ଭୁବନେଶ୍ବର: ପ୍ରଧାନମନ୍ତ୍ରୀ ଆବାସ ଯୋଜନାକୁ ନେଇ ବିଜେପି ଆସନ୍ତାକାଲି ଠାରୁ ସବୁ ବ୍ଲକରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ଦେଶ୍ୟରେ ଚେତାବନୀ ପତ୍ର ଦେବ । ୭ଦିନ ମଧ୍ୟରେ ସମସ୍ୟାର ସମାଧାନ ନହେଲେ ବାଦ ପଡିଥିବା ଯୋଗ୍ୟ ହିତାଧିକାରୀଙ୍କୁ ନେଇ ରାଜ୍ୟର ସବୁ ବ୍ଲକରେ ଆନ୍ଦୋଳନକୁ ଦଳ ଓହ୍ଲାଇବ । ଏନେଇ ଦଳ ଗତକାଲି ସୂଚନା ଦେଇଥିଲା ଦଳ । ଏହାକୁ ନେଇ ଆଜି ବିଜେପି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ ବିସ୍ତୃତ ସୂଚନା ଦେଇଛନ୍ତି ।
ପୃଥ୍ବୀରାଜ କହିଛନ୍ତି, ‘‘ଆବାସ ଯୋଜନାରେ ଅନିୟମିତତା ହେଲେ ଜିଲ୍ଲା ପ୍ରଶାସନ ଠୁ ବିଧାନସଭା ପର୍ଯ୍ୟନ୍ତ ସବୁଠି ଘେରାଉ କରିବ ଦଳ । ଯେଉଁ କ୍ରାଇଟେରିଆ କଥା ବିଜେଡି କହୁଛି ଆମେ ସରକାରଙ୍କୁ 2 ଲକ୍ଷ ଲୋକଙ୍କ ନାଁ ଦେଇ ପାରିବୁ । ଯେଉଁ ମାନେ ନିର୍ଦ୍ଧାରିତ କ୍ରାଇଟେରିଆ ଭିତରେ ଆସୁଥିଲେ ସରକାର ତାଙ୍କ ନାଁ କୁ ଚଞ୍ଚକତା କରି କାଟି ଦେଇଛନ୍ତି । ଅଯୋଗ୍ୟ ଲୋକଙ୍କର ଗାଁ ରେ ପ୍ରତିପତ୍ତି ରହିଛି ତାଙ୍କ ନାଁ ରେ ସାଧାରଣ ଲୋକ ଅଭିଯୋଗ କରିବାକୁ ଡ଼ରୁଛନ୍ତି । ଅଯୋଗ୍ୟ ଲୋକଙ୍କୁ ବାହାର କରିବା ଦାୟିତ୍ୱ ସରକାରଙ୍କର । ଲୋକଙ୍କର ନୁହେଁ । ତେଣୁ ସରକାର ନିଜେ ଦାୟିତ୍ୱ ନିଅନ୍ତୁ । ନିଜ ଦାୟିତ୍ୱ କୁ ଲୋକଙ୍କ ଉପରେ ଲଦି ଦେଇ ଗାଁ ଗାଁ ରେ ସୃଷ୍ଟି ହେଉଥିବା ଗଣ୍ଡଗୋଳର ମଜା ନ ଦେଖନ୍ତୁ । ଯେଉଁ କଳି ଗାଁ ରେ ଲାଗିଛି ତାକୁ ତରବରିଆ ଗ୍ରାମସଭା କରି ସରକାର ତୁଟେଇ ଦେବାକୁ ଚେଷ୍ଟା କରୁଛନ୍ତି । ଗ୍ରାମସଭା କୁ ବିଜେପି ବିରୋଧ କରୁନି କିନ୍ତୁ ଯେଉଁ ତାଲିକା ନେଇ ସରକାର ଗ୍ରାମସଭା କୁ ଯିବେ ତାକୁ ବିରୋଧ କରୁଛୁ । ସେ ତାଲିକା ରେ ଅନେକ ଆଯୋଗ୍ୟ ଲୋକଙ୍କ ନାଁ ରହିଛି ଯେଉଁମାନେ କି ଘର ପାଇବା ପାଇଁ ଯୋଗ୍ୟ ନୁହେଁ ।’’
ଏହା ଦ୍ୱାରା ଯୋଗ୍ୟ ଲୋକ ବାହାରେ ରହିଛନ୍ତି । ସେମାନେ ଘର ପାଇବେ କି ନାହିଁ ସନ୍ଦେହ ପ୍ରକାଶ କଲେଣି । ଆଜି ଆବାସ ଯୋଜନାରେ ଅଭିଯୋଗ ଦାଖଲ ର ଶେଷ ତାରିଖ ଥିଲା। ଆଜି ସୁଦ୍ଧା ଅନେକ ଅଞ୍ଚଳରେ ଏପର୍ଯ୍ୟନ୍ତ ଅନେକ ଜନସାଧାରଣ ଜାଣି ନାହାନ୍ତି କେଉଁଭଳି ଭାବରେ ଅଭିଯୋଗ ଦାଖଲ ହେବ। ଏଥିପାଇଁ ଆବଶ୍ୟକୀୟ ପ୍ରଚାର ପ୍ରସାର ହୋଇନାହିଁ। ଆଶା ଓ ଆଶଙ୍କାରେ ଗରିବ ଲୋକେ। ଗାଁ ଗାଁ ରାଜ୍ୟ ସରକାରଙ୍କ ବିରୋଧ ରେ ଅସନ୍ତୋଷ ର ନିଆଁ କୁହୁଳୁଛି। ସରକାର ସେହି ନିଆଁରେ ପୋଡ଼ି ଜଳିଯିବେ ବୋଲି ବିଜେପି କହିଛି ।
ଇଟିଭି ଭାରତ, ଭୁବନେଶ୍ବର
