ଖୋର୍ଦ୍ଧା: ରାଜ୍ୟରେ ଅତ୍ୟଧିକ ଖରା ସାଙ୍ଗକୁ ଅସହ୍ୟ ଗୁଳୁଗୁଳି ଓ ଗରମରେ ଛଟପଟ ଜନଜୀବନ । ଦିନରେ ତାପମାତ୍ରା ପ୍ରାୟ ୪୦ ଡିଗ୍ରି ପାର । ସେଥିପାଇଁ ଖରା ସମୟରେ ଶ୍ରମିକଙ୍କୁ କାମରେ ନଲଗେଇବା ପାଇଁ ସରକାର ନିର୍ଦ୍ଦେଶ ନାମା ଜାରି କରିଛନ୍ତି । କିନ୍ତୁ ଏହି ନିର୍ଦ୍ଦେଶନାମାକୁ ମାଲିକ ଓ ଠିକା ସଂସ୍ଥାମାନେ ଖାତିର ନକରି ଶ୍ରମିକମାନଙ୍କୁ ଖରାରେ କାମ କରାଉଛନ୍ତି । ଯାହାର ପ୍ରତିଫଳ ଦେଖିବାରୁ ମିଳିଛି ଖୋର୍ଦ୍ଧା ଜିଲ୍ଲାରେ ।
ଆଜି (ରବିବାର) ଦ୍ବିପ୍ରହର ସମୟରେ ଟାଙ୍ଗି ଥାନା ଅନ୍ତର୍ଗତ କାଳୁପଡା ବିଲରେ ଜଣେ ଶ୍ରମିକଙ୍କ ମୃତ୍ୟୁ ହୋଇଛି । ତେବେ ମୃତ ଶ୍ରମିକ ଜଣଙ୍କର ପରିଚୟ ମିଳିପାରିନଥିବାବେଳେ ତାଙ୍କ ନାକ ଓ ପାଟିରୁ ରକ୍ତ ବାହାରିଥିବା ଦେଖିବାକୁ ମିଳିଛି । ତେବେ କେଉଁ କାରଣରୁ ତାଙ୍କ ମୃତ୍ୟୁ ହୋଇଛି ତାହା ଜଣାପଡିନାହିଁ ।
ଶ୍ରମିକଙ୍କ ମୃତଦେହ ନିକଟରେ ଏକ ସାଇକେଲ ଓ ଦୁଇଟି ମାଟି ବୁହା ଝୁଡି ମଧ୍ୟ ପଡିଛି । ତେବେ ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ଖବରପାଇ ଟାଙ୍ଗି ଥାନା ପୋଲିସ ପହଞ୍ଚି ମୃତଦେହକୁ ଜବତ କରି ତଦନ୍ତ ଆରମ୍ଭ କରିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
