ଖୋର୍ଦ୍ଧା: ମୁକ୍ତା ଯୋଜନାରେ ମହାଦୁର୍ନୀତି । ନିମ୍ନମାନର କାର୍ଯ୍ୟ କରି ଟଙ୍କା ଆତ୍ମସାତ କରାଯାଉଛି । ସ୍ୱୟଂସହାୟକ ଗୋଷ୍ଠୀକୁ ମୋହୋରା କରାଯାଇ ଅସାଧୁ କର୍ମଚାରୀଙ୍କ ସହିତ ଠିକାଦାରଙ୍କ ମିଲି ଭଗତରେ କୋଟିକୋଟି ଟଙ୍କା ଚଳୁ କରିନେଇଥିବା ଅଭିଯୋଗ କରିଛନ୍ତି ଖୋର୍ଦ୍ଧାବାସୀ । ଖୋର୍ଦ୍ଧା ପୌରପରିଷଦର ଉନ୍ନତି ପାଇଁ 5 କୋଟିରୁ ଊର୍ଦ୍ଧ୍ବ ଟଙ୍କା ଆସିଥିବା ବେଳେ ନିମ୍ନମାନର କାର୍ଯ୍ୟ କରାଯାଇ ଟଙ୍କା ଆତ୍ମସାତ କରାଯାଇଛି ।
ଏହା ବି ପଢ଼ନ୍ତୁ- Budget Session: ଶୂନ୍ୟକାଳରେ ଉଠିଲା ମହାନଦୀ ଜଳ ସଙ୍କଟ ପ୍ରସଙ୍ଗ, ବିବୃତ୍ତି ରଖିବାକୁ ଦାବି କଲେ ବିରୋଧୀ
ମୁକ୍ତା ଯୋଜନା ମାଧ୍ୟମରେ ସହରର ଅନେକ ଛୋଟ ବଡ଼ କାର୍ଯ୍ୟ କରିବାପାଇଁ କୋଟିକୋଟି ଟଙ୍କା ପ୍ରଦାନ କରାଯାଉଛି । ସେହିଭଳି ଖୋର୍ଦ୍ଧା ସହରର ବିକାଶ କରିବା ପାଇଁ ରାଜ୍ୟ ସରକାର 5 କୋଟିରୁ ଉର୍ଦ୍ଧ୍ବ ଟଙ୍କା ପ୍ରଦାନ କରିଥିଲେ । ଏହି ଅର୍ଥରେ ସହରରେ 10ଟି ପ୍ରକଳ୍ପ କାର୍ଯ୍ୟ କରାଯାଇଛି । 145ଟି ବର୍ଷା ଜଳ ଅମଳ ପ୍ରକଳ୍ପରେ ଖର୍ଚ୍ଚ ହୋଇଛି 1 କୋଟି 13 ଲକ୍ଷ , 7ଟି ମିନି ପାର୍କରେ ଖର୍ଚ୍ଚ ହୋଇଛି 91 ଲକ୍ଷ, 6ଟି ଓପନ ଜିମ୍ରେ 40 ଲକ୍ଷ , 5ଟି ଶିଶୁ ଉଦ୍ୟାନରେ 35 ଲକ୍ଷ , 4ଟି ଖେଳ ପଡିଆରେ 34 ଲକ୍ଷ, ବୃକ୍ଷ ରୋପଣରେ 19 ଲକ୍ଷ, 4ଟି ଭେଣ୍ଡିଂ ଜୋନରେ 56 ଲକ୍ଷ, 5ଟି ସରକାରୀ ଜାଗାର ଉନ୍ନତିକରଣରେ 27 ଲକ୍ଷ , 6ଟି ପରିଶ୍ରାଗାରରେ 14 ଲକ୍ଷ , ଗୋଟିଏ ଚେକ ଟାଇଲ ରାସ୍ତାରେ 5ଲକ୍ଷ । ଏହି କାର୍ଯ୍ୟ ଗୁଡିକୁ ସ୍ଥାନୀୟ ଅଞ୍ଚଳରେ ଥିବା ସ୍ୱୟଂସହାୟକ ଗୋଷ୍ଠୀମାନେ କରିବେ ଏବଂ ଏହାର ତଦାରଖ ଦାୟିତ୍ବ ପୌରପରିଷଦର ଅଧିକାରୀଙ୍କ ହାତରେ ରହିଛି ।
କିନ୍ତୁ ଏଭଳି କରାନଯାଇ ପୌରପରିଷଦର କିଛି ଅସାଧୁ କର୍ମଚାରୀ ଏବଂ କିଛି ଠିକାଦାରଙ୍କ ମିଲିଭଗତରେ ସ୍ୱୟଂସହାୟକ ଗୋଷ୍ଠୀ ମାନଙ୍କ ନାମରେ କାର୍ଯ୍ୟ ଅଣାଯାଇ ଅତି ନିମ୍ନ ମାନର କାମ କରାଯାଉଛି । ବିଭିନ୍ନ ସ୍ଥାନରେ କାର୍ଯ୍ୟ ହୋଇନଥିଲେ ମଧ୍ୟ ଫଳକ ଲାଗିଛି, ଆଉ କିଛି କିଛି ସ୍ଥାନରେ କାର୍ଯ୍ୟ ହୋଇଥିଲେ ବି ଫଳକ ନାହିଁ । ଏହାକୁ ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି ଓ ଘଟଣାର ଭିଜିଲାନ୍ସ ତଦନ୍ତ ଦାବି କରିଛନ୍ତି । ସେପଟେ ସହରବାସୀଙ୍କ ଅଭିଯୋଗ ସମ୍ପର୍କରେ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ କିମ୍ବା ପୌର ପରିଷଦ ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରି ନାହିଁ ।
ଇଟିଭି ଭାରତ, ଖୋର୍ଦ୍ଧା
