ବିବାହରେ ଅତିଥି ବେଶରେ ସାମିଲ ହେଲେ ଲୁଟେରା, ମଉକା ଦେଖି ଉପହାର ବ୍ୟାଗ ନେଇ ଛୁ

ଅତିଥି ବେଶରେ ଆସି ବିବାହ ଉପହାର ନେଇ ଚମ୍ପଟ ମାରିଲେ ଲୁଟେରା । ଭୋଜି ଖାଇବା ବାହାନାରେ ଉପହାର ବ୍ଯାଗ ନେଇ ଫେରାର। ସିସିଟିଭିରେ କଏଦ ହେଲା ଭିଡିଓ। ଅଧିକ ପଢନ୍ତୁ

ଭୁବନେଶ୍ବର: ମଣ୍ଡପରେ ବିବାହର ଆୟୋଜନ କରୁଛନ୍ତି କି ? ତେବେ ହୋଇଯାଆନ୍ତୁ ସାବଧାନ । କାହିଁକିନା ଏହି ମଉକାର ସୁଯୋଗ ନେଇ ଚଉକା ମାରୁଛନ୍ତି ଲୁଟେରା । ଆପଣଙ୍କ ଅତିଥି ନହୋଇ ମଧ୍ୟ ବିବାହରେ ସାମିଲ ହେବେ ଓ ମଉକା ଦେଖିଲେ କଳାକନା ବୁଲାଇ ଚାଲିଯିବେ । ଭୁବନେଶ୍ବରୁ ସାମ୍ନାକୁ ଆସିଛି ଏପରି ଘଟଣା। ଏକ ବିବାହରେ ଅତିଥି ଭାବରେ ଯୋଗ ଦେଇ ଭୋଜି ଖାଇବା ଆଳରେ ଉପହାର ବ୍ୟାଗ ନେଇ ଫେରାର ହୋଇଯାଇଛନ୍ତି ଲୁଟେରା । ଯାହାର ଭିଡିଓ ସିସିଟିଭି ଫୁଟେଜରେ କଏଦ ହୋଇଛି । ଭୋଜିଭାତ ସାଙ୍ଗକୁ ନାଚଗୀତରେ ସମସ୍ତେ ମସଗୁଲ ଥିବା ବେଳେ ଏହି ସମୟରେ ଲୁଟ କରିଥିଲା ଲୁଟେରା । ଏନେଇ ଝିଅଘର ପକ୍ଷରୁ ଥାନାରେ ଅଭିଯୋଗ ହୋଇଛି ।

ମିଳିଥିବା ସୂଚନା ଅନୁଯାୟୀ, ଖୋର୍ଦ୍ଧା ଜିଲ୍ଲାର ବାଲିପାଟଣା ଥାନା କୁଳନ୍ତିରା ଶାସନ ଗାଁର ଅଖିଳ ରଞ୍ଜନ ମହାନ୍ତିଙ୍କ ଝିଅ ବାହାଘର ଗତକାଲି (ଗୁରୁବାର) ଭୁବନେଶ୍ୱର ଏକ ମଣ୍ତପରେ ଅନୁଷ୍ଠିତ ହୋଇଥିଲା । ଝିଅ ବାହାଘରରେ ବନ୍ଧୁ ବାନ୍ଧବ, ସାଙ୍ଗସାଥି ସାମିଲ ହୋଇଥିଲେ । ଆସିଥିବା ଅତିଥି ଉପହାର ମଧ୍ୟ ଦେଇଥିଲେ । ଆଉ ଉପହାର ତକ ଝିଅ ପକ୍ଷ ଏକ ବ୍ଯାଗରେ ରଖି ଦେଇଥିଲେ । କିନ୍ତୁ ଏହା ଉପରେ କଳା ନଜର ପକାଇଥିଲେ ଜଣେ ଲୁଟେରା । ଅତିଥି ରୂପରେ ବିବାହରେ ସାମିଲ ହୋଇ ଭୋଜି ଖାଇବା ଆଳରେ ଆସିଥିଲେ, କିନ୍ତୁ ନଜର ତାଙ୍କର ରହିଥିଲା ଉପହାର ବ୍ୟାଗ ଉପରେ ।

ବିଳମ୍ବିତ ରାତିରେ ଝିଅ ବେଦୀକୁ ଯିବା ସମୟରେ ଅତି ସର୍ତକତା ଭାବରେ ଲକ୍ଷାଧିକ ଟଙ୍କାର ଉପହାର ବ୍ଯାଗକୁ ନେଇ ଫେରାର ମାରିଥିଲା ଲୁଟେରା । ଯାହା ପରେ ଜାଣିବାକୁ ପାଇଥିଲେ କନ୍ୟାପକ୍ଷ । ମଣ୍ତପରେ ଲାଗିଥିବା ସିସିଟିଭିରୁ ଦେଖିବା ପରେ ଝିଅ ପରିବାର ପକ୍ଷରୁ ବରଗଡ଼ ଥାନାରେ ଏତଲା ହୋଇଛି । ପୋଲିସ ସିସିଟିଭି ଫୁଟେଜ ଆଧାରରେ ତଦନ୍ତ କରୁଛି ।

ତେବେ ଏହା ପ୍ରଥମ ଘଟଣା ନୁହଁ ଏହା ପୂର୍ବରୁ ଏମିତି ନେକ ଘଟଣା ସାମ୍ନାକୁ ଆସିଛି । ଗତବର୍ଷ ଜାନୁଆରୀ ମାସରେ ସହିଦନଗର ଥାନା ଅଞ୍ଚଳରୁ ଏପରି ଢଙ୍ଗରେ ଲୁଟ କରିଥିଲେ ଲୁଟେରା । କେଶୁରାରେ ଥିବା ପଲ୍ଲବୀ ମଣ୍ଡପରେ ଏକ ବିବାହର ଆୟୋଜନ କରାଯାଇଥିଲା । ବର ପକ୍ଷରୁ ବରଯାତ୍ରୀ ବେଶରେ ଜଣେ ଯୁବକ ଆସି ବନ୍ଦାଣ ଗହଣା ଲୁଟ୍‌ କରି ଫେରାର ହୋଇଯାଇଥିଲେ ।

ଇଟିଭି ଭାରତ, ନିଆଳି