ଖୋର୍ଦ୍ଧା: ଆତଙ୍କ ଖେଳାଇଛି କୋରୋନା ମହାମାରୀର ଦ୍ବିତୀୟ ଲହର । ରାଜ୍ୟର ଅନେକ ସ୍ଥାନରେ ଏହି ମହାମାରୀର ପ୍ରକୋପ ହ୍ରାସ ପାଇଥିବାବେଳେ ଖୋର୍ଦ୍ଧାରେ ସ୍ଥିତିର ସୁଧାର ଆସିବା ନାଁ ଧରୁନି । ଦୈନିକ ସଂକ୍ରମିତଙ୍କ ସଂଖ୍ୟା 3 ଅଙ୍କ ଛୁଉଁଛି । ସଂକ୍ରମଣରୁ ରକ୍ଷା ପାଇବା ପାଇଁ ରାଜ୍ୟ ସରକାର ଲକଡାଉନ ଜାରି କରିଛନ୍ତି, କିନ୍ତୁ କିଛି ଅମାନିଆ ବ୍ୟବସାୟୀମାନେ ଏହାକୁ ଅଣଦେଖା କରି ଲୋକଙ୍କ ଭିଡ଼ ଜମାଉଥିବା ଦେଖିବାକୁ ମିଳୁଛି । ତେବେ ଅମାନିଆଙ୍କୁ ସାବାଡ କରିବା ପାଇଁ କାର୍ଯ୍ୟାନୁଷ୍ଠାନ ଜାରି ରଖିଛି ଖୋର୍ଦ୍ଧା ପୌର ପ୍ରଶାସନ ।
ଆଜି ପୌର ଅଧିକାରୀ ଶ୍ଵେତପଦ୍ମା ଶତପଥୀ ଏବଂ ଖୋର୍ଦ୍ଧା ଆଦର୍ଶ ଥାନା ଅଧିକାରୀ ସଞ୍ଜୟ ପଟ୍ଟନାୟକ ଏକ ପ୍ଲାଟୁନ ପୋଲିସ ଫୋର୍ସ ସହ ବଜାରରେ ପହଞ୍ଚି ଗହଳି ହେଉଥିବା ସ୍ଥାନରେ ଚଢ଼ାଉ କରିଛନ୍ତି । କିଛି ଦୋକାନରେ ତାଲା ପକାଇବା ସହ ଟ୍ରାଫିକ ଛକ ଠାରୁ ମୁଖ୍ୟ ରାସ୍ତାରେ ଥିବା ସମସ୍ତ ଦୋକାନ ବନ୍ଦ କରିଛନ୍ତି । 3 ଦିନ ପର୍ଯ୍ୟନ୍ତ ଏହି ସବୁ ଦୋକାନ ବନ୍ଦ ରହିବ ବୋଲି ପୌର ଅଧିକାରୀ ଶ୍ବେତପଦ୍ମା ଶତପଥୀ ସୂଚନା ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
