ଖୋର୍ଦ୍ଧା: ନମସ୍ତେ କମଳା ମା’ଗୋ ସାଗର ଦୁଲଣୀ…. ନମସ୍ତେ ନମସ୍ତେ ମା’ଗୋ ବିଷ୍ଣୁ ପାଟରାଣୀ…’। ଆଜି ମାର୍ଗଶୀର ମାସ ଶେଷ ଗୁରୁବାର (manabasa gurubara)ଅବସରରେ ଘରରୁ ଗୃହଲକ୍ଷ୍ମୀମାନଙ୍କ ସ୍ବରରୁ ପ୍ରତିଟି ଘରୁ ଭାସି ଆସୁଛି ମା ଲକ୍ଷ୍ମୀଙ୍କ ମହିମା କଥା । ଗାଁ ଠାରୁ ସହରର ଯାଏ ପ୍ରତି ଘରେ ଶୁଭୁଛି ଏହି ଲକ୍ଷ୍ମୀ ପୁରାଣର ପବିତ୍ର ଛନ୍ଦ । ଚିତା, ପିଠାରେ ମହକି ଉଠୁଛି ପୁରପଲ୍ଲୀ ।
ବଡି ଭୋର ଉଠି ପୂଜା ପାଇଁ ପ୍ରସ୍ତୁତି ଆରମ୍ଭ କରି ଦେଇଛନ୍ତି ଗୃହଲକ୍ଷ୍ମୀମାନେ । ଘର ବାରଣ୍ଡା ଭଳିକି ଭଳି ଆକର୍ଷଣୀୟ ଚିତାରେ ପୂରି ଉଠିଛି । ଲୋକେ ବୁଧବାରଠୁ ଘରଦ୍ଵାର ସଫା କରି ଝୋଟି ଚିତା ପକାଇଛନ୍ତି । ଫୁଲ ସାଙ୍ଗକୁ ଭଳିକି ଭଳି ଫଳ, ପୂଜା ସରଞ୍ଜାମ ଏକାଠି କରି ଅନ୍ତିମ ପାଳିରେ ମା’ଙ୍କ ଆବାହନ ଲାଗି ମାଣଭରି ଧାନ ବିଧିମତେ ଗୃହର ନିର୍ଦ୍ଦିଷ୍ଟ କୋଣରେ ପ୍ରତିଷ୍ଠା କରିଛନ୍ତି । ଭୋର ସମୟରେ ଧୂପ, ଦୀପ ଦେଇ ମା’ଙ୍କୁ ପ୍ରାର୍ଥନା କରିଛନ୍ତି । ଘରେ ଘରେ ହୁଳହୁଳି ଓ ଶଙ୍ଖ ଧ୍ୱନିରେ ପ୍ରକମ୍ପିତ ହୋଇଛି ଗାଁ ଠୁ ସହର ।
ପୂଜା ଘରେ ମାଣ ବସିବା ସହ ପିଠାପଣାରେ ମହକୁଛି ଚତୁର୍ଦିଗ । ଧନଦାତ୍ରୀ, ଶାନ୍ତିଦାତ୍ରୀ ମା ମହାଲକ୍ଷ୍ମୀଙ୍କୁ ଆବାହନରେ ବ୍ୟସ୍ତ ପ୍ରତିଟି ଘରର ମା । ଭୋରୁ ଭୋରୁ ମହିଳାମାନେ ନୂତନ ବସ୍ତ୍ର ପରିଧାନ କରି ମାଙ୍କ ଆବାହନ କରୁଥିବା ଦେଖିବାକୁ ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା,ଇଟିଭି ଭାରତ
