ଖୋର୍ଦ୍ଧା: ନିଜ କବଲା ରାସ୍ତାକୁ ବାଡପକାଇ ଅବରୋଧ କଲେ ଗ୍ରାମବାସୀ । ସାରୁଅ ଶିଳ୍ପାଞ୍ଚଳରେ ଘରୋଇ ଜମି ଜାଲିଆତି ବିରୁଦ୍ଧରେ ଆସିଥିବା ଅଭିଯୋଗ ପରେ ଷଷ୍ଠଦିନରେ ପ୍ରଶାସନ ପକ୍ଷରୁ ଜମି ମାପଚୁପ ଜାରି ରହିଛି ।
ଆଜି ଜିଲ୍ଲା ପ୍ରଶାସନ ପକ୍ଷରୁ ଦୁଇଟି ଟିମ୍ ପୃଥକ ପୃଥକ ସ୍ଥାନରେ ମାପଚୁପ କରିଛନ୍ତି । ବେଗୁନିଆ ତହସିଲଦାର, ଆର୍ଆଇ ଓ ଅମିନ ଉପସ୍ଥିତ ରହି ନକ୍ସା ଓ ଅଭିଯୋଗ ଆଧାରରେ ଜବରଦଖଲ ହୋଇଥିବା ଜମି ଚିହ୍ନଟ କରାଯିବା ସହିତ ଗୋଚର ଜମିକୁ ଚିହ୍ନଟ କରିଛନ୍ତି । ଅନ୍ୟପଟେ ଆଜି ଗ୍ରାମର ସନାତନ ପାହାଡାସିଂ ନିଜ ଜମିରେ ବାଡ କରିବାରୁ ଗ୍ରାମ ପୋଖରୀକୁ ଯବାକୁ ଥିବା ଏକମାତ୍ର ରାସ୍ତା ବନ୍ଦ ହୋଇଛି । ଘରୋଇ ଚ୍ୟାନେଲ ପକ୍ଷରୁ ପୋଖରୀକୁ ବାଟଛଡା ଯାଇଥିବା ଘୋଷଣା ପରେ ସନାତନ ଏପରି କରିଥିବା କହିଛନ୍ତି ।
ସେପଟେ ପୂର୍ବରୁ ଅଭିଯୋଗ କରିଥିବା ଜଳଧର ମହାଭୋଇ ଗୁରୁବାର ନୋଟିସ ପାଇଥିଲେ ମଧ୍ୟ ଆଜି ଦିନ ତମାମ ପ୍ରଶାସନ ଅପେକ୍ଷାରେ ରହିଥିବାର କହିଛନ୍ତି । ତେବେ ଗ୍ରାମରେ ଥିବା ଜବରଦଖଲକୁ ମୁକ୍ତ କରିବାକୁ ପ୍ରଶାସନ ପାଖରେ ଦାବି ରଖିଛନ୍ତି ଗ୍ରାମବାସୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
