ଖୋର୍ଦ୍ଧା: ଚୋରା ଅଟୋରେ ନକଲି ମଦ କାରବାର । ତାହା ପୁଣି ଶହେ କି ଦୁଇ ଶହ ଲିଟର ନୁହେଁ ପାଖାପାଖି ଏକ ହଜାର ଲିଟର । ସୋମବାର ବିଳମ୍ବିତ ରାତିରେ ନକଲି ମଦ କାରବାର ବେଳେ ଚାନ୍ଦପୁର ପୋଲିସ ଚଢ଼ାଉ କରି ନକଲି ମଦ ଜବତ କରିବା ସହ ଏକ ମାଲ ବୋଝେଇ ଚୋରା ଅଟୋ ରିକ୍ସାକୁ ମଧ୍ୟ ଜବତ କରିଛି ।
ଚୋରା ଅଟୋରୁ ବିପୁଳ ପରିମାଣର ନକଲି ମଦ ଜବତ
ଚାନ୍ଦପୁରରୁ ଚୋରା ନକଲି ମଦ ଚାଲାଣ ହେଉଥିବାର ଖବର ପାଇ ଚାନ୍ଦପୁର ପୋଲିସ ଚଢାଉ କରିଥିଲା । ଚାନ୍ଦପୁର ଥାନା ନିକଟରୁ ପ୍ରାୟ ୨୦୦ ମିଟର ଦୂର କନ୍ଧ ନୟାଗଡ ଛକ ନିକଟରୁ ପୋଲିସକୁ ଦେଖି ଅଟୋ ଚାଳକ ଅଟୋକୁ ଛାଡି ଫେରାର ହୋଇଯାଇଥିଲା ।
ପୋଲିସ ଅଟୋ ରିକ୍ସା ସହ ନକଲି ମଦକୁ ଜବତ କରିଛି । ଗାଡିରେ ନକଲି ଦେଶୀ ମଦ ସହ ନକଲି ବିଦେଶୀ ମଦ ରହିଥିଲା । ଜବତ ହୋଇଥିବା ନକଲି ମଦର ଆନୂମାନିକ ମୂଲ୍ୟ ଦୁଇ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
