ଖୋର୍ଦ୍ଧା: ଖୋଲୁଛି ମାନସ ଦାସଙ୍କ ପଲିଟିକାଲ ଲିଙ୍କ । ବିଜେଡି ପରେ ଏବେ କଂଗ୍ରେସ ଓ ବିଜେପି ନେତାଙ୍କ ଭିଡ଼ିଓ ଭାଇରାଲ । ମାନବବାଦ ସଂଗଠନର ମୁଖ୍ୟ ମାନସ ଦାସ ଘଟଣାରେ ପ୍ରମାଣ ଯୋଗାଡରେ ପୋଲିସ । ଗତକାଲି ମାନସ ଦାସଙ୍କ ଭୁବନେଶ୍ବର ଘର ଉପରେ ପୋଲିସ ଚଢାଉ କରି ଅନେକ କିଛି ପ୍ରମାଣ ସଂଗ୍ରହ କରିଥିବାବେଳେ ମାନସ ଦାସଙ୍କ ମନି ଟ୍ରେଲ ଖୋଜୁଛି ପୋଲିସ । ମାନସ ଦାସଙ୍କ ପରିବାରର ପାଞ୍ଚଟି ବ୍ୟାଙ୍କ ପାସ୍ ବୁକ୍ ଜବତ ପରେ ଆଜି ବିଭିନ୍ନ ବ୍ୟାଙ୍କର ଆକାଉଣ୍ଟ ଯାଞ୍ଚ କରୁଥିବା ସୂଚନା ମିଳିଛି ।
ସେପଟେ ସମସ୍ତ ପ୍ରମାଣ ଯୋଗାଡ ପରେ ମାନସ ଦାସଙ୍କ ସହିତ ପୁଅ ମନୋରଞ୍ଜନକୁ ରିମାଣ୍ଡରେ ଆଣିପାରେ ପୋଲିସ । ଅନ୍ୟ ପଟରେ ମାନସ ଦାସଙ୍କ ରାଜନୈତିକ ଲିଙ୍କ ନେଇ ଆହୁରି ଫିଟୁଛି ଗୁମର । କଂଗ୍ରେସ ନେତା ତଥା ରାଜ୍ୟ ସଭାପତି ନିରଞ୍ଜନ ପଟ୍ଟନାୟକଙ୍କ ସହ ଭାରତୀୟ ଜନତାପାର୍ଟି ରାଜ୍ୟ ସଭାପତି ସମୀର ମହାନ୍ତିଙ୍କ ସମ୍ପର୍କ ଚିତ୍ର ଏବେ ପଦାକୁ ଆସିଛି । ମାନସ ଦାସଙ୍କ ସମ୍ପର୍କ କେବଳ ବିଜେଡ଼ି ସହିତ ନଥିଲା ବରଂ ବିଜେପି ନେତା ଓ କଂଗ୍ରେସ ନେତାଙ୍କ ସହ ଥିବା ଭିଡ଼ିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
