ଭୁବନେଶ୍ବର: ଆଜି ପୂର୍ବାହ୍ନରେ କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଛନ୍ତି ବିକ୍ରମ କେଶରୀ ଆରୁଖ, ସୁଦାମ ମାରାଣ୍ଡି ଓ ସାରଦା ପ୍ରସାଦ ନାୟକ । ସମସ୍ତଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ । ତେବେ ମନ୍ତ୍ରୀମଣ୍ଡଳ ଅଦଳବଦଳ ନେଇ ସରକାରଙ୍କୁ ଟାର୍ଗେଟ କରିଛନ୍ତି ଉଭୟ ବିରୋଧୀ ବିଜେପି ଓ କଂଗ୍ରେସ । ବିଜେପି କହିଛି ଏହା ନୂଆ ବୋତଲରେ ପୁରୁଣା ମଦ ସଦୃଶ । ସେପଟେ ୨୦୨୪ ସାଧାରଣ ନିର୍ବାଚନ ପୂର୍ବରୁ ଭୋଟକୁ ଲକ୍ଷ୍ୟରେ ରଖି ଏଭଳି କରାଯାଇଥିବା କହିଛନ୍ତି ପିସିସି ସଭାପତି । ଏହାର କୌଣସି ପ୍ରଭାବ ପଡିବ ନାହିଁ ବୋଲି କଂଗ୍ରେସ କହିଛି ।
ସାଧାରଣ ନିର୍ବାଚନ ପୂର୍ବରୁ ମନ୍ତ୍ରୀମଣ୍ଡଳ ଅଦଳବଦଳ ନେଇ ଛିଡ଼ା ହୋଇଛି ଅନେକ ପ୍ରଶ୍ନ । ଗଞ୍ଜାମ ଜିଲ୍ଲାରେ ବିଜେଡି ସଂଗଠନ ଦୁର୍ବଳ ହେଉଛି ଓ ମୟୂରଭଞ୍ଜରେ ବିଜେପିର କଳେବର ବୃଦ୍ଧି ପାଉଛି ବୋଲି କୁହାଯାଉଥିଲା । ସେହିଭଳି ସୁନ୍ଦରଗଡ ଜିଲ୍ଲାରେ ବିଜେପିକୁ ଚେକ ଦେବା ପାଇଁ ଗୋଟିଏ ମନ୍ତ୍ରୀପଦ ଦିଆଯାଇଛି ବୋଲି କୁହାଯାଉଛି । ତେବେ ଝାରସୁଗୁଡା ଉପନିର୍ବାଚନରେ ସାରଦା ଦଳ ପାଇଁ ଖଟିଥିଲେ, ତାଙ୍କୁ ପୁରସ୍କାର ସ୍ବରୂପ ମନ୍ତ୍ରୀପଦ ଦିଆଗଲା । ମୟୂରଭଞ୍ଜରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ନିର୍ବାଚିତ ହୋଇଛନ୍ତି । କେନ୍ଦ୍ରମନ୍ତ୍ରୀ ବିଶ୍ବେଶ୍ବର ଟୁଡୁ ରହିଛନ୍ତି । ସେହିପରି ମୟୂରଭଞ୍ଜ ସଂସଦୀୟ କ୍ଷେତ୍ରରେ ବିଜେଡିର ଦୁଇ ଜଣ ବିଧାୟକ ଥିବାବେଳେ ଅନ୍ୟ ୪ଟି ବିଧାନସଭା କ୍ଷେତ୍ର ବିଜେପିର ଦଖଲରେ ରହିଛି । ରାଜ୍ୟରେ ୨୨ ପ୍ରତିଶତ ଆଦିବାସୀ ଅଛନ୍ତି । ମୟୂରଭଞ୍ଜ ଏକ ଆଦିବାସୀ ଅଧ୍ୟୁଷିତ ଜିଲ୍ଲା । ତେଣୁ ସେଠାରୁ ସୁଦାମ ମାରାଣ୍ଡିଙ୍କୁ ମନ୍ତ୍ରୀ କରି ବିଜେଡି ଆଦିବାସୀ କାର୍ଡ ଖେଳିଲା ବୋଲି ଚର୍ଚ୍ଚା ହେଉଛି ।
