ଖୋର୍ଦ୍ଧା: ଗୋଶାଳା ପଡିଆରେ ମିଶନଶକ୍ତି ସମାବେଶ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇଥିଲେ । ଜିଲ୍ଲାର 13ଟି ପ୍ରକଳ୍ପ ପାଇଁ 13 ହଜାର 536ଟି ସ୍ବଂୟ ସହାୟକ ଗୋଷ୍ଠୀକୁ 4.06 କୋଟି ଟଙ୍କାର ଆର୍ଥିକ ସହାୟତା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ।
ସେହିପରି ବ୍ଲକସ୍ତରୀୟ ମହାସଂଘକୁ ସୁଦୃଢ କରିବା ପାଇଁ 25 ଲକ୍ଷ ଲେଖାଏଁ ମୋଟ 3 କୋଟି 25 ଲକ୍ଷ ଟଙ୍କା ଆର୍ଥିକ ସହାୟତା ପ୍ରଦାନ କରିଛନ୍ତି । ଏଥିସହିତ ଜିଲ୍ଲାର 2477 ଅଙ୍ଗନୱାଡି କର୍ମୀ ଓ 2350 ଅଙ୍ଗନୱାଡି ସହାୟିକାଙ୍କୁ 77.87 ଲକ୍ଷ ପ୍ରୋତ୍ସାହନ ରାଶି ପ୍ରଦାନ କରାଯାଇଛି ।
ସେପଟେ ପ୍ରତ୍ୟେକ ଗୋଷ୍ଠୀ କାର୍ଯ୍ୟର ବ୍ୟବସାୟ ବୃଦ୍ଧି ଲକ୍ଷରେ 3 ହଜାର ଟଙ୍କା ମୋବାଇଲ କିଣିବା ପାଇଁ ସହାୟତା ପ୍ରଦାନ କରାଯାଇଥିଲା । ଏହି ସମାବେଶରେ ଜିଲ୍ଲାରୁ 60 ହଜାରରୁ ଊର୍ଦ୍ଧ୍ବ ସ୍ବଂୟ ସହାୟିକା ସାମିଲ ହେବା ସହ ସଭା ପୂର୍ବରୁ ଅନୁଷ୍ଠିତ ହୋଇଥିବା ସାଂସ୍କୃତିକ କାର୍ଯ୍ୟକ୍ରମର ମଜା ନେଇଥିଲେ ।
ଏହି ସମାବେଶରେ ସମ୍ମାନିତ ଅତିଥି ଭାବେ ରାଜ୍ୟ ମିଶନଶକ୍ତିର ନିର୍ଦ୍ଦେଶିକା ସୁଜାତା କାର୍ତ୍ତିକେୟନ ମହିଳା ସମବାୟ ନିଗମର ଅଧ୍ୟକ୍ଷା ଶ୍ରୀମୟୀ ମିଶ୍ର ଏବଂ ଖୋର୍ଦ୍ଧା ଜିଲ୍ଲାପାଳ ନିର୍ମଳ ଚନ୍ଦ୍ର ମିଶ୍ର ପ୍ରମୁଖ ମଞ୍ଚାସୀନ ଥିଲେ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
