ଭୁବେନଶ୍ବର: ରାଜ୍ୟଠୁ ନେଇ ଦେଶ ସ୍ତବ୍ଧ । ଏ କଣ ହୋଇଗଲା । ଜଣେ ସ୍ବାସ୍ଥ୍ୟମନ୍ତ୍ରୀଙ୍କୁ ପୋଲିସ ସୁରକ୍ଷା ଭିତରେ ଗୁଳି କରି ହତ୍ୟା କରାଯାଇଛି । ସେ ପୁଣି ଜଣେ ପୋଲିସକର୍ମୀ ମନ୍ତ୍ରୀଙ୍କୁ ଗୁଳି କରିଛନ୍ତି । ରକ୍ଷକ ହୋଇ ଭକ୍ଷକ ସାଜିଛନ୍ତି ପୋଲିସକର୍ମୀ । ଖାକିରେ ଦାଗ ଲଗାଇଛନ୍ତି । ଏହି ଘଟଣାକୁ କେହି ଗ୍ରହଣ କରି ପାରୁନାହାନ୍ତି । ରାଜ୍ୟ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କୁ ପୋଲିସକର୍ମୀ ଗୁଳି କରିଛନ୍ତି । ଝାରସୁଗୁଡାରେ ଏକ କାର୍ଯ୍ୟକ୍ରମକୁ ଯାଉଥିବାବେଳେ ତାଙ୍କ ଛାତିକୁ ଗୁଳି କରିଥିଲେ ଜଣେ ପୋଲିସ ଏଏସଆଇ । ଏଥିରେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଛନ୍ତି ସ୍ବାସ୍ଥ୍ୟମନ୍ତ୍ରୀ ନବ ଦାସ । ଏ ଘଟଣା ସମସ୍ତଙ୍କୁ ସ୍ତବ୍ଧ କରିଛି । ଦେଶକୁ ଦୋହଲାଇ ଦେଇଛି । ଖାଲି ନବ କିଶୋର ନୁହେଁ ରାଜ୍ୟରେ ପୂର୍ବରୁ ମଧ୍ୟ ବହୁ ନେତାମନ୍ତ୍ରୀଙ୍କୁ ଆକ୍ରମଣ ହୋଇଥିଲା । କିଏ ଦୁନିଆ ଛାଡି ଚାଲିଯାଛନ୍ତି ତ ଆଉ କେହି ମୃୃତ୍ୟୁକୁ ମାତ ଦେଇ ବଞ୍ଚିଯାଇଥିଲେ । ନବ ଦାସଙ୍କ ସମେତ ରାଜ୍ୟରେ ପୂର୍ବରୁ ଆଉ 6 ଜଣ ନେତାଙ୍କୁ ଗୁଳିମାଡ ହୋଇଥିଲା । ନବ କିଶୋର ଦାସଙ୍କୁ ଗୁଳିମାଡ ଘଟଣା ଆଜି ସେହି ପୁରୁଣା ଘଟଣାକୁ ମନେ ପକାଇ ଦେଇଛି । ଜାଣନ୍ତୁ ପୂର୍ବରୁ ଘଟିଥିବା କିଛି ଗୁଳିମାଡ ଘଟଣା ବିଷୟରେ ।
ମହେଶ୍ବର ମହାନ୍ତି:- ପୁରୀ ବିଧାୟକ ଥିବାବେଳେ ମହେଶ୍ବର ମହାନ୍ତିଙ୍କ ଉପରକୁ ଗୁଳି ଚାଳନା କରାଯାଇଥିଲା । ମହେଶ୍ବର ମହାନ୍ତି ଆଇନ ବିଭାଗ ମନ୍ତ୍ରୀ ସହ ପର୍ଯ୍ୟଟନ ସଂସ୍କୃତି ମନ୍ତ୍ରୀ ଥିଲେ । 2014 ମସିହା ଫେବ୍ରୃଆରୀ 22 ତାରିଖରେ ତାଙ୍କ ଘରଠାରୁ କିଛି ବାଟ ଦୂରରେ ତାଙ୍କ ଉପରକ ଗୁଳିମାଡ କରିଥିଲେ ଦୁର୍ବୃତ୍ତ । ଏକ ବିବାହ କାର୍ଯ୍ୟକ୍ରମ ସାରି ଫେରୁଥିବାବେଳେ କିଛି ଦୁର୍ବୃତ୍ତ ତାଙ୍କ ଉପରକୁ ଆଖିବୁଜା ଗୁଳିମାଡ କରିଥିଲେ । 3 ରାଉଣ୍ଡ ଗୁଳିରୁ ଗୋଟିଏ ଗୁଳି ତାଙ୍କ ପେଟ ଓ ଅନ୍ୟଟି ଛାତିରେ ବାଜିଥିଲା । ଚିକିତ୍ସା ପରେ ମହେଶ୍ବର ମହାନ୍ତି ସୁସ୍ଥ ହୋଇଥିଲେ । ଘଟଣାରେ ପୋଲିସ 3 ଜଣଙ୍କୁ ଗିରଫ କରିଥିଲା । ଏହା ରାଜନୈତିକ ଶତ୍ରୁତା ପାଇଁ ହୋଇଥିବା ପୋଲିସ ପକ୍ଷରୁ ସୂଚନା ମିଳିଥିଲା ।
ସୁଦାମ ମାରାଣ୍ଡି:- ବର୍ତ୍ତମାନର ବରିଷ୍ଠ ବିଜେଡି ନେତାଙ୍କୁ ସୁଦାମ ମାରଣ୍ଡି ମଧ୍ୟ ଆକ୍ରମଣର ଶିକାର ହୋଇଥିଲେ । ଜେଏମଏମ ଦଳରେ ଥିବା ସମୟରେ ସୁଦାମ ମାରାଣ୍ଡିଙ୍କ ଉପରକୁ ଗୁଳିମାଡ ହୋଇଥିଲା । ଏକ ଫୁଟବଲ ମ୍ୟାଚରେ ଅତିଥି ଭାବେ ଯୋଗ ଦେବାକୁ ମୟୂରଭଞ୍ଜର ଏକ ଆଦିବାସୀ ଇଲାକା ତଥା ପାଣ୍ଡବ ଗାଁକୁ ଯାଇଥିଲେ ସୁଦାମ ମାରଣ୍ଡି । 2009 ଅକ୍ଟୋବର 13 ତାରିଖରେ ନକ୍ସଲ ତାଙ୍କ ଉପରକୁ ଆକ୍ରମଣ କରିଥିଲେ । ଏହା ପଛରେ ନକ୍ସଲଙ୍କ ହାତ ଥିବା କୁହାଯାଇଥିଲା । ସୌଭାଗ୍ୟବସତଃ ବଞ୍ଚି ଯାଇଥିଲେ ସୁଦାମ ମାରାଣ୍ଡି । କିନ୍ତୁ 3 ଜଣ ଯବାନ ନକ୍ସଲଙ୍କ ଗୁଳିରେ ଶହୀଦ ହୋଇଥିଲେ ।
ଜଗବନ୍ଧୁ ମାଝୀ:- ଲାଲବାହିନୀର ଗୁଳିମାଡରେ ଟଳି ପଡିଥିଲେ ବିଜେଡି ବିଧାୟକ ଜଗବନ୍ଧୁ ମାଝୀ । ନବରଙ୍ଗପୁର ଜିଲ୍ଲା ଉମରକୋଟର ବିଧାୟକ ଥିଲେ ଜଗବନ୍ଧୁ । 2011 ମସିହା ସେପ୍ଟେମ୍ବର 11 ତାରିଖରେ କିଛି ମାଓବାଦୀଙ୍କ ଗୁଳିରେ ଟଳି ପଡିଥିଲେ ସେ । ଘଟଣା ଦିନ ଏକ ଜଙ୍ଗଲ ଜମି ପଟ୍ଟା ବଣ୍ଟନ କାର୍ଯ୍ୟକ୍ରମ ଥିଲା । 3 ଦୁର୍ବୃତ୍ତ ବାଇକରେ ଆସି ପ୍ରଥମେ ଜଗବନ୍ଧୁଙ୍କ ପିଏସଓ ପରେ ଜଗବନ୍ଧୁଙ୍କ ଉପରକୁ ଗୁଳିମାଡ କରିଥିଲେ । ଏଥିରେ ଘଟଣାସ୍ଥଳରେ ଜଗବନ୍ଧୁଙ୍କ ପିଏସଓଙ୍କ ମୃତ୍ୟୁ ହୋଇଥିଲା । ପରେ ରାଇଘର ହସ୍ପିଟାଲରେ ଜଗବନ୍ଧୁଙ୍କ ଦେହାନ୍ତ ହୋଇଥିଲା ।
ଅଭିମନ୍ୟୁ ସାହୁ:- ବର୍ତ୍ତମାନର ମନ୍ତ୍ରୀ ଥିବା ଟୁକୁନି ସାହୁଙ୍କ ସ୍ବାମୀଙ୍କୁ ମଧ୍ୟ ହତ୍ୟା କରାଯାଇଥିଲା । 2013 ଡିସେମ୍ବର 15 ତାରିଖରେ ଧାରୁଆ ଅସ୍ତ୍ରରେ ହାଣି ତାଙ୍କୁ ହତ୍ୟା କରିଥିଲେ କିଛି ଦୁର୍ବୃତ୍ତ । ମର୍ଣ୍ଣିଂୱାର୍କରେ ଯାଉଥିବାବେଳେ ତାଙ୍କୁ ଆକ୍ରମଣ ହୋଇଥିଲା । ଏହାପଛରେ ବ୍ୟବସାୟିକ ଶତ୍ରୁତା ଥିବା କୁହାଯାଉଥିଲା । ଟିଟିଲାଗଡରେ ଜଣେ ଟାଣୁଆ ଯୁବ ବିଜେଡି ନେତା ଥିଲେ ଅଭିମନ୍ୟୁ ସାହୁ । ସେହି ଆକ୍ରମଣରେ ଆଖି ବୁଜିଥିଲେ ଅଭିମନ୍ୟୁ ।
ଧନୁର୍ଜୟ ସିଦ୍ଧୁ:- ପୂର୍ବତନ କଂଗ୍ରେସ ବିଧାୟକ ଧନୁର୍ଜୟ ସିଦ୍ଧୁଙ୍କୁ ଉପରକୁ ମଧ୍ୟ ହୋଇଥିଲା ଅତର୍କିତ ଆକ୍ରମଣ । 2007 ଫେବୃଆରୀ 26 ତାରିଖରେ କେନ୍ଦୁଝର ବଡବିଲ ନିକଟରେ ତାଙ୍କୁ ଗୁଳି କରାଯାଇଥିଲା । ସେତେବେଳ ଚମ୍ପୁଆ ବିଧାୟକ ଥିଲେ ଧନୁର୍ଜୟ । ଗାଡିରେ ଯାଉଥିବାବେଳେ ଗାଡିରେ କିଛି ଦୁର୍ବୃତ୍ତ ଆସି ତାଙ୍କ ଉପରକୁ ଗୁଳି ଚଳାଇଥିଲେ । ସୌଭାଗ୍ୟବସତଃ ବର୍ତ୍ତି ଯାଇଥିଲେ ଧନୁର୍ଜୟ ସିଦ୍ଧୁ ।
ନବ କିଶୋର ଦାସ:- 2023 ମସିହା ଜାନୁଆରୀ 29 ତାରିଖ । ସମୟ ପାଖାପାଖି ଅପରାହ୍ନ 12ଟା 30 । ବିଜୁଳି ବେଗରେ ଖବର ବ୍ୟାପି ଯାଇଥିଲା ରାଜ୍ୟ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କୁ ଗୁଳିମାଡ ହୋଇଛି । ଝାରସୁଗୁଡାରେ ଏକ କାର୍ଯ୍ୟକ୍ରମରେ ଯୋଗ ଦେବାକୁ ଯାଉଥିବା ବେଳେ ଜଣେ ପୋଲିସ ଏଏସଆଇ ତାଙ୍କ ଉପରକୁ ଗୁଳିମାଡ କରିଥିଲେ । ତୁରନ୍ତ ତାଙ୍କୁ ଭୁବନେଶ୍ବର ଆପୋଲ ହସ୍ପିଟାଲକୁ ଏୟାରଲିପ୍ଟ କରାଯାଇଥିଲା । ଭଗବାନଙ୍କ ନିୟମ ବୋଧେ କିଛି ଅଲଗା ଥିଲା । ଡାକ୍ତରଙ୍କ ସମସ୍ତ ଚେଷ୍ଟା ସତ୍ତ୍ବେ ରାତି ପ୍ରାୟ 7ଟା 30ରେ ଦୁନିଆକୁ ଅଲବିଦା କହିଥିଲେ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ ।
ଜୀବନରେ ମୃତ୍ୟୁ ସତ୍ୟ । ହେଲେ ମୃତ୍ୟୁ ଯେତେବେଳେ ଅଚାନକ ଆସେ ତାହା ମର୍ମାହତ କରିଥାଏ । ରାଜ୍ୟରେ ଆଇନ ବ୍ୟବସ୍ଥା ଢିଲା ପାଇଁ ଅଦିନରେ ଅନେକ ଜୀବନ ଚାଲିଯାଉଛି । ଦିନ ଦ୍ବିପ୍ରହରରେ କଡା ସୁରକ୍ଷା ଭିତରେ ଜଣେ ମନ୍ତ୍ରୀଙ୍କୁ ଗୁଳିମାଡ ହେଉଛି । ସେ ପୁଣି ଜଣେ ପୋଲିସକର୍ମୀ ମନ୍ତ୍ରୀଙ୍କୁ ଗୁଳିମାଡ କରିଛନ୍ତି । ସେ କାରଣ ରାଜନୈତିକ ହେଉ କି ବ୍ୟକ୍ତିଗତ କ୍ଷତି ତ ସେହି ପରିବାର ସହୁଛି ଯିଏ ନିଜ ଆତ୍ମୀୟଙ୍କୁ ହରାଉଛି । ପିଲାଙ୍କ ମୁଣ୍ଡ ଉପରୁ ବାପାଙ୍କ ହାତ ଉଠିଯାଇଛି । ଯେଉଁଠି ମନ୍ତ୍ରୀ ସୁରକ୍ଷିତ ନୁହନ୍ତି ସେଠି ସାଧାରଣ ମଣିଷଙ୍କ ସୁରକ୍ଷା ଉପରେ ପ୍ରଶ୍ନ ଉଠିଛି ।
ଇଟିଭି ଭାରତ, ଭୁବନେଶ୍ବର
