ଖୋର୍ଦ୍ଧା: ପାରିବାରିକ କଳହର କରୁଣ ପରିଣତି । ଦେଢ ମାସର ଶିଶୁକନ୍ୟାକୁ ଧରି କୂଅକୁ ଡେଇଁଲା ମାଆ । ଏଭଳି ଏକ ଚିତ୍ର ଦେଖିବାକୁ ମିଳିଛି ଖୋର୍ଦ୍ଧା ଜିଲା ଟାଙ୍ଗୀ ବଳରାମପୁର ସାହିରେ । ଟାଙ୍ଗୀ ପ୍ରଧାନ ସାହିର ମାନସ ଦାସ ନାମକ ଜଣେ ଯୁବକ ତପସ୍ୱିନୀ ବେହେରା ନାମକ ଜଣେ ଯୁବତୀଙ୍କୁ ପ୍ରେମ ବିବାହ କରିଥିଲେ । ବିବାହ ପରେ ତାଙ୍କର ଏକ କନ୍ୟା ସନ୍ତାନ ଦେଢ ମାସ ତଳେ ଜନ୍ମ ହୋଇଥିଲା ।
ଶିଶୁ କନ୍ୟାର ଅବସ୍ଥା ସଂଗୀନ ଥିବାରୁ କନ୍ୟାକୁ ଭୁବନେଶ୍ୱର ଏକ ମେଡିକାଲରେ ICU ରେ ରଖିଥିଲେ । ଗତ କିଛି ଦିନ ତଳେ ମେଡିକାଲରୁ ଡିସଚାର୍ଜ ହେବା ପରେ ଶିଶୁ କନ୍ୟା ସହ ତପସ୍ୱିନୀ ଟାଙ୍ଗୀ ବଳରାମପୁର ବାପଘରେ ରହି ଆସୁଥିଲେ । ତେବେ ଏନେଇ ତପସ୍ୱିନୀ ଏବଂ ମାନସଙ୍କ ମଧ୍ୟରେ ଝଗଡା ହୋଇଥିଲା । ଏହାପରେ ତପସ୍ୱିନୀ ନିଜ ଦେଢ ମାସର ଛୁଆକୁ ଧରି ଘର ନିକଟରେ ଥିବା ଏକ ଖୋଲା ଗଭୀର କୂଅକୁ ଡେଇଁ ପଡିଥିଲେ ।
ମାତ୍ର ଝିଅକୁ କୂଅ ଭିତରେ ଟେକି ଧରି ଚିତ୍କାର କରିଥିଲେ । ସ୍ଥାନୀୟ ଲୋକେ ଏକ ବାଲଟି ପକାଇ ଶିଶୁ କନ୍ୟାକୁ କୁଅରୁ ଉଦ୍ଧାର କରିଥିଲେ ମଧ୍ୟ ମାଆକୁ ଉଦ୍ଧାର କରିବାରେ ବିଫଳ ହେବାରୁ ଟାଙ୍ଗୀ ଅଗ୍ନିଶମ ବାହିନୀକୁ ଖବର ଦେଇଥିଲେ । ଖବର ପାଇ ଟାଙ୍ଗୀ ଅଗ୍ନିଶମ ବାହିନୀର କର୍ମଚାରୀମାନେ ଗଭୀର କୁଅରୁ ତପସ୍ୱିନୀକୁ ତୁରନ୍ତ ଉଦ୍ଧାର କରି ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲେ । ସେଠାରେ ଅବସ୍ଥା ଗୁରୁତର ହେବାରୁ ଉଭୟ ମାଆ ଓ ଝିଅଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
