ଭୁବନେଶ୍ବର: ଓଲିଉଡ ଦିବଙ୍ଗତ ଅଭିନେତା ପିଣ୍ଟୁ ନନ୍ଦ ଆଜି ଆମ ଗହଣରେ ନାହାନ୍ତି ହେଲେ ତାଙ୍କ ଅଭିନୟର ଛାପ ଆଜି ବି ଲୋକଙ୍କ ମନରେ ଚିର ହୋଇ ରହିଛି । ଫିଲ୍ମରେ ତାଙ୍କ ଡାଇଲଗ ଆଜି ବି ଲୋକଙ୍କ ମୁହଁରେ ରହିଛି । ଏହାରି ମଧ୍ୟରେ ଅଭିନେତାଙ୍କ ଶେଷ ଫିଲ୍ମ ରିଲିଜ ହେବାକୁ ଯାଉଛି । ଫିଲ୍ମ 'ପୁଷ୍କରା'ରେ ଶେଷ ଥର ପାଇଁ ନଜର ଆସିବେ ସ୍ବର୍ଗତ ଅଭିନେତା ଫିଣ୍ଟୁ ନନ୍ଦ । ବର୍ତ୍ତମାନ ଫିଲ୍ମରୁ ପ୍ରଥମ ଲୁକ ରିଲିଜ ହୋଇଛି ।
ଏହି ଫିଲ୍ମରେ ସ୍ବର୍ଗତ ପିଣ୍ଟୁ ନନ୍ଦଙ୍କ ସମେତ ସବ୍ୟସାଚୀ ମିଶ୍ର, ସୁପ୍ରିୟା ନାୟକ, ବିକାଶ ଚୌଧୁରୀ, ତ୍ରିଭୁବନ ପଣ୍ଡା, ଅଶ୍ରୁମୋଚନ ପ୍ରମୁଖ ମୁଖ୍ୟ ଭୂମିକାରେ ଅଭିନୟ କରିଛନ୍ତି । ପୂର୍ବରୁ ଫିଲ୍ମର ମୋସନ ପୋଷ୍ଟର ଏବଂ ସମସ୍ତ ଅଭିନେତା ଏବଂ ଅଭିନେତ୍ରୀଙ୍କ ପ୍ରଥମ ଲୁକ୍ ରିଲିଜ ହୋଇସାରିଛି । ବର୍ତ୍ତମାନ ଦିବଙ୍ଗତ ଅଭିନେତା ପିଣ୍ଟୁ ନନ୍ଦଙ୍କ ପ୍ରଥମ ପୋଷ୍ଟର ଲୁକ ରିଲିଜ ହୋଇଛି । ସବ୍ୟସାଚୀ ମିଶ୍ର ନିଜ ଇନଷ୍ଟାଗ୍ରାମରେ ଅଭିନେତା ପିଣ୍ଟୁଙ୍କ ଲୁକ ରିଲିଜ କରିଛନ୍ତି । ଏହି ଫିଲ୍ମରେ ପିଣ୍ଟୁ ସୁର ଭୂମିକାରେ ନଜର ଆସିବେ ।
ସେ ଏହି ପୋଷ୍ଟର ସେୟର କରି କ୍ୟାପସନରେ ଲେଖିଛନ୍ତି, ଆମେ ବହୁତ ମନେ ପକାଉଛୁ ପିଣ୍ଟୁ ଭାଇ । ଯାହା ଡାଇଲଗ କହିଛ ତାହା ସତ୍ୟ। ''ଏଠି ଯୋଉଟା ଗଲା ଗଲା, ଆମର ଏଠି ଆଉ ଲେଉଟାଣି ନାହିଁ।'' ତୁମର ଏହି ଶେଷ ଚଳଚ୍ଚିତ୍ର ତୁମର ଶୁଭେଚ୍ଛୁମାନଙ୍କ ପାଇଁ ଏକ ଭାବପ୍ରବଣ ଶ୍ରଦ୍ଧାଞ୍ଜଳି ହୋଇପାରେ । ଓଲିଉଡରେ କେବେ ବି ଆପଣଙ୍କ ପରି ଅଭିନେତା ପାଇପାରିବ ନାହିଁ । ଏଥିସହ ଟ୍ରେଲର ସେପ୍ଟମ୍ବେର 1 ରିଲିଜ ହେବ ବୋଲି ସବ୍ୟସାଚୀ କହିଛନ୍ତି ।
ତେବେ ଏହି ପୋଷ୍ଟର ରିଲିଜ ହେବା ମାତ୍ରେ ଏନେକ ଓଲିଉଡ କଳାକାର ଏବଂ ଫ୍ୟାନ୍ସ ଏହାକୁ ଲାଇକ କରିବା ସହ ପ୍ରତିକ୍ରିୟା ଦେଇଛନ୍ତି । ଜଣେ ୟୁଜର୍ସ ଲେଖିଛନ୍ତି, ଆପଣଙ୍କୁ ବହୁତ ମିସ୍ କରୁଛୁ ପିଣ୍ଟୁ ଭାଇ । ତୁମେ ଯେଉଁଠି ଅଛ ଭଲରେ ଥାଅ । ଆଉ ଜଣେ ଲେଖିଛନ୍ତି, ପିଣ୍ଟୁ ସାରଙ୍କୁ ଓଡିଶା ଲୋକେ ମନେ ପକାଉଛନ୍ତି । ଅନ୍ୟ ଜଣେ ଲେଖିଛନ୍ତି, ଫିଲ୍ମ ଦେଖିବାକୁ ବେଶ ଉତ୍ସାହିତ ଅଛି । ଆଉ ଜଣେ ଲେଖିଛନ୍ତି, ପିଣ୍ଟୁ ଭାଇଙ୍କ ଓଲିଉଡ ଜଗତକୁ ଅବଦାନ ଉତ୍ସାହଜନକ ଥିଲା । ମିସ୍ ୟୁ ପିଣ୍ଟୁ ଭାଇ ।
ଫିଲ୍ମ ବିଷୟରେ କହିବାକୁ ଗଲେ, ଶଙ୍କର ତ୍ରିପାଠୀଙ୍କ ରଚିତ ଓଡ଼ିଆ ଉପନ୍ୟାସ 'ନଡା ବିନ୍ଦୁ'ରୁ ପ୍ରସ୍ତୁତ ହୋଇଛି ଚଳଚିତ୍ର ପୁଷ୍କରା । ଏହି ଫିଲ୍ମର କାହାଣୀ ଏବଂ ସଂଳାପ ମଧ୍ୟ ଶଙ୍କର ତ୍ରିପାଠୀ ଲେଖିଛନ୍ତି । ଫିଲ୍ମ ତରଙ୍ଗ ପ୍ରଡକ୍ସନ ଦ୍ବାରା ନିର୍ମିତ ହୋଇଥିବା ବେଳେ ଶୁଭ୍ରାଂଶୁ ଦାସ ନିର୍ଦ୍ଦେଶନା ଦେଇଛନ୍ତି । ହଜିଯାଉଥିବା ସଂସ୍କୃତି, ପରମ୍ପରା ଏବଂ କୌଳିକ ବୃତ୍ତି ଉପରେ ଆଧାର କରି ଫିଲ୍ମ ପ୍ରସ୍ତୁତ ହୋଇଛି । ତେବେ ଏହି ପିଲ୍ମ ଚଳିତ ବର୍ଷ ଗଣେଶ ପୂଜାରେ ରିଲିଜ ହେବ ।
ଏହା ମଧ୍ୟ ପଢନ୍ତୁ: ଆଉ ଫେରିବେନି ଅଭିନେତା ପିଣ୍ଟୁ ନନ୍ଦ, ଝୁରୁଛି ଜନ୍ମମାଟି
ସୂଚନା ଥାଉ କି, ପିଣ୍ଟୁ ନନ୍ଦ ଚଳିତବର୍ଷ ମୃତ୍ୟୁବରଣ କରିଥିଲେ । ମାର୍ଚ୍ଚ 1 ତାରିଖରେ ବିଳମ୍ବିତ ରାତି ପ୍ରାୟ ୧୧ଟା ୨୫ ମିନିଟ ସମୟରେ ହାଇଦ୍ରାବାଦର ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ପିଣ୍ଟୁ ନନ୍ଦଙ୍କ ଦେହାନ୍ତ ହୋଇଥିଲା । ସେ ଦୀର୍ଘ ଦିନରୁ ଲିଭର ସିରୋସିସ୍ ରୋଗରେ ପୀଡ଼ିତ ହୋଇଥିବା ବେଳେ ତାଙ୍କର ଲିଭର ନଷ୍ଟ ହୋଇଯାଇଥିଲା । ଲିଭର ପ୍ରତିରୋପଣ ପାଇଁ ତାଙ୍କୁ ହାଇଦ୍ରାବାଦର ହସ୍ପିଟାଲକୁ ନିଆଯାଇଥିଲା । ସେଠାରେ ଚିକିତ୍ସାଧୀନ ଥିବାବେଳେ ଅଭିନେତା ଆଖି ବୁଜିଥିଲେ । ତାଙ୍କ ମୃତ୍ୟୁରେ ଓଲିଉଡ ଜଗତରେ ଏକ ଶୂନ୍ୟସ୍ଥାନ ସୃଷ୍ଟି ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
