ଭୁବନେଶ୍ବର: କଟକ ଅତିରିକ୍ତ ଜିଲ୍ଲାପାଳଙ୍କ ଗାଡିକୁ ପିଟିଲା ରାଜ୍ୟ ସରକାରଙ୍କ ମୋ ବସ୍ । ଭୁବନେଶ୍ଵର ରାଜଭବନ ଛକରେ ଏପରି ଘଟଣା ଘଟିଛି । ତେବେ ଏକ ବଡ ଦୁର୍ଘଟଣାରୁ ବର୍ତ୍ତଲେ କଟକ ଉପଜିଲ୍ଲାପାଳ ପୂର୍ଣ୍ଣଚନ୍ଦ୍ର ମିଶ୍ର । ଆଜି ଅପରାହ୍ନରେ ୬ ନମ୍ବର ହସ୍ପିଟାଲ ଆଡୁ ଉପଜିଲ୍ଲାପାଳଙ୍କ ଗାଡି ଆସୁଥିବା ବେଳେ ଏଜି ଛକରୁ ଆସୁଥିବା ମୋ ବସ (ନମ୍ବର ୨୩) ରାଜଭବନ ଛକରେ ପଛରୁ ଉପଜିଲ୍ଲାପାଳଙ୍କ ଗାଡିକୁ ପିଟିଥିଲା । ଏତେ ଜୋରରେ ଧକ୍କା ଦେଲା ଯେ, ଉପଜିଲ୍ଲାପାଳଙ୍କ ଗାଡିଟି ଚାରି ରାଉଣ୍ଡ ବୁଲୁଥିବା ଦେଖିବାକୁ ମିଳିଛି । ତେବେ ଏହି ଦୁର୍ଘଟଣାରେ କାହାର କିଛି କ୍ଷତି ହୋଇନଥିବା ବେଳେ ଉପଜିଲ୍ଲାପାଳଙ୍କ ଗାଡିଟି ସମ୍ପୂର୍ଣ୍ଣ ଭାଙ୍ଗି ଯାଇଛି ।
ସେପଟେ ଅତିରିକ୍ତ ଜିଲ୍ଲାପାଳଙ୍କୁ ଉଦ୍ଧାର କରି ପ୍ରାଥମିକ ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା । ସେହିପରି ମୋ ବସରେ ଥିବା ସବୁ ଯାତ୍ରୀମାନେ ସୁରକ୍ଷିତ ଅଛନ୍ତି । ଘଟଣାସ୍ଥଳରେ ପୋଲିସ ପହଞ୍ଚି ଘଟଣାର ତଦନ୍ତ କରୁଛି । ରାଜଧାନୀରେ ପ୍ରତ୍ୟେକ ଦିନ ଏପରି ଦୁଇରୁ ଅଧିକ ଘଟଣା ଘଟୁଛି । ମୋ ବସ ଡ୍ରାଇଭର ମାନେ ବେପରୁଆ ଗାଡି ଚାଳନା କରୁଥିବା ସାଧାରଣରେ ଅଭିଯୋଗ ହୋଇଛି । ଏମାନଙ୍କୁ କହିବାକୁ କେହି ନାହାନ୍ତି ଯେପରି । କହିଲେ ଅଯଥାରେ ଯୁକ୍ତି କରୁଛନ୍ତି । ଯାହା ନିୟମ ଅଛି, ସହର ଭିତରେ ୨୦ରୁ ୩୦ ସ୍ପିଡରେ ଗାଡି ଚାଳନା କରିବା କଥା । କିନ୍ତୁ ସେ ନିୟମର ଧଜିଆ ଉଡ଼ାଉଛନ୍ତି ମୋ ବସ ଚାଳକମାନେ । କାହାକୁ ଖାତିର ନାହିଁ । କାରଣ ସେମାନେ ସରକାରୀ ଗାଡି ଚାଳନା କରୁଛନ୍ତି ।
ନିକଟରେ ନିକୋ ପାର୍କ ଛକ ନିକଟରେ ସେମିତି ଏକ କାରକୁ ଧକ୍କା ଦେଇଥିଲା ମୋ ବସ । ସେହି କାର ଚଳାଉଥିଲେ ପୋଲିସ ଗୁଇନ୍ଦା ବିଭାଗର ଜଣେ ଅଧିକାରୀ । ସେ ଅଭିଯୋଗ ମଧ୍ୟ କଲେ । ହେଲେ ଫଳ ଶୂନ । କାରଣ ଏହା ସରକାରୀ ଗାଡି । ମୋ ବସର ଏଭଳି ବେପରୁଆ ଡ୍ରାଇଭିଂକୁ ନେଇ ରାଜଧାନୀବାସୀ ଏକପ୍ରକାର ଅତିଷ୍ଠ ହୋଇପଡିଲେଣି । ପ୍ରଶାସନ ସବୁ ଦେଖୁଛି, ହେଲେ ଚୁପ୍ ବସିଛି । ଏଭଳି ଘଟଣା ରାଜଧାନୀରେ ନିତିଦିନିଆ ଘଟୁଛି । ଏଠି ପ୍ରଶ୍ନ ଉଠୁଛି, ଏମାନଙ୍କୁ କିଏ ଦେଉଛି ସାହସ ? ଏମାନେ କାହିଁକି ମାନୁନାହାନ୍ତି ଗାଇଡ୍ ଲାଇନ୍ ? ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ କାହିଁକି ? କିଛି ଡ୍ରାଇଭର ମଦ୍ୟପାନ କରି ମଧ୍ୟ ଗାଡି ଚାଳନା କରୁଥିବା ଅଭିଯୋଗ ରହିଛି । ସେପଟେ ଆଜିର ଘଟଣାକୁ ନେଇ ପୋଲିସର ତଦନ୍ତ କେତେ ବାଟ ଯାଉଛି, ତାହା ଦେଖିବାକୁ ବାକି ରହିଲା ।
ଇଟିଭି ଭାରତ, ଭୁବନେଶ୍ବର
