ଭୁବନେଶ୍ବର: ଉତ୍ତରପ୍ରଦେଶରେ ୯ ହଜାର ଟଙ୍କା ପାଇଁ ବନ୍ଧା ପଡ଼ିଥିଲେ ୨ ଓଡିଆ ଯୁବତୀ । ସାମାଜିକ କର୍ମୀଙ୍କ ସହାୟତାରେ ଉତ୍ତରପ୍ରଦେଶରେ ଥିବା ଓଡ଼ିଆ ଦଲାଲ କବଳରୁ ମିଳିଲା ମୁକ୍ତି । ଓଡ଼ିଶା ଫେରିଲେ କଳାହାଣ୍ଡି ଓ କନ୍ଧମାଳର ୨ ଝିଅ । ବନ୍ଧକ ରଖିଥିବା ଦଲାଲକୁ ଗିରଫ କଲା ୟୁପି ପୋଲିସ ।
ସୂଚନା ମୁତାବକ ଗତ ଅକ୍ଟୋବର ୩୦ ତାରିଖରେ କନ୍ଧମାଳ ଓ କଳାହାଣ୍ଡିର ଦୁଇ ଝିଅଙ୍କୁ ଇଭେଣ୍ଟ ସଂସ୍ଥାରେ କାମ ଦେବ କହି ନେଇଥିଲା ଜଣେ ଦଲାଲ । ପରେ ୯ ହଜାର ଆଡଭାନ୍ସ ଦେଇ ସେଠାରେ କିଛି ବିବାହ ଓ ଜନ୍ମଦିନ ପାର୍ଟିରେ କାମ ଦେଇଥିଲା । ହେଲେ ତାର କିଛିଦିନ ପରେ ଉତ୍ତରପ୍ରଦେଶର ଏକ ପେଣ୍ଡାଲରେ ଅଶ୍ଳୀଳ ନୃତ୍ୟ ପାଇଁ ବାଧ୍ୟ କରାଇଥିଲା । ଏନେଇ ରାଜି ନହେବାରୁ ୯ ହଜାର ଟଙ୍କା ନେଇଛ କୁଆଡେ ଯାଇପାରିବନି କହି ବନ୍ଧକ ରଖିଥିଲା । ଏପରିକି ଗତ ଡିସେମ୍ବର ୧ ତାରିଖରେ ଫେରିବାକୁ କହିଥିଲେ ମଧ୍ୟ ସେଠାରେ ନଜରବନ୍ଦୀ କରି ରଖିଥିଲା ।
ଏହାପରେ ଦୁଇ ଓଡିଆ ଯୁବତୀ ଭିଡିଓ ଜରିଆରେ ସାହାଯ୍ୟ ମାଗିଥିଲେ । ଏନେଇ ଜଣେ ସାମାଜିକ କର୍ମୀ ସୁଚିସ୍ମିତା ପୃଷ୍ଟି ନୟାପଲ୍ଲୀ ଥାନାରେ ତିନି ଦିନ ପୂର୍ବେ ଜଣାଇଥିଲେ । ଶେଷରେ ପୋଲିସ ଜରିଆରେ ଉତ୍ତରପ୍ରଦେଶ ପୋଲିସ ସହାୟତାରେ ଦୁଇ ଯୁବତୀଙ୍କୁ ଲକ୍ଷ୍ନୌ ଅଞ୍ଚଳରୁ ଉଦ୍ଧାର କରାଯାଇଥିଲା । ଦୁଇ ଯୁବତୀ ଏବେ ଓଡ଼ିଶାରେ ପହଞ୍ଚିଛନ୍ତି । ଓଡ଼ିଶା ଆସିବା ପରେ ସେମାନେ ବଖାଣିଛନ୍ତି ଦଲାଲ କବଳରେ ଥିବା ସେହି କଳା କହାଣୀର କାରନାମା ।
ଇଟିଭି ଭାରତ, ଭୁବନେଶ୍ବର
