ଖୋର୍ଦ୍ଧା: ସାରା ଦେଶରେ ଟୀକାକାରଣ ପାଇଁ ଜୋରଦାର ପ୍ରକ୍ରିୟା ଜାରି ରହିଛି । କୋରୋନା ରୂପୀ ଅଦୃଶ୍ୟ ଭୂତାଣୁ ଠାରୁ ରକ୍ଷା ପାଇବା ପାଇଁ ଟିକା ଏକମାତ୍ର ବିକଳ୍ପ ପାଲଟିଛି । ସେହିଭଳି ଦେଶ ତଥା ରାଜ୍ୟର ସମସ୍ତ ଅଞ୍ଚଳରେ ଟୀକାକରଣକୁ ବ୍ୟାପକ କରାଯାଉଥିବା ବେଳେ କିପରି ସ୍ୱାସ୍ଥ୍ୟକେନ୍ଦ୍ରରେ ଲୋକମାନେ ଟିକା ଗ୍ରହଣ କରୁଛନ୍ତି ତାହା ଆଜି ବୁଲି ଦେଖିଛନ୍ତି ଭୁବନେଶ୍ୱର ସାଂସଦ ଅପରାଜିତା ।
ଖୋର୍ଦ୍ଧା ଜିଲ୍ଲା ବେଗୁନିଆ ସ୍ୱାସ୍ଥ୍ୟକେନ୍ଦ୍ର ଏବଂ ପିଚୁକୁଳି ସ୍ୱାସ୍ଥ୍ୟକେନ୍ଦ୍ରରେ ଚାଲିଥିବା ଟିକା କେନ୍ଦ୍ର ପରିଦର୍ଶନ କରି ଡାକ୍ତର, ନର୍ସ ଏବଂ ଲୋକଙ୍କ ସହ ଟୀକାକରଣ ସମ୍ପର୍କରେ ଆଲୋଚନା କରିଛନ୍ତି । ଏହି ଅବସରରେ ସାଂସଦ ଗଣମାଧ୍ୟମକୁ କହିଛନ୍ତି ଆମ ଯୁଦ୍ଧ କୋରୋନା ସହିତ, କୌଣସି ରାଜନୈତିକ ଦଳ ସହ ନୁହେଁ । କେନ୍ଦ୍ର ସରକାର ସମସ୍ତ ରାଜ୍ୟ ସରକାରଙ୍କୁ ନେଇ ଆଗକୁ ବଢିବାକୁ ଚାହୁଁଛନ୍ତି ବୋଲି ଅପରାଜିତା କହିଛନ୍ତି । ସେହିପରି ବର୍ତ୍ତମାନ ସମୟରେ ଲୋକଙ୍କ ଜୀବନ କିପରି ରକ୍ଷା କରାଯାଇପାରିବ ଏବଂ କେନ୍ଦ୍ର ଯୋଗାଉଥିବା ଟିକା କିପରି ପ୍ରତି ଲୋକଙ୍କ ନିକଟରେ ପହଞ୍ଚିବ ତା ଉପରେ ରାଜ୍ୟ ସରକାର ଦାୟିତ୍ୱ ନେଇ ତୁଲାଇବା ପାଇଁ ସାଂସଦ ଆଶା ରଖିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
