ଖୋର୍ଦ୍ଧା : କୋରୋନା ସଂକ୍ରମଣ କମିବା ପରେ ରାଜ୍ୟରେ ଅନଲକ ପ୍ରକ୍ରିୟା ଆରମ୍ଭ ହୋଇଛି । ତେଣୁ ଖୋର୍ଦ୍ଧା ଉପଖଣ୍ଡରେ ଧର୍ମାନୁଷ୍ଠାନ ଖୋଲିବା ଲାଗି ଏକ ବୈଠକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି ।
ଉପଖଣ୍ଡରେ ଥିବା ଧାର୍ମିକ ଅନୁଷ୍ଠାନ ଗୁଡିକ ଅଗଷ୍ଟ ୯ରୁ ଖୋଲିବାକୁ ନିଷ୍ପତି ନିଆଯାଇଥିବା ପ୍ରଶାସନ ସୂଚନା ଦେଇଛି । ଧର୍ମାନୁଷ୍ଠାନ ଗୁଡିକ ସକାଳ ୬ଟାରୁ ରାତି ୮ଟା ପର୍ଯ୍ୟନ୍ତ ଖୋଲା ରହିବ । ଶ୍ରଦ୍ଧାଳୁମାନେ ସକାଳ ୬ରୁ ସନ୍ଧ୍ୟା ୬ ପର୍ଯ୍ୟନ୍ତ ଧର୍ମାନୁଷ୍ଠାନ ମାନଙ୍କରେ ଦର୍ଶନ କରିପାରିବେ । ଧର୍ମାନୁଷ୍ଠାନ ମାନଙ୍କରେ ପୂଜା ଓ ନୀତିକାନ୍ତି ପାଇଁ କେବଳ ପୂଜକ ରାତି ୮ଟା ପର୍ଯ୍ୟନ୍ତ ରହିପାରିବେ ବୋଲି ବୈଠକରେ ନିଷ୍ପତି ନିଆଯାଇଛି ।
ସେହିପରି ଧାର୍ମିକ ଅନୁଷ୍ଠାନକୁ ଶ୍ରଦ୍ଧାଳୁ ଭୋଗ ନେବେ ନାହିଁ କି ଧର୍ମାନୁଷ୍ଠାନ ମାନଙ୍କରେ ପ୍ରସାଦ ସେବନ କାର୍ଯ୍ୟ ଉପରେ ରୋକ ଲଗାଯାଇଛି । ତେବେ କୋଭିଡ ନିୟମ ପାଳନ ପୂର୍ବକ ଧର୍ମାନୁଷ୍ଠାନ ସବୁ ଖୋଲିବା ପାଇଁ ଅତିରିକ୍ତ ଜିଲ୍ଲାପାଳ କହିଛନ୍ତି । ଧର୍ମାନୁଷ୍ଠାନ ମାନଙ୍କରେ ନୋଟିସ ଲଗାଇବାକୁ ବୈଠକରେ ଆଲୋଚନା ହୋଇଥିବାବେଳେ ଧାର୍ମିକ ଅନୁଷ୍ଠାନକୁ ପ୍ରବେଶ ପୂର୍ବରୁ ଥର୍ମାଲ ସ୍କ୍ରିନିଂ କରାଯିବ, ଏଥିସହିତ ସାମାଜିକ ଦୂରତା ରଖିବା ଓ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
