ଖୋର୍ଦ୍ଧା: ରାଜ୍ୟରେ ଦିନକୁ ଦିନ ବଢୁଛି ଅପରାଧ । ବୃଦ୍ଧି ପାଉଛି ଅପରାଧିକ କାର୍ଯ୍ୟକଳାପ । ଖୋର୍ଦ୍ଧା ଜିଲ୍ଲାର ବିଭିନ୍ନ ଅପରାଧରେ ସମ୍ପୃକ୍ତ ଥିବା 5 ଜଣଙ୍କ ଗିରଫ କଲା ପୋଲିସ । ଗିରଫ ଅପରାଧୀଙ୍କ ଠାରୁ 60 ଲକ୍ଷ ଟଙ୍କାର ସାମଗ୍ରୀ ଜବତ ହୋଇଛି ।
ଖୋର୍ଦ୍ଧା ଜିଲ୍ଲା 16ନଂ ଓ 57 ନଂ ଜାତୀୟ ରାଜପଥରେ ଘଟିଥିବା ଲୁଟ ଘଟଣାର ପର୍ଦ୍ଦାଫାସ କରିଛି ଖୋର୍ଦ୍ଧା ପୋଲିସ । ଜାତୀୟ ରାଜପଥରେ ଲୁଟ ଘଟଣାରେ ଖୋର୍ଦ୍ଧା ପୋଲିସ ଦୁଇଟି ସ୍ବତନ୍ତ୍ର ଟିମ ଗଠନ କରିଥିଲା । ବେଗୁନିଆ ଓ ବାଲୁଗାଁ ଅଞ୍ଚଳରେ ଘଟିଥିବା ଲୁଟରେ ଛେଳି ମେଣ୍ଢା ଓ ପିକଅପ ଭ୍ୟାନ ସହିତ ତାର ମଧ୍ୟ ଚୋରି ହୋଇଥିଲା । ଏହି ଘଟଣାରେ ପାଞ୍ଚଜଣଙ୍କୁ ଗିରଫ କରିଛି ପୋଲିସ । ଅପରାଧୀଙ୍କ ମଧ୍ୟରେ ଜଣେ ନାବାଳକ ଥିବା ସୂଚନା ରହିଛି ।
ଗିରଫ ଅପରାଧୀଙ୍କ ଠାରୁ 60 ଲକ୍ଷ ଟଙ୍କାର ଜିନିଷ ଜବତ ହୋଇଛି । ଛେଳି, ମେଣ୍ଢା, ଦୁଇଟି ପିକଅପ ଭ୍ୟାନ, ବୋଲେରୋ, ବାଇକ, ତାର,ଖଣ୍ଡା ଜବତ ହୋଇଥିବାର ଖୋର୍ଦ୍ଧା ଏସ୍ପି ସୂଚନା ଦେଇଛନ୍ତି । ସମସ୍ତ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇ ଥିବାବେଳେ ଘଟଣାରେ ସମ୍ପୃକ୍ତି ଥିବା ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ଉଦ୍ୟମ ଜାରି ରଖିଛି।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା,ଇଟିଭି ଭାରତ
