ଭୁବନେଶ୍ବର: ଆଜି ବିଧାନସଭାରେ (Winter Session of Odisha Assembly) ପୁଣି ଥରେ ଜୋର ଧରିଥିଲା ଚାଷୀ ପ୍ରସଙ୍ଗ । ଏମଏସପି ଓ ଫସଲ ବୀମାକୁ ନେଇ ମୁଖ୍ୟମନ୍ତ୍ରୀ ସର୍ବଦଳୀୟ ବୈଠକ ଡାକିବାକୁ ଦାବି କରିଥିଲେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର । ନରସିଂହ କହିଛନ୍ତି, ମୁଖ୍ୟମନ୍ତ୍ରୀ ସର୍ବଦଳୀୟ ବୈଠକ ଡାକନ୍ତୁ, ଆଲୋଚନା କରାଯାଉ ଆଇନ ଅଣାଯାଉ, ଚାଷୀଙ୍କ ଦାବି ମାନିଲେ ସମସ୍ୟାର ସମାଧାନ ହୋଇଯିବ ।
ବିଜେପିକୁ ଟାର୍ଗେଟ କରି ନରସିଂହ କହିଛନ୍ତି ସେମାନଙ୍କର ଅସଲ ମୁଖା ଖୋଲିଯାଇଛି । ଲଗାତାର ଚାଷୀ ପାଇଁ ହୋ ହାଲ୍ଲା କରୁଥିଲେ । କିନ୍ତୁ ମୁଲତବୀ ଦେଉଛନ୍ତି ଆତ୍ମହତ୍ୟା ଘଟଣା ଉପରେ । ଆଜି ଚାଷୀଙ୍କ ପ୍ରସଙ୍ଗ ନେଇ ଆମର ମୁଲତବୀ ପ୍ରସ୍ତାବ ଥିଲା । ଏଥିରେ ଆଲୋଚନା ନ କରି ମନ୍ତ୍ରୀ ନଥିବା ଆଳ ଦେଖାଇ ବିଜେପି ବିଧାୟକ ଧାରଣା ଦେଲେ । ସବୁ ସ୍ଥାନରେ ଫସଲ ବୀମାର ଆବଶ୍ୟକତା ଅଛି । କିନ୍ତୁ କେନ୍ଦ୍ରମନ୍ତ୍ରୀ ତିନୋଟି ବ୍ଲକ କଥା ଲେଖିଲେ । ଯାହା କେବଳ ପଦ୍ମପୁର ଉପନିର୍ବାଚନ ପାଇଁ ଉଦିଷ୍ଟ । ନିୟମ ଅଛି ଯେ ଚାଷୀ ଯଦି ଠିକ ମୂଲ୍ୟରେ ଧାନ ବିକି ପାରୁନି, ତେବେ FCI କିଣିବ । ହେଲେ ରାଜ୍ୟ ସରକାର FCIର ଏଜେଣ୍ଟ ପାଲଟିଛନ୍ତି । ବିଜେପି-ବିଜେଡି ଭିତିରି ସମ୍ପର୍କ ଅଛି ବୋଲି ଅଭିଯୋଗ ଆଣିଛନ୍ତି ନରସିଂହ ।
ସେପଟେ ବିଜେପି ବିଧାୟକ ତଥା ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ କହିଛନ୍ତି, "ସମବାୟ ବିଭାଗ ମନ୍ତ୍ରୀ ଉତ୍ତର ଦେବା କଥା କିନ୍ତୁ ଉତ୍ତର ରଖିଲେ ଜଙ୍ଗଲ ମନ୍ତ୍ରୀ । ଆଜି 21 ମନ୍ତ୍ରୀରୁ 17 ରୁ 18 ମନ୍ତ୍ରୀ ଗୃହରେ ଅନୁପସ୍ଥିତ ଅଛନ୍ତି । ବାଚସ୍ପତି ଏହାର ମଧ୍ୟ ଯଥାର୍ଥ ଉତ୍ତର ଦେଇପାରିଲେନାହିଁ । ଏହା ଏକ ନିର୍ଲଜ ସରକାର ।" ରାଜ୍ୟ ସରକାର ପାଇଁ ବିଧାନସଭା ବଡ଼ ନା ପଦ୍ମପୁର ଉପ ନିର୍ବାଚନ ବଡ଼ ବୋଲି ପ୍ରଶ୍ନ କରିଛନ୍ତି ମୋହନ । ସେ କହିଛନ୍ତି, ଚାଷୀଙ୍କ ପାଇଁ ରାଜ୍ୟ ସରକାରଙ୍କ ଆନ୍ତରିକତା ନାହିଁ ।
ଏହାବି ପଢନ୍ତୁ- Odisha Assembly: ଗୃହରେ ଦେଓମାଳି ତାତି, କାହିଁକି ମିଳିନାହିଁ ପର୍ଯ୍ୟଟନ ମାନ୍ୟତା
ଅନ୍ୟପକ୍ଷରେ ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ଅମାତ କହିଛନ୍ତି, "ଧାନ ସଂଗ୍ରହରେ ସ୍ୱଚ୍ଛତା ପାଇଁ ଟୋକନ ବ୍ୟବସ୍ଥା କରାଯାଇଛି । ଅନ ଲାଇନରେ ଟଙ୍କା ଦିଆଯାଉଛି । ଚାଷ ଜମିରେ ଫସଲର ବାସ୍ତବତା ଜାଣିବା ପାଇଁ ସାଟେଲାଇଟର ସହାୟତା ନିଆଯାଇଛି । ଜିଲ୍ଲାପାଳଙ୍କ ରିପୋର୍ଟ ଆଧାରରେ ଇନପୁଟ ସବସିଡି ବ୍ୟବସ୍ଥା କରାଯାଇଛି । Crop cutting experimentକୁ ନେଇ ବୀମା କମ୍ପାନୀ ମାନେ ଆପତ୍ତି ଉଠାଇଥିବାରୁ ଫସଲବୀମା ଯୋଜନାରେ ସହାୟତା ଦେବାରେ ବିଳମ୍ବ ହେଲା ।
ସେ ଆହୁରି ମଧ୍ୟ କହିଛନ୍ତି ଯେ, "ପ୍ରଧାନମନ୍ତ୍ରୀ ଓ କେନ୍ଦ୍ରମନ୍ତ୍ରୀଙ୍କୁ ରାଜ୍ୟ ସରକାରଙ୍କ ପକ୍ଷରୁ 15 ଥର ଚିଠି ଲେଖାଯାଇଛି । ଧାନର ସହାୟକ ମୂଲ୍ୟ ବୃଦ୍ଧି ନେଇ ଚିଠି ଲେଖାଯାଇଛି । ହେଲେ କେନ୍ଦ୍ର ସରକାର କର୍ଣ୍ଣପାତ କରୁନାହାନ୍ତି ।" ଧାନର ସର୍ବନିମ୍ନ ସହାୟକ ମୂଲ୍ୟ 2930 ଟଙ୍କା କଲେନାହିଁ କାହିଁକି ବୋଲି ସେ ପ୍ରଶ୍ନ କରିଛନ୍ତି ।
ଏହାବି ପଢନ୍ତୁ- ପର୍ଯ୍ୟଟକଙ୍କ ପାଇଁ ଖୁସି ଖବର, ଡିସେମ୍ବର 1ରୁ କୋରାପୁଟରେ ଇକୋ ରିଟ୍ରିର ଶୁଭାରମ୍ଭ
ଅନ୍ୟପଟେ ଆସନ୍ତାକାଲି କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ରସିଂ ତୋମାର ଓଡିଶା ଗସ୍ତରେ ଆସୁଛନ୍ତି । ଓଡିଶାରୁ ଫେରିବା ପୂର୍ବରୁ ଧାନ ସହାୟକ ମୁଲ୍ୟ 3300 ଟଙ୍କା କରିବାକୁ ଘୋଷଣା କରନ୍ତୁ ବୋଲି ସେ ଦାବି କରିଛନ୍ତି ।
ଭବାନୀ ଶଙ୍କର ଦାସ ଓ ଲାଲମୋହନ ପଣ୍ଡା, ଇଟିଭି ଭାରତ, ଭୁବନେଶ୍ବର
