ଭୁବନେଶ୍ବର: ମହିଳା କ୍ରିକେଟର ରାଜଶ୍ରୀ ସ୍ୱାଇଁଙ୍କ ସନ୍ଦେହଜନକ ଅବସ୍ଥାରେ ମୃତଦେହ ମିଳିବା ଘଟଣା । ରାଜ୍ୟ ସରକାରଙ୍କ ଉପରେ ବର୍ଷିଲେ ବିରୋଧୀ ଦଳ ନେତା ଜୟ ନାରାୟଣ ମିଶ୍ର । ବିରୋଧୀ ଦଳ ନେତା ଜୟ ନାରାୟଣ ମିଶ୍ର କହିଛନ୍ତି ଯେ ଘଟଣାର ତଦନ୍ତ ହେବାର ଆବଶ୍ୟକତା ରହିଛି । ଯେଉଁମାନେ ଦୋଷୀ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଛି । ମନ୍ତ୍ରୀ ଜନତାର ସବୁ କଥା ଶୁଣିବା ପାଇଁ ବାଧ୍ୟ । ଯେଉଁ ମନ୍ତ୍ରୀ ଲୋକଙ୍କ କଥା ଶୁଣୁନାହିଁ ସେ ମନ୍ତ୍ରୀ ପଦବାଚ୍ୟ ନୁହେଁ । ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ବହୁତ ଖରାପ । ଓଡିଶା ଭଳି ସରଳ ରାଜ୍ୟରେ ହତ୍ୟା କେସ କ୍ଵଚିତ କେସ ଥିଲା । ଏବେ ପ୍ରତ୍ୟେକ ଦିନ ହତ୍ୟା, ଚୋରି, ଡକାୟତି ହେଉଛି ।
ଜୟ ଅଭିଯୋଗ କରିଛନ୍ତି, "ପ୍ରଥମ କାରଣ ପୋଲିସକୁ ରାଜନୀତି କରଣ କରିବା, ପୋଲିସ କେବଳ ବିଜେଡି କର୍ମୀ ଭଳି କାର୍ଯ୍ୟ କରୁଛି । ନିର୍ବାଚନରେ ଜିତାଇବା ଏବଂ ସରକାରଙ୍କୁ ଘଣ୍ଟ ଘୋଡାଇବା କାମ ଛାଡିଦେଲେ ପୋଲିସର ଆଉ କିଛି କାମ ନାହିଁ ।" କ୍ରୀଡା ମନ୍ତ୍ରୀଙ୍କ ବାସଭବନକୁ ଆସି ଫେରିଥିଲେ ରାଜଶ୍ରୀଙ୍କ ପରିବାର ଲୋକେ । କଟକ ଜିଲ୍ଲା ଗୁରୁଡ଼ିଝାଟିଆ ଜଙ୍ଗଲରୁ ମହିଳା କ୍ରିକେଟର ରାଜଶ୍ରୀ ସ୍ବାଇଁଙ୍କ ମୃତଦେହ ମିଳିଛି ବୋଲି ମଙ୍ଗଳବାଗ ପୋଲିସ ସ୍ପଷ୍ଟ କରିଛି । 11ତାରିଖରୁ ନିଖୋଜ ଥିଲେ ରାଜଶ୍ରୀ ।
ସୂଚନା ଯୋଗ୍ୟଯେ ରାଜଶ୍ରୀଙ୍କ ନିଖୋଜ ନେଇ ମଙ୍ଗଳବାଗ ଥାନାରେ ଏତଲା ଦେଇଥିଲେ ମହିଳା କୋଚ। ରାଜଶ୍ରୀଙ୍କ ମୁଣ୍ଡ ଏବଂ ମୁହଁରେ କ୍ଷତ ଚିହ୍ନ ରହିଛି । ତାଙ୍କ ବାପା ଓ ଭଉଣୀ ହତ୍ୟା ବୋଲି ଅଭିଯୋଗ ଆଣିଛନ୍ତି। ରାଜଶ୍ରୀଙ୍କୁ ମାରି ଟାଙ୍ଗି ଦେଇଥିବା ବୋଲି ବାପା କହିଛନ୍ତି । ରାଜଶ୍ରୀଙ୍କ ଘର ପୁରୀ ଜିଲ୍ଲା କାକଟପୁର ନିର୍ବାଚନ ମଣ୍ଡଳୀ ରାମଚଣ୍ଡୀ ଭୁଆଁରେ ।
ଇଟିଭି ଭାରତ, ଭୁବନେଶ୍ବର
