ଭୁବନେଶ୍ବର: ଥାନା ଭିତରେ ଖଣ୍ଡଯୁଦ୍ଧ । ନିମିଷକ ଭିତରେ ରଣ କ୍ଷେତ୍ର ପାଲଟି ଗଲା ଥାନା ପରିସର । ଏହି ଭୀଷଣ ଲଙ୍କାକାଣ୍ଡରେ ପୋଲିସ ଉପରେ ପଡିଛି ନିର୍ଦ୍ଧୁମ ମାଡ । ଏଭଳି ଏକ ଅଭାବନୀୟ, ଅପ୍ରତ୍ୟାଶିତ ଘଟଣା ଘଟିଛି ଶହୀଦ ନଗର ଥାନାରେ । ଥାନାରେ ଭଙ୍ଗାରୁଜା ଓ ମାରପିଟ୍ କରିଛନ୍ତି ଏତଲା ନେଇ ଆସିଥିବା ଦୁଇ ଗୋଷ୍ଠୀ । ଦୁର୍ବୃତ୍ତଙ୍କ ସଂଘବଦ୍ଧ ଆକ୍ରମଣରେ ସହିଦନଗର ଥାନା ଆଇଆଇସିଙ୍କ ସମେତ ୪ ଆହତ ହୋଇଛନ୍ତି ।
ମିଳିଥିବା ସୂଚନା ଅନୁସାରେ, ରବିବାର ରାତି ପ୍ରାୟ ୧୨ ଟା ସମୟରେ ଦୁଇଗୋଷ୍ଠୀ ମଧ୍ୟରେ ଥିବା ଗଣ୍ଡଗୋଳ ଥାନାରେ ନେଇଥିଲା ଭୀଷଣ ରୂପ । ପୂର୍ବରୁ ପୋଲିସ ହେପାଜତରେ ଥିବା ଗୋଟିଏ ଗୋଷ୍ଠୀର ଅଭିଯୁକ୍ତଙ୍କୁ ଅନ୍ୟ ଗୋଷ୍ଠୀର କିଛି ଯୁବକ ଆକ୍ରମଣ କରିବା ସମୟରେ ଏଭଳି ଅଘଟଣ ଘଟିଛି । ଆକ୍ରମଣକାରୀଙ୍କୁ ରୋକିବାକୁ ଯାଇ କନଷ୍ଟେବଳ, ଏଏସଆଇ, ଆଇଆଇସି ସମସ୍ତେ ଲହୁଲୁହାଣ ହୋଇଛନ୍ତି ।
ଦୁର୍ବୃତ୍ତଙ୍କ ସଂଘବଦ୍ଧ ଆକ୍ରମଣରେ ଏଏସଆଇଙ୍କ ମୁଣ୍ଡ ଫାଟିବା ସହ କନଷ୍ଟେବଳ ଓ ଏଏସଆଇ୍ ମଧ୍ୟ ଆହତ ହୋଇଛନ୍ତି । ଗଣ୍ଡଗୋଳ ସମୟରେ ଥାନାରେ ଥିବା ଟିଭି ସହ ଆସବାପତ୍ର ଭଙ୍ଗାରୁଜା ଓ ଫାଇଲ ଫୋପାଡା ଫୋପଡି କରିଥିଲେ ଦୁର୍ବୃତ୍ତ।
ଆକ୍ରମଣକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛି ପୋଲିସ । ଏନେଇ ସିସିଟିଭି ଫୁଟେଜ୍କୁ ଆଧାରକରି ପୋଲିସ ଯାଞ୍ଚ ଆରମ୍ଭ କରିଛି ।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ
