ଖୋର୍ଦ୍ଧା: ଚୋରା କାଠ ଚାଲାଣ ସନ୍ଦେହରେ ବାଣପୁର ବନବିଭାଗ ଅଟକ ରଖିଥିବା ଜଣେ ବ୍ୟକ୍ତିଙ୍କର ସନ୍ଦେହଜନକ ମୃତ୍ୟୁ ହୋଇଛି । ଘଟଣାରେ ପରିବାର ଲୋକ ବ୍ୟକ୍ତିଙ୍କୁ ପିଟିପିଟି ମାରିଦେବା ଅଭିଯୋଗ କରି ମେଡିକାଲ ଆଗରେ ଧାରଣା ଦେଇଛନ୍ତି ।
ସୂଚନାଅନୁସାରେ ଖୋର୍ଦ୍ଧା ବନ ବିଭାଗ ଚୋରା କାଠ ଚାଲାଣ ସନ୍ଦେହରେ ଜଣେ ବ୍ୟକ୍ତିଙ୍କୁ ହେପାଜତରେ ନେଇଥିଲା । ଉକ୍ତ ବ୍ୟକ୍ତିଙ୍କର ବୁଧବାର ସନ୍ଦେହଜନକ ମୃତ୍ୟୁ ହୋଇଛି । ବ୍ୟକ୍ତି ଜଣକ ହେଲେ ନୟାଗଡ ଜିଲ୍ଲା ଶରଣକୂଳ ଥାନା ଅନ୍ତର୍ଗତ ଗୋଲଗାଁର ବଳଭଦ୍ର ବେହେରା । ବଳଭଦ୍ରଙ୍କୁ ବନ ବିଭାଗ କର୍ମଚାରୀ ପିଟିପିଟି ମାରି ଦେଇଥିବା ଅଭିଯୋଗ କରି ପରିବାର ଓ ଗ୍ରାମବାସୀଙ୍କ ପକ୍ଷରୁ ବାଣପୁର ମେଡ଼ିକାଲ ଆଗରେ ଧାରଣା ଦିଆହୋଇଛି । ଘଟଣାକୁ ନେଇ ପାଟିତୁଣ୍ଡ କରିବା ସହ କ୍ଷତିପୂରଣ ଦାବି କରିଛନ୍ତି ପରିବାର ଲୋକେ । ଗଣ୍ଡଗୋଳ ଆଶଙ୍କା ନେଇ ଘଟଣାସ୍ଥଳରେ ଖୋର୍ଦ୍ଧା ଏଚଆରପିସି ଡ଼ିଏସପି ଓମ ପ୍ରକାଶ ପାତ୍ର, ବାଲୁଗାଁ ଏସଡ଼ିପିଓ ସୁରେଶ କୁମାର ଦାସ, ବାଣପୁର ଥାନା ଅଧିକାରୀ ସଞ୍ଜୟ ପଟ୍ଟନାୟକ, ବାଣପୁର ତହସିଲଦାର ମନ୍ମଥ ବେହେରା ଉପସ୍ଥିତ ରହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
