ଭୁବନେଶ୍ବର: ଧାମନଗର ଉପନିର୍ବାଚନ (Dhamnagar ByPoll) ଲାଗି ଚାଲିଛି ଜୋରଦାର ପ୍ରଚାର । ଆସନ୍ତା 3 ତାରିଖରେ ହେବ ଭୋଟ ଗ୍ରହଣ । ତେବେ ଧାମନଗରରେ ବିଜେଡି ପାଇଁ SHG ମହିଳା ଟଙ୍କା ବାଣ୍ଟୁଥିବା ଅଭିଯୋଗ କରିଛି ବିଜେପି । ଏହି ପ୍ରସଙ୍ଗକୁ ନେଇ ଗତକାଲି (ରବିବାର) ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପିର ଏକ ପ୍ରତିନିଧି ଦଳ । ତେବେ ଏନେଇ ପ୍ରତିକ୍ରିୟା ରଖିଛନ୍ତି ରାଜ୍ୟ ବିଜେପି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ । ଲାଞ୍ଚ ଯଚା କାମ ଏବଂ ନିର୍ବାଚନ ପ୍ରକ୍ରିୟାକୁ ହଡପ କରିବା କାମ ବିଜେଡିର ଚିରାଚରିତ ଅଭ୍ୟାସ ବୋଲି ସେ କହିଛନ୍ତି ।
ବିଜେପି ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତ ସିଂହାରଙ୍କ(BJP Leader Lekhasri Samantsinghar) ନେତୃତ୍ବରେ ଏକ ପ୍ରତିନିଧି ଦଳ ଗତକାଲି (ରବିବାର) ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଧାମନଗରରେ ବିଜେଡି ପାଇଁ SHG ମହିଳା ଟଙ୍କା ବାଣ୍ଟୁଥିବା ଅଭିଯୋଗ କରିଛି । କୌଣସି କାର୍ଯ୍ୟାନୁଷ୍ଠନ ନହେଲେ ଭଦ୍ରକ ଜିଲ୍ଲାପାଳ ଓ ରାଜ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବାକୁ ଦଳ ପକ୍ଷରୁ ଚେତାବନୀ ଦିଆଯାଇଛି । ପୂର୍ବରୁ ଟଙ୍କା ବଣ୍ଟା ଅଭିଯୋଗ କରି ଧାମନଗର ସମସ୍ତ ଏସଏଚଜିଙ୍କ ବ୍ୟାଙ୍କ ଆକାଉଣ୍ଟ ଫ୍ରୀଜ ପାଇଁ ଦାବି କରିଥିଲା ବିଜେପି ।
ତେବେ ବିଜେପିର ଏଭଳି ଅଭିଯୋଗ ପରେ ପ୍ରତିକ୍ରିୟା ରଖି ଯଦି କିଛି ଭିଡିଓ ନିର୍ଦ୍ଦିଷ୍ଟ ଭାବେ ରହିଛି ତାହାର ପ୍ରମାଣ ଦିଅନ୍ତୁ ବୋଲି କହିଛନ୍ତି ବିଜେଡି ଉପସଭାପତି ଦେବୀ ମିଶ୍ର । ସେ କହିଛନ୍ତି, "ନିର୍ବାଚନ କମିଶନରଙ୍କ ନିକଟରେ ବିଭିନ୍ନ ରାଜନୈତିକ ଦଳ ପରସ୍ପର ପ୍ରତି ଦୋଷାରୋପ କରନ୍ତି । ବିଜେଡି ସେ ଦୌଡ଼ରେ ନାହିଁ । ଟଙ୍କା ଜଚା ଅଭିଯୋଗ ଭୁଲ ବୋଲି ସାଂସଦ କହିସାରିଛନ୍ତି । ଯଦି ନିର୍ଦ୍ଦିଷ୍ଟ ଭାବେ ଭିଡିଓ ଯଦି ଥିବ ସେ ପ୍ରମାଣ କରିବେ । ବିଜେଡି ଟଙ୍କା ପଇସା ଦେବାରେ ବିଶ୍ୱାସ କରେନାହିଁ । ଲୋକବଳ ଯାହାର ଅଛି, ସେ ଟଙ୍କା ଓ ପଇସା ଯାଚିବାକୁ କିଏ କାହିଁକି ଯିବ ।"
ତେବେ ଏହି ଘଟଣାରେ ପ୍ରତିକ୍ରିୟା ରଖିଛନ୍ତି ରାଜ୍ୟ ବିଜେପି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ । ସେ କହିଛନ୍ତି, "ଚିରାଚରିତ ଲାଞ୍ଚ ଯଚା କାମ ଏବଂ ନିର୍ବାଚନ ପ୍ରକ୍ରିୟାକୁ ହଡପ କରିବା କାମ ବିଜେଡ଼ି ସବୁ ନିର୍ବାଚନରେ କରେ । ଅତୀତରେ ମଧ୍ୟ ବିଭିନ୍ନ ଉପନିର୍ବାଚନରେ ବାହାରୁ ଯେଉଁ ନେତା, ମନ୍ତ୍ରୀ ଓ ବିଧାୟକ ମାନେ ଯାଆନ୍ତି । ସେମାନେ ସାଧାରଣ ଲୋକଙ୍କୁ ଧମକ ଦେବା ଠାରୁ ଆରମ୍ଭ କରି ସରକାରୀ ଯୋଜନାରେ କୋଟି କୋଟି ଟଙ୍କା ଦେଇଦେବୁ ବୋଲି କୁହନ୍ତି । ସିଆରପି ମାନଙ୍କୁ ବାଧ୍ୟ କରି SHG ଗ୍ରୁପ ମାନଙ୍କୁ ଲାଞ୍ଚ ଯାଚିବା ବିଜେଡ଼ିର ଚିରାଚରିତ ଅଭ୍ୟାସ । ଧାମନଗର ଉପନିର୍ବାଚନରେ ବ୍ୟାପକ ଟଙ୍କା କାରବାରର ଆଶଙ୍କା ସୃଷ୍ଟି ହୋଇଛି । ତେଣୁ ବିଜେପି କାର୍ଯ୍ୟକର୍ତ୍ତାଙ୍କୁ ସଜାଗ କରାଯାଇଛି । ଯେତେ ବଡ଼ ନେତା ହେଉ କି ମନ୍ତ୍ରୀ ହେଉ ଟଙ୍କା ବାଣ୍ଟିବାର ଉଦ୍ୟମ କରିବେ ସେ ନେଇ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବା ସହ ପ୍ରତିହତ କରିବା ପାଇଁ ବିଜେପି ପଦକ୍ଷେପ ନେବ ।"
ଇଟିଭି ଭାରତ, ଭୁବନେଶ୍ବର
