କଟକ: ଭାରତ- ଇଂଲଣ୍ଡ ଦ୍ୱିତୀୟ ଦିନିକିଆ ପୂର୍ବରୁ ବାରବାଟୀ ଷ୍ଟାଡିୟମରେ ଅଭ୍ୟାସ କଲେ ଭାରତୀୟ ଖେଳାଳି । ତେବେ ଗ୍ୟାଲେରୀଙ୍କ ହଜାର ହଜାର ଦର୍ଶକଙ୍କ ଉପସ୍ଥିତି ମ୍ୟାଚର ଭ୍ରମ ସୃଷ୍ଟି କରିଛି ।
ବାରବାଟୀରେ ଭାରତୀୟ ଖେଳାଳି:
ଆସନ୍ତାକାଲି ଭାରତ- ଇଂଲଣ୍ଡ ଦ୍ୱିତୀୟ ଦିନିକିଆ ମ୍ୟାଚ ଅନୁଷ୍ଠିତ ହେବାକୁ ଯାଉଛି । ଯେଉଁଥିପାଇଁ ଉଭୟ ଟିମର ଖେଳାଳି ଓଡ଼ିଶାରେ ପହଞ୍ଚି ସାରିଛନ୍ତି । ତେବେ ମ୍ୟାଚ ପୂର୍ବରୁ ଆଜି (ଶନିବାର) କଟକ ବାରବାଟୀ ଫିଲ୍ଡରେ ଅଭ୍ୟାସ କରିଛନ୍ତି ଭାରତୀୟ ଖେଳାଳି । ରାଜଧାନୀ ଭୁବନେଶ୍ୱରରେ ଏକ ହୋଟେଲରେ ଉଭୟ ଟିମ ରହୁଥିବା ବେଳେ ଅଭ୍ୟାସ ପାଇଁ କଟକ ଆସିଛନ୍ତି । କ୍ୟାପଟେନ ରୋହିତ ଶର୍ମା, ବିରାଟ କୋହଲି, ରବିନ୍ଦ୍ର ଜାଡେଜା, କେ ଏଲ ରାହୁଲ, ଅସରଦୀପ ସିଂ , ଭଳି ଷ୍ଟାର ଖେଳାଳି ଷ୍ଟାଡିଅମରେ ନିର୍ଦ୍ଧାରିତ ସମୟ ଅନୁସାରେ ପହଞ୍ଚି ଅଭ୍ୟାସ ଆରମ୍ଭ କରିଥିବା ବେଳେ ମହମ୍ମଦ ସାମି, ଶେୟସ ଆୟାର, ଶୁଭମନ ଗିଲ ଅଭ୍ୟାସ ପାଇଁ ବାରବାଟୀ ଆସି ନଥିବା ଦେଖିବାକୁ ମିଳିଛି ।
ଅନ୍ୟପଟେ କ୍ୟାପଟେନ ରୋହିତ ଶର୍ମାଙ୍କ ପ୍ରଦର୍ଶନକୁ ନେଇ ଗଣମାଧ୍ୟମର ପ୍ରଶ୍ନର ଉତ୍ତର ରଖି ବ୍ୟାଟିଂ କୋଚ ସିତାନସୁ କୋଟାକ କହିଛନ୍ତି, " ଶେଷ ୩ଟି ଦିନିକିଆରେ ରୋହିତ ଖେଳିଛନ୍ତି । ସେହି ମ୍ୟାଚଗୁଡିକରେ ରୋହିତଙ୍କ ପ୍ରଦର୍ଶନ ବେଶ ଭଲ ରହିଛି । ଆମେ ଏନେଇ ବ୍ୟସ୍ତ ନାହୁଁ । ରୋହିତଙ୍କୁ ନେଇ ଆମର କିଛି ଚିନ୍ତା ନାହିଁ ।"
ମ୍ୟାଚର ଭ୍ରମ ସୃଷ୍ଟି କଲା ଦର୍ଶକଙ୍କ ଖଚାଖଚ ଭିଡ:
ନିଜ ପ୍ରିୟ ଖେଳାଳିଙ୍କ ପ୍ରତ୍ୟକ୍ଷ ଭାବେ ଦେଖି ଫ୍ୟାନ୍ସମାନେ ବେଶ ଖୁସି ପ୍ରକଟ କରିଛନ୍ତି । ଅଭ୍ୟାସ ଦେଖିବା ପାଇଁ ଗ୍ୟାଲେରୀରେ ହଜାର ହଜାର ଦର୍ଶକଙ୍କ ଭିଡ ଦେଖିବାକୁ ମିଳିଥିଲା । ଏହି ଭିଡ ମ୍ୟାଚର ଭ୍ରମ ସୃଷ୍ଟି କରୁଥିଲା । ଦର୍ଶକମାନେ ଖେଳାଳିମାନଙ୍କୁ ବେଶ ଉତ୍ସାହିତ କରୁଥିଲେ ।
ଏହାମଧ୍ୟ ପଢନ୍ତୁ... ନେଟ୍ ପ୍ରାକ୍ଟିସ୍ ଛାଡି ଓଡିଶା ମାଟିରେ ଗଲ୍ଫ ଖେଳିଲେ ଇଂଲଣ୍ଡ କ୍ରିକେଟ୍ ଟିମ୍ ପୁରୀରେ ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦ ନେଲେ ଭାରତୀୟ ଖେଳାଳି |
ଆସନ୍ତାକାଲି ଭାରତ-ଇଂଲଣ୍ଡ ଦ୍ୱିତୀୟ ଦିନିକିଆ:
ଆସନ୍ତାକାଲି (ରବିବାର) କଟକ ବାରବାଟୀ ଷ୍ଟାଡିୟମରେ ଭାରତ- ଇଂଲଣ୍ଡ ଦ୍ୱିତୀୟ ଦିନିକିଆ ମ୍ୟାଚ ଅନୁଷ୍ଠିତ ହେବାକୁ ଯାଉଛି । ଭାରତୀୟ ସମୟାନୁସାରେ ଦିନ ୧.୩୦ରେ ମ୍ୟାଚ ଆରମ୍ଭ ହେବ । ତେବେ ନାଗପୁରରେ ଅନୁଷ୍ଠିତ ପ୍ରଥମ ଦିନିକିଆରେ ଭାରତ ଇଂଲଣ୍ଡକୁ ହରାଇଥିବା ଥିବା ବେଳେ ଏହି ମ୍ୟାଚକୁ ନେଇ ଫ୍ୟାନ୍ସମାନେ ବେଶ ଆଶାବାଦୀ ଅଛନ୍ତି । ବିଶେଷକରି ପୂର୍ବ ମ୍ୟାଚରେ ଆହତ କାରଣରୁ ବିରାଟ କୋହଲି ଖେଳିନଥିବା ବେଳେ ଏହି ମ୍ୟାଚରେ ତାଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ।
ଇଟିଭି ଭାରତ, କଟକ
