ଭୁବନେଶ୍ବର: ରାଜ୍ୟରେ ଟମାଟୋ ଓ ଅନ୍ୟାନ୍ୟ ଦରଦାମ ବୃଦ୍ଧି ନେଇ ରାଜନୈତିକ ବୟାନବାଜି ଆରମ୍ଭ ହୋଇଛି । ବର୍ଷା ଯୋଗୁଁ ଟମାଟୋ ଆମଦାନୀରେ ସମସ୍ୟା ଯୋଗୁଁ ଦର ବୃଦ୍ଧି ହୋଇଥିବା ରାଜ୍ୟ ଯୋଗାଣ ମନ୍ତ୍ରୀ କହିଛନ୍ତି । ସେହିପରି ଅନ୍ୟାନ୍ୟ ସାମଗ୍ରୀ ଦରଦାମ ବୃଦ୍ଧି ପାଇଁ କେନ୍ଦ୍ର ଉପରେ ଦୋଷ ଠେଲିଛନ୍ତି ମନ୍ତ୍ରୀ । ବିଜେଡି-ବିଜେପି ମେଳି ଯୋଗୁଁ ସାଧାରଣ ଲୋକ ପେଷି ହେଉଥିବା କହିଛନ୍ତି ପିସିସି ସଭାପତି ।
ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ଯେ, ଯେବେଠାରୁ କେନ୍ଦ୍ରରେ ବିଜେପି ସରକାର ଆସୁଛି, ସେବେଠାରୁ ଦରଦାମ ବୃଦ୍ଧି ପାଇବା ଆରମ୍ଭ କରିଛି । ସାରା ଭାରତ ବର୍ଷର ଲୋକଙ୍କୁ ବଡ଼ ବଡ଼ ସ୍ବପ୍ନ ଦେଖାଇ 2014ରେ ସରକାରକୁ ଆସିଥିଲା ବିଜେପି । ପେଟ୍ରୋଲ ଓ ଡିଜେଲ ପାଖାପାଖି ଶହେ ଟଙ୍କା । ଗରିବ ଲୋକ ବ୍ୟବହାର କରୁଥିବା କିରାସିନି ଶହେ ଟପିଗଲା । ଆଜି ଟମାଟୋ ଶହେ ଟପିଛି । ଆମେ ଓଡ଼ିଆ ଲୋକ ଖାଉଥିବା ମୁଢି, ଚୁଡା, ଗୁଡ଼, ଦହିରୁ ଜିଏସଟି ନେଉଛନ୍ତି କେନ୍ଦ୍ର ସରକାର । ରାଜ୍ୟରେ ସରକାରରେ ଥିବା ବିଜେଡି ସରକାର ଚୁପ ହୋଇ ବସିଛି । ବିଜେପି ବିରୋଧରେ ସ୍ୱର ଉତ୍ତୋଳନ କଲେ ନାହିଁ । ବିଜେଡି - ବିଜେପି ମିଶିକି ଅଛନ୍ତି । ଉପରେ କୋଳାକୋଳି ହୋଇ ଏଠାରେ କେବଳ ବୟାନବାଜି କରୁଛନ୍ତି । ସାଧାରଣ ପେଷି ହେଉଛନ୍ତି । କେଉଁଟା ସତ ଓ କେଉଁଟା ମିଛ ଜନସାଧାରଣ ଜାଣନ୍ତୁ । ଆଗାମୀ ଦିନରେ ଜନସାଧାରଣ ଉଚିତ ଜବାବ ଦେବେ । ଦରଦାମ ବୃଦ୍ଧି ନେଇ ଆଗାମୀ ଦିନରେ ଆମେ ଆନ୍ଦୋଳନକୁ ଓହ୍ଲାଇବୁ ।
ରାଜ୍ୟରେ ଟମାଟୋ ଦର ବୃଦ୍ଧିକୁ ନେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କ ପ୍ରତିକ୍ରିୟା । ଅତ୍ୟାବଶ୍ୟକ ସାମଗ୍ରୀ ସହ ଡାଲି ଦରଦାମ ବୃଦ୍ଧି ପାଇଛି । ତାହା ଏକ ଜାତୀୟ ସମସ୍ୟା । ଏହାକୁ ନିୟନ୍ତ୍ରଣ କରିବାର ଆବଶ୍ୟକତା ରହିଛି । ଆମ ପାଖରେ ଯାହା ଫିଡ଼ବ୍ୟାକ ଅଛି, ଲଗାଣ ବର୍ଷାର ପ୍ରଭାବ ବଜାର ଉପରେ ପଡିଛି । ସ୍ଥାନୀୟ ଚାଷୀ ମାନଙ୍କ ଉପରେ ବି ପ୍ରଭାବ ପଡିଛି । ଆମର ମୁଖ୍ୟତଃ ବାଙ୍ଗାଲୋରରୁ ଟମାଟୋ ଆସେ । ଭାବୁଛୁ ଏହା ଭିତରେ ସ୍ଥିତିରେ କିଛି ପରିବର୍ତ୍ତନ ଆସିବ ବା ସ୍ଥିରାବସ୍ତା ଆସିବ । ବିଶେଷ କରି ଡାଲି କିମ୍ୱା ଏହି ଭଳି ସାମଗ୍ରୀର ଯଦି କେଉଁ ମାନେ ହୋଡ଼ିଂ କରି ବଜାର ଦର ବଢ଼ାଉଥିବେ ତାଙ୍କ ଉପରେ କାର୍ଯ୍ୟାନୁଷ୍ଠାନ ନେବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି । ଡାଲି ଦର ନିୟନ୍ତ୍ରଣ ନେଇ କେନ୍ଦ୍ର ସରକାର ପଦକ୍ଷେପ ନେବାର ଆବଶ୍ୟକ ରହିଛି ।
ଇଟିଭି ଭାରତ, ଭୁବନେଶ୍ବର
