟ ମାରିଛନ୍ତି 3 ଅଭିଯୁକ୍ତ ।
ଖୋର୍ଦ୍ଧା ଜିଲ୍ଲା ପଙ୍କାଳ ଗ୍ରାମରେ ରୁହନ୍ତି ସୁବାଷ ରାଉତରାୟ ଓ ତାଙ୍କ ପତ୍ନୀ ମୀନାକ୍ଷୀ । ସୁବାଷଙ୍କ ଓ ତାଙ୍କର ତିନି ଭାଇଙ୍କ ମଧ୍ୟରେ ମାଆକୁ ପୋଷିବାକୁ ନେଇ ଦୀର୍ଘଦିନ ହେବ ପାରିବାରିକ ବିବାଦ ଲାଗି ରହିଥିଲା । ଆଜି(ସୋମବାର) ଅପରାହ୍ନରେ ସୁବାଷଙ୍କ ଘରକୁ ପୁଣିଥରେ 3 ଭାଇ ଆସି ଗଣ୍ଡୋଗୋଳ କରିଥିଲେ।
3 ଭାଇ ପ୍ରତ୍ୟେକ ମାସରେ ପାଳି କରି ମାଆକୁ ରଖିବାର ନିଷ୍ପତ୍ତି ନେଇଥିଲେ । ଅର୍ଥାତ ଗୋଟିଏ ପୁଅ ମାଆକୁ ଏକ ମାସ ପାଳି କରି ଖାଇବାକୁ ଦିଅନ୍ତି । ଆଉ ପାଳି ସରିବା ପରେ ପର ମାସରେ ଆଉ ଜଣେ ପୁଅ ମାଆ କଥା ବୁଝେ । ମାଆଙ୍କ ବୟସ 100 ଟପିଲାଣି । ତେଣୁ ସେ ଏବେ ଶଯ୍ୟାସାୟୀ ଭାବେ ରହୁଛନ୍ତି ।
ତେବେ ଆଜି ଅପରାହ୍ମରେ ମାଆକୁ ଆଣି ପାଖରେ ରଖିବା ପାଇଁ ସୁବାଷଙ୍କୁ କହିଥିଲେ ତାଙ୍କ 3 ଭାଇ । ହେଲେ ଏବେ ମାଆକୁ ପାଖରେ ରଖିପାରିବେ ନାହିଁ ବୋଲି ଉଭୟ ସୁବାଷ ଏବଂ ତାଙ୍କ ପତ୍ନୀ ମନା କରିଥିଲେ । ଏକଥା ଶୁଣି ସୁବାଷଙ୍କ 3 ଭାଇ ଉତକ୍ଷୀପ୍ତ ହୋଇ ଉଠିଥିଲେ । ଘର ଭିତରେ ଥିବା ଏକ ଧାରୁଆ ଅସ୍ତ୍ରରେ ସୁବାଷଙ୍କୁ ମରଣାନ୍ତକ ଆକ୍ରମଣ କରିଥିଲେ । ଏହାଦେଖି ସୁବାଷଙ୍କ ପତ୍ନୀ ଅଟକାଇବାକୁ ଚେଷ୍ଟା କରିଥିଲେ । ହେଲେ ଉତକ୍ଷୀପ୍ତ ଭାଇମାନେ ମଧ୍ୟ ମୀନାକ୍ଷୀଙ୍କୁ ଆକ୍ରମଣ କରିଥିଲେ । ଏହି ମରଣାନ୍ତକ ଆକ୍ରମଣରେ ସୁବାଷ ଗୁରୁତର ଭାବେ ଆହତ ହୋଇଥିବା ବେଳେ ଘଟଣାସ୍ଥଳରେ ହିଁ ମୀନାକ୍ଷୀଙ୍କ ମୃତ୍ୟୁ ହୋଇଛି ।
ଏହି ଆକ୍ରମଣରେ ମୀନାକ୍ଷୀଙ୍କ ମୁଣ୍ଡରେ ଶକ୍ତ ଆଘାତ ଲାଗିଛି । ଯେଉଁଥିରେ କି ତାଙ୍କ ମୁଣ୍ଡରୁ ପ୍ରବଳ ରକ୍ତସ୍ରାବ ହୋଇଥିବା ଦେଖିବାକୁ ମିଳିଛି । ଅନ୍ୟପକ୍ଷରେ ମୀନାକ୍ଷୀଙ୍କ ମୃତ୍ୟୁପରେ ସୁବାଷଙ୍କ ତିନିଭାଇ ଘଟଣାସ୍ଥଳରୁ ଫେରାର ହୋଇଯାଇଛନ୍ତି । ଏହି ଘଟଣା ସମ୍ପର୍କରେ ସ୍ଥାନୀୟ ବାସିନ୍ଦା ଜାଣିପାରି ସୁବାଷଙ୍କ ଘରେ ପହଞ୍ଚିଥିଲେ।
ସେଠାରେ ସୁବାଷଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଥିଲେ। ଏହାସହ ପୋଲିସକୁ ଖବର ଦେଇଥିଲେ । ଖବରପାଇ ବାଣପୁର ପୋଲିସ ଘଟଣାସ୍ଥଳରେ ପହଞ୍ଚି ପାରିପାର୍ଶ୍ବିକ ପରିସ୍ଥିତି ପରଖିବା ସହ ତଦନ୍ତ ଆରମ୍ଭ କରିଛି ।
ଇଟିଭି ଭାରତ, ଖୋର୍ଦ୍ଧା
