ଖୋର୍ଦ୍ଧା: ବେଗୁନିଆ ବ୍ଲକ କୁରାଢ଼ୀଲ ଗ୍ରାମର ରମେଶ ଦଳେଇଙ୍କ ପୁଅ ଉମାକାନ୍ତ ଦଳେଇ । ଉମାକାନ୍ତ ଜଣେ ମେଧାବୀ ଛାତ୍ର ହୋଇଥିବା ବେଳେ ଖୋର୍ଦ୍ଧା ପ୍ରାଣନାଥ ମହାବିଦ୍ୟାଳୟରେ ଯୁକ୍ତ ଦୁଇ ବିଜ୍ଞାନରେ ଶେଷ ବର୍ଷ ଛାତ୍ର । ଲକଡାଉନ ପାଇଁ ପରୀକ୍ଷା ଫଳକୁ ଅପେକ୍ଷା ନକରି ନିଜ ପାଠ ପଢା ପାଇଁ ବାପା କରିଥିବା ହାତ ଉଧାରି କରଜ ସୁଜିବା ପାଇଁ କଲମ ଛାଡି ଧରିଛନ୍ତି କୋଡ଼ି କୋଦାଳ ।
ବାପା ରମେଶ ଜଣେ ଦିନ ମଜୁରିଆ ହୋଇଥିବାରୁ ଲକଡାଉନ ପାଇଁ ଠପ ହୋଇଯାଇଛି ରୋଜଗାର । ଆଉ ପରିବାରର ଏହି ଅଭାବକୁ ବୁଝି ପାରିଛନ୍ତି ଉମାକାନ୍ତ । ଏଥିପାଇଁ ନିଜ ଗ୍ରାମର ଜଣେ ଲୋକଙ୍କ ଜମିକୁ ଭାଗରେ ଆଣି ସେଥିରେ ପରିବା ଚାଷ କରି ପରିବାରର ବୋଝ ହାଲୁକା କରିବାରେ ସହାୟକ ହୋଇଛନ୍ତି ସେ । ଉମାକାନ୍ତ ଫସଲ କରିବା ସହ ନିଜ ପାଠ ପଢ଼ିବାର ମୂଳ ଲକ୍ଷ୍ୟକୁ ମଧ୍ୟ ଭୁଲିଯାଇ ନାହାଁନ୍ତି ।
ପରିବାରର ଆର୍ଥିକ ସମସ୍ୟାକୁ ସୁଧାରିବାକୁ ପରିବା ଚାଷ କରି ପ୍ରୟାସ ଜାରି ରଖିଛନ୍ତି । ନିଜର ଜମି ଖଣ୍ଡେ ନଥିବାରୁ ଅନ୍ୟର ଜମି ଭାଗକୁ ଆଣି ସୁନାର ଫସଲ ଫଳାଇ ଅନ୍ୟପାଇଁ ସ୍ଥାନୀୟ ଅଞ୍ଚଳରେ ଉଦାହରଣ ପାଲଟିଛନ୍ତି । ସେପଟେ ଉମାକାନ୍ତଙ୍କ ଫସଲ କ୍ଷେତ ପରିଦର୍ଶନ କରି ଏଭଳି ପ୍ରୟାସକୁ ପ୍ରସଂସା କରିଛନ୍ତି ସ୍ଥାନୀୟ କୃଷି ଅଧିକାରୀ । ଉମାକାନ୍ତଙ୍କ ଏପରି ପ୍ରଚେଷ୍ଟା ସରକାରଙ୍କ ଦୃଷ୍ଟି ଆକର୍ଷଣ କରିବା ସହ କୃଷି ବିଭାଗ ପକ୍ଷରୁ ଆବଶ୍ୟକ ସହାୟତା ଯୋଗାଇ ଦେବାକୁ ମଧ୍ୟ ପ୍ରତିଶ୍ରୁତି ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
